Job 19 - Edo Bible (E Baibol Ẹdo) Version 1996

^1-2 “Vbe uwa na ye ẹmwẹ ne uwa guan zẹ obalọ yọ mwẹ egbe hẹ yi?

³ Kugba kẹghẹre ọ re uwa ya tie ihẹn mẹ ekhue ẹbọ ne uwa tie mẹ i vbe mu uwa.

⁴ A deghẹ I gele ba emwi ku rru, de ne ọ kan uwa vbọ?

⁵ Wa ro wẹ wa maa sẹ mwẹ, wa na kha wẹ, ọlọghọmwa ne I ye na rhie maa wẹ I gele rria abe.

⁶ Wa ma miẹn ọẹn ra i ghẹ Osanobua ọre ọ ru emwi na? Ọ khuẹn ifi ne ọ ya mu mwẹ.

⁷ I datu wẹ obọ ẹre da mwẹ, a ma miẹn ọmwa ne ọ danmwehọ. I tu wẹ ne a bu ohiẹn mwẹ ẹse, a ma miẹn ọmwa ne ọ zẹ yọ.

⁸ Osanobua mu emwi gbe odẹ nẹ, I i miẹn ehe la gberra vbọ, ọ ye ebiebi rhie odẹ mwẹ lẹre nẹ.

⁹ Ọ viọ ẹfe ne I mwẹ hia kpao. Ọ rhia uyi ne I te mwẹ hia a.

¹⁰ Ọ liki mwẹ vbe igienenẹ. Ọ si idaehọ mwẹ vbọ rhie fua, ọ na sẹ mwẹ rae ne I luẹluẹ wu fua.

¹¹ Ohu mu Osanobua, ọ gha vannọ okan yan mwẹ, obọ ne ọ ya mu oghian rẹn, dan ọ re ọ ghi ya mu mwẹ.

¹² Ọ giẹ iyokuo ẹre ne iran dekun mwẹ. Iran tọnnọ uvun igbinna, iran na ghae ga owa ukpọn mwẹ.

¹³ “Osanobua wẹ ne avbe etẹn mwẹ hia he mwẹ ye otọ, ọrriọvbe I ghi khin ne iran ni te ka rẹnmwẹ yi,

¹⁴ etẹn mwẹ kevbe avbe ẹse mwẹ hia kpao.

¹⁵ Emwa ni mu otuẹ rrie owa mwẹ mianmian mwẹ, ibiẹka ikhuo ni re eguọmwadia mwẹ, gha ru mwẹ vbe orhunmwuyẹn kevbe ọrriọvbe.

¹⁶ I gha tie ọguọmwadia, ẹ i ghi khuẹnniẹn, ọ gha khọn rẹn wẹ te I rinmwian wẹ ne ọ ru iyobọ mẹ.

¹⁷ Te ọvbokhan mwẹ ghi lẹ ne akọn mwẹ ne ọ wia. Etẹn mwẹ ni sikẹ mwẹ i ghi rrọọ.

¹⁸ Ibiẹka gha miẹn mwẹ, iran ghi gha zan mwẹ, iran ghi gha giẹ mwẹ.

¹⁹ Avbe ọse ni sikẹ mwẹ sẹẹ gha miẹn mwẹ, egbe ghi wọ iran ye otọ, te iran ne I te ho ẹmwẹ ọnrẹn sẹẹ ghi gun mwẹ gbinna.

²⁰ Te ikpakpa egbe mwẹ ghi munọ ikọnmwẹ yan ugboloko mwẹ; egbeiregbe ne I ya miẹn uhunmwu.

²¹ Ọse mwẹ wa khin! Wa vbe tohan imẹ. Obọ Osanobua gbe mwẹ fi otọ nẹ.

²² Te uwa ra vbe gha khu mwẹ khian vbene Osanobua ru ẹe ra? Wa ma he ye zẹ obalọ yọ mwẹ egbe sẹ ra?

²³ “Vbọ rrọọ nian wẹ a gha miẹn ọmwa ne ọ gha ye ẹmwẹ mwẹ rre. Ne ọ gbẹnnẹ ọẹn ye ebe!

²⁴ Ra ne ọ ya ematọn ka ẹmwẹ mwẹ ye okuta. Ne ọ gbẹn ọẹn, ne ọ ghẹ wi ẹdẹdẹmwẹdẹ.

²⁵ Sokpan, mẹ rẹnrẹn ighẹ arhiọnkpa rre ẹrinmwi, ne ọ gha do mu ẹzọ mwẹ gui.

²⁶ Uhin vbe iyeke vbe emianmwẹ a ghi rri ikpakpa egbe mwẹ na an nẹ,

²⁷ egbe na ọ re I ra ye gha mu khian vbe I gha miẹn Osanobua aro. Te I ra ye aro mwẹ na miẹn ọẹn, ẹ i khian vbe gha re orhunmwuyẹn mẹ.” Udu mwẹ kpaẹn fi ẹko vbe uwa kha re wẹẹ,

²⁸ “Vbe ima gha ya zẹ obalọ ye ọre egbe hẹ?” Wa gha gualọ ahogui ne uwa miẹn ehe na hẹ rhu mwẹ.

²⁹ Sokpan, banbanna nian, wa gha mu ohan umozo, umozo ne Osanobua ya rria orukhọ ikhi, ne uwa miẹn ehe na rẹn wẹ ọmwa ọkpa rrọọ ne ọ bu ohiẹn.