Job 13 - Edo Bible (E Baibol Ẹdo) Version 1996

^1-2 “Ẹmwẹ ne u wa talọe hia, I ka họn ehia de yi. I rẹn otọ ehia. Mẹ vbe rẹn sẹ zẹ vbene uwa vbe rẹn. I i re ne ọ ma sẹ ihe uwa.

³ Sokpan Osanobua ọ re ima gba muan ẹmwẹ ighẹ ẹ i re uwa. I ho ne I gui ẹzọ mwẹ ma rẹn.

⁴ Te uwa ya ohoghe mu asa gue amarẹn emwi uwa. Te uwa yevbe ọbo ne ẹ i sẹtin sinmwi ọmwa rhọkpa.

⁵ Wa ghẹ zẹdẹ guan, ne agbọn miẹn ehe na gha ro ighẹ umẹwaẹn ọ re uwa khin.

⁶ “Wa danmwehọ vbe I a gha gui ẹzọ mwẹ.

⁷ Vbọzẹ ne uwa na ta ohoghe yi? Wa yayi ighẹ ohoghe uwa mwẹ emwi ne ọ gha ru ne Osanobua re ra?

⁸ Te uwa ra ta ene unu ẹnrẹn ne ẹẹn ra? Wa ọ re ọ ra gui ẹzọ ẹre vbe iko ra?

⁹ Osanobua gha gbearokotọ ghe uwa, ọ gha miẹn emwi ne ọma ọkpa vbọ ra? Te uwa ro ighẹ wa gha sẹtin do Osanobua ọzuọ vbene uwa do emwa nagbọn ọzuọ na ra?

¹⁰ Ọ gha khọn rẹn ne uwa gha do zẹ ọmwa ẹkpe. Te Osanobua gha ye gu uwa gui.

¹¹ Ẹtin ẹnrẹn ghi runran uwa.

¹² Itan ne uwa kpa, te ehia rhiara zẹ vbe emuẹn. ẹmwẹ ne uwa guan ladian ye mitanmitan zẹ vbe obuẹ.

¹³ Wa gbẹdọ ne uwa rhie otọ mẹ ya guan, ehe ne ọ gha de gbe ne ọ degbe.

¹⁴ “Mẹ mu egbe ne I ya rhie uhunmwu da ẹbe.

¹⁵ Idaehọ mwẹ fo nẹ, rhunmwuda ọnii, ẹ i ghi mwẹ asa a deghẹ Osanobua gbe mwẹ uan. I gha gui ene unumwẹ ma rẹn.

¹⁶ U gha ghe, udinmwẹ na ghi do miẹn mwẹ fan, rhunmwuda, ohan i ra giẹ ọmwa dan mudia ye Osanobua odaro.

¹⁷ Banbanna nian, danmwehọ vbene I rhan otọ emwi hẹ.

¹⁸ I mu egbe ne I gui ene unumwẹ, rhunmwuda I rẹnrẹn ighẹ mẹ ọ re ọ rria asẹ.

¹⁹ “Te u ra do ba mwẹ ifi ẹzọ ra Osanobua? U gha ru vberriọ, mẹ mu egbe ne I gha ya hunwan ne I wa wu.

²⁰ Gun mwẹ nọ emwi eva, u ghi kue yọ mwẹ re. Iyeke ọnii, I i ghi lẹ ne uẹn.

²¹ Ghẹ ghi rriọ mwẹ oya, ghẹ ye emwi ohan fuẹn mwẹ uan.

²² “Osanobua, wẹ ka guan, ne imẹ rhie ewanniẹn yọ. Ra giẹ imẹ ka guan ne uwẹ rhie ewanniẹn mẹ.

²³ De emwi ne ọ re orukhọ mwẹ yi? De emwi ne I baku ru? De emwi dan ne a ka yọ mwẹ owẹ?

²⁴ “Vbe u a ghi na rhie aro lẹre mẹ hẹ yi? Vbe u a ghi na ye aro eghian ghe mwẹ hẹ?

²⁵ Te u ho ne u runran mwẹ ra? Mẹ ma vba ebe ne ọ kakae, irunmwu ne ọ kakaa nẹ ọ re uwẹ gu khọn.

²⁶ “U wa ba mwẹ ifi ẹzọ ọhanabe, ya sẹ egbe emwi ne I ru vbe I he ye kherhe,

²⁷ U rrọ ọgiọrọ yọ mwẹ owẹ, u kegha baba owẹ ne I zẹ vbotọ, u keghi vbe gha zọ uhio ehe ne I rhie owẹ yi.

²⁸ Rhunmwuda ọnii nian, I keghi vbiolo kua zẹ vbe erhan ne ọ kẹkẹe, kevbe zẹ vbe ẹwu ne arriukpa re.”