Job 15 - Edo Bible (E Baibol Ẹdo) Version 1996

Imuaemwẹ Nogieva

^1-2 Ọre Ẹlifaz ne ovbi ẹvbo ne a tie ẹre Tẹman na wanniẹn, ọ wẹẹ, “Etalọ kẹkan, e Job, etalọ kẹkan ọ re ena khin.

³ Ọmwa ne ọ wan ne ọ gha guan vbene uwẹ guan na i rrọọ, ra ne ọ gha ya ẹmwẹ ne ẹ i mwẹ emwi ne a ya ẹe kha zẹ ene unu ẹnrẹn.

⁴ Akpawẹ ọ guẹ ru, a i ghẹ gha miẹn ọmwa ne ọ ye mu ohan Osanobua; a i ghẹ gha miẹn ọmwa ne ọ ye na erhunmwu ghe ẹre.

⁵ Ẹmwẹ ne u ta rhie maa ighẹ ọmwa dan u khin, Te u ho ne u ba ya okpọta zẹ asa.

⁶ Ẹ i re imẹ ọ re ọ gha zẹdẹ bu ohiẹn gbe uẹ, avbe ẹmwẹ ne u guan bu ohiẹn gbuẹ nẹ.

⁷ “Te uwẹ ro ighẹ wẹ ọ re ọmwa ne a ka gha biẹ ye agbọn na ra? Wẹ rre evba vbe Osanobua yi avbe oke nekhua ra?

⁸ Te emwamwa ne Osanobua mwamwaẹn defi uwẹ ehọ ra? Ra te uwẹ ro ighẹ uwẹ ọkpa ọ re ọ wan?

⁹ Emwi ne uwẹ rẹnrẹn ne ima ma rẹn i rrọ.

¹⁰ Emwa ni fu edẹ ọ re ọ ma ima ẹwaẹn, emwa ne a biẹlẹ nẹ a ke biẹ erha a.

¹¹ “Osanobua rhie egbe rọkhọmwẹ ne uẹn, vbe u a ghi na ye he ẹe ye otọ hẹ yi? Aro rọkhọrọkhọ ma ya gha guan ne ẹẹn, avbe ẹmwẹ ni gu egbe ro.

¹² Sokpan, egbe guọ uwẹ, u keghi ya ohu tọn aro ye ima egbe.

¹³ Ohu Osanobua muẹn ẹsẹse, te u gha niẹn ukpe ghe ẹre.

¹⁴ “A gha miẹn ọmwa ne ọ gele wa huan fo ra? A gha miẹn ọmwa ne ọ wa gba na vbe odaro Osanobua ra?

¹⁵ Osanobua i mu ẹtin yan avbe odibo ẹre ne arengbe, u hin ighẹ iran ma huan vbe aro ẹre.

¹⁶ Ọmwa nagbọn ghi gha si ọkhọ wọn zẹ vbe amẹ, ẹn, te ọmwa kẹkẹ ua, te ọ wa ku ogboi.

¹⁷ “E Job, danmwehọ emwi ne imẹ vbe rẹn.

¹⁸ Emwa ni wan ma imẹ ẹmwata nẹ. Egbe ne avbe erha iran vbe ma iran ẹre, iran ma vbe rhie emwi ẹkhokho ọkpa lẹre.

¹⁹ Ọrriọvbe I rre otọ iran, ọmwa ne ọ gha silo iran hin ehe ne Osanobua ye rre i rrọ.

²⁰ “Ọmwa dan ne ọ zẹ ẹrrẹe kpokpo, obalọ ọre ọ ra gha ye vbe ẹdagbọn rẹn hia.

²¹ Utumwẹ afianma ọ re ọ ra gha tu vbe ehọ ẹre vbe ẹghẹ hia. Avbe izigan ghi hẹ rhu ẹe vbe ẹghẹ ne irẹn gha te ya gha ro ighẹ ẹbe fo.

²² Idaehọ irrọ ne ẹẹn ighẹ ọ gha miẹn uhunmwu vbe obọ ebiebi, rhunmwuda, umozo diakhẹ ọre vbe ihe ọkpa ne ọ gbe ẹe rua,

²³ Avbe ugu vbe mudia ne iran rri ikun ẹnrẹn.

²⁴ Rẹn rẹnrẹn wẹ te ẹdẹnakhuẹ irẹn so ebiebi, ọfuan rhievbẹ khẹ ọre, zẹ vbe ọba ne ọ wegbe ne ọ fan rhu ẹe.

²⁵ “Erriọ ọre ẹdagbọn iran ye, ighẹ iran ni kun ekpa da Osanobua. Ọna vbe gha yagha Udazi.

^26-27 Ọmwa ne ọ hio, ne ọ vbe sọtẹ nọ. Ọ gha ye izevbudu tọn asa ẹre mu ghe odukhunmwu. Ọ ghi guọnmwẹ egbe ne ọ ya gu Osanobua gbinna.

²⁸ “Ọnii ọ re ọmwa ne ọ khọn ẹvbo ni bun muotọ, ọ na viọ avbe owa ne avbe ena rẹn lẹ sẹrae.

²⁹ Sokpan, okuo gha rẹnkhẹn avbe owa kevbe ẹvbo nii uan. Ẹfe ni i ra tọ vbe obọ ẹre, ne ọ ra tọ vbe emwi ne ọ mwẹ i rrọ. Uhin ighẹ te a ra ho aghọnghọn rẹn bẹkun.

³⁰ Rẹn i ra vbe miẹn uhunmwu vbe obọ ebiebi, te irẹn ra yevbe erhan, ne erhẹn giẹn ọre abọ hia a, ẹhoho na khuọnnọ ehọn rẹn kua.

³¹ A deghẹ rẹn wa kọn sẹ vberriọ, ne ọ na mu ẹtin yan ọkhọ, ọkhọ ọrọre ere ne ọ gha vbe re.

³² Rẹn gha luẹluẹ ua, ọ te sẹ ẹghẹ ọre, ọ ghi luẹluẹ ua zẹ vbe abọ erhan. Ẹ i ghi ra vbe dọlegbe bi nunuunu ọvbehe.

³³ Rẹn gha yevbe azara ne ọmọ rẹn khuọn kua, ọ te vbọ, zẹ vbe erhan oliv ne ọ khuọn ebe kua.

³⁴ A i ra miẹn ivbi uniẹn emwa dan, erhẹn ọ re ọ gha giẹn owa ne a ya igho odieke bọ.

³⁵ Iran na ọrọre emwa ni mwamwa orueghe, iran ghi vbe gha ru emwi dan. Erẹrẹ ọ re ọ vuọn orhiọn iran vbe ẹghẹ hia.”