Job 16 - Edo Bible (E Baibol Ẹdo) Version 1996

^1-2 E Job keghi wanniẹn wẹẹ, “I ka họn egbe ẹmwẹ vberriọ de yi. Ẹko ne uwa fu ọmwa ẹre rre, obalọ wa nọ vbe egbe.

³ Te uwa ra wa gha guan khian ẹdẹdẹmwẹdẹ ra? Te awua vbe a gha miẹn wẹ, ẹ i re uwa ọre ọ guan kiekie ra?

⁴ Gie a kha ighẹ mẹ ọ re uwa, wa na gha re imẹ, I gha wa sẹtin vbe ta avbe ẹmwẹ ne uwa talọ na. I gha sẹtin ya ẹwaẹn fieghe uhunmwu mwẹ, I gha ghi ye ẹmwẹ ne ọ tue ladian silo uwa kẹ egbe.

⁵ I gha sẹtin ye ibude rhie ẹtin ba uwa ẹtin, I gha wa gha guan khian ne I ya fu uwa ẹko rre.

⁶ Sokpan ẹmwẹ ọkpa ne I gha ta ne ọ mwẹ asa irrọ. I gha gue unu mwẹ, ọnii i wẹ ne obalọ mwẹ fo.

⁷ Osanobua, u wiẹn mwẹ uan nẹ, u keghi giẹ iran gbele emwa mwẹ hia.

⁸ U mu mwẹ piẹn, oghian mwẹ ọre u khin. Ohian vbe uvẹ ọre I ghi ye, emwa ghẹ ghi miẹn ọnii, iran ghi gha kha wẹ I gele rria abe.

⁹ “Osanobua yanghan mwẹ obọ vbe owẹ hẹ kua, rhunmwuda ighẹ ohu mu ẹẹn, ọ keghi suku aro a gha ghe mwẹ.

¹⁰ Emwa gha niẹn ukpe da mwẹ, iran do lẹga mwẹ, iran kegha gbe ubi yọ mwẹ aro.

¹¹ Osanobua wa si mwẹ fi emwa dan obọ nẹ.

¹² Ọfumwegbe ọ re I te gha ye, sokpan, Osanobua keghi mu mwẹ ẹho, ọ mama mwẹ, ọ na lọkọ mwẹ uan. Osanobua keghi ya mwẹ ru ama ne a na danmwẹ emwi ne a fi,

¹³ ọ kegha filo ifẹnmwẹ gunmwẹ, ke igienenẹ rre. Avbe ifẹnmwẹ nii salọ mwẹ, iran na vbe kuan mwẹ. Sevba, ọ ma ye mwẹ itohan,

¹⁴ ọ kegha kuan mwẹ yan egbe yan egbe. Ọ keghi dekun mwẹ vbe ovbiyokuo ne ohu rhia ẹre uhunmwu an.

¹⁵ “I kegha khiẹ, I na gha rhuan ukpọn ne a ya ẹkpo ivin do. I tota ye ebubẹ zẹ vbe ọmwa ne a gbe fua.

¹⁶ I viẹe ẹsẹse rhinrin ugbaro mwẹ ke do gha baa. Aro mwẹ keghi hue, aghọnghọn gbe okin lẹga ẹre.

¹⁷ Sokpan, I ma rria abe uyinmwẹ ikẹtin, erhunmwu ẹmwata ọ re I na ghe Osanobua.

¹⁸ “Ẹ o, otọ agbọn, wa ghẹ gbe gue emwi ne a baku ru ghe mwẹ. Wa ghẹ giẹ a gbe eta rhu ibuohiẹn ẹmwata ne I tu tie.

¹⁹ Orhiọnkpa rre ẹrinmwi ne ọ gha mudia khọn ekhae mẹ.

²⁰ Avbe ọse mwẹ sọnnọ mwẹ, aro mwẹ keghi gbe ameve kua ghe ehe ne Osanobua ye.

²¹ I gualọ ọmwa ne ọ gha rinmwian Osanobua mẹ, zẹ vbene ọmwa rinmwian ne ọse ẹre.

²² Rhunmwuda vbe iyeke omwa ukpo eso, I gha lele odẹ ne a i ghi na dọlegbe rre.