Job 18 - Edo Bible (E Baibol Ẹdo) Version 1996

^1-2 E Bildad keghi wanniẹn wẹẹ, “E Job, ọmwa vbene uwẹ ye na i guara hunwan ra? Akpawẹ, u gha sẹtin hunwan nian, ma gha ghi miẹn otọ na guẹ guan.

³ De emwi ne ọ ya uwẹ gha ro yi wẹ te ima hia wa kọn zẹ vbe ẹmila?

⁴ Te u ye ohu ne u mu na ru ikuanegbe ne egbe ruẹ. Emwa gha lẹ kua hin otọ agbọn rre ra rhunmwuda ighẹ ohu mu uwẹ? Te Osanobua ghẹ ghi silo avbe oke nekhua vbọlọ ra ne ẹko miẹn ehe na rhiẹnrhiẹn?

⁵ Ẹ i mwẹ a ma dọ ukpa ọmwa dan yọ. Ubamwẹ ọnrẹn i ra dọlegbe wan uwanmwẹ ọvbehe.

⁶ Ukpa ne ọ baa vbe owa ukpọn rẹn gha so ebiebi.

⁷ Te a te họn ẹmwẹ igiawẹ ọre vbe otọ, sokpan banbanna nian, ọ rrua owẹ ọ de rhunmwuda ude egbe ẹre.

⁸ Ọ khian la uwu ọgua, emwi mu ẹre owẹ,

⁹ ifi mu ẹre ighighian owẹ, ọ na mu ẹn mwẹ.

¹⁰ A rhuẹ ifi lẹre ye otọ khẹ ọ re, a rhuẹ ifi ye odẹ ne ọ la khian.

¹¹ Emwi ne ọ mu ohan diakhẹ ọre lẹga ehe hia. Ọ keghi gha lele ẹre usomwẹ owẹ khian.

¹² Ọ te ka wa fe yi, sokpan ohanmwẹ ọ ghi gbe ẹe nian. Ọfuan gha khẹ ọre, ọ mudia ke ẹe.

¹³ Emianmwẹ dan gba ẹre egbe hia, ọ kẹkẹ ẹre obọ kẹkẹ ẹre owẹ ua.

¹⁴ A sanmwẹ ọẹn hin owa ukpọn ne ọ fu ẹre egbe rre. A na wẹ ne ọ do mudia vbe odaro Ogie Uwu.

¹⁵ Ọmwaikọmwa sẹtin ya di owa ukpọn rẹn ya nian, iyeke vbe a ghi sa ugbofi ya gbele ọkhọe hin rre nẹ.

¹⁶ Inian kevbe abọ ẹre luẹluẹe, ọ vbe kaka a.

¹⁷ Usi ẹre fo vbe owa kevbe isi, a ma miẹn ne ọ ghi ye ẹre rre ọvbehe.

¹⁸ A gha khu ẹe fua hin otọ emwa ni rre agbọn, a ghi khu ẹe fua vbe uwanmwẹ la ebiebi.

¹⁹ Ẹ i mwẹ ivbi uniẹn ọnrẹn, ọ ma fi ye otọ.

²⁰ Ke ahọ ya sẹ orrie, egbe hia ghi gha guẹ ọmwa ne ọ họn emwi ne ọ rruan rẹn.

²¹ Erriọ ẹmwẹ agbọn emwa dan ye. Ẹmwẹ agbọn emwa ni ma ka Osanobua yọ.” E Job keghi kha wẹẹ,