Job 12 - Edo Bible (E Baibol Ẹdo) Version 1996

^1-2 Ẹre Job ghi na wanniẹn wẹẹ, “Vbe ẹmwata, wa ọrọre unu emwa hia. Wa gha wu, ẹwaẹn gha wu lele uwa.

³ Sokpan vbene uwa wan, ọ re imẹ vbe wan. Emwi ọkpa ne uwa ya sẹ mwẹ, ẹ i rrọọ. Agbọn hia vbe rẹn emwi ne uwa he ta usin.

⁴ Banbanna nian, uhin ighẹ te avbe ọse mwẹ ghi giẹ mwẹ, iran gha giẹ, a gha rhe miẹn ighẹ, ọmwata ọ re I khin, I ma rria abe. Sokpan, ẹghẹ ọkpa rrọọ, ne Osanobua na họn erhunmwu mwẹ.

⁵ Wa i mwẹ ọlọghọmwa, sevba wa gha ya mwẹ gbogiẹ; wa na gha fi ọmwa ne ọ de khian emwi.

⁶ Avbe oyi kevbe emwa ni ma rẹn Osanobua, ghi gha rrọọ vbe ọfumwegbe. A gha rhe miẹn wẹ, ẹtin obọ iran ọrọre Osanobua iran.

⁷ “Avbe ahianmwẹ kevbe aranmwẹ oha, wa mwẹ emwi ni bun ne iran gha ma uwa ẹre.

⁸ Wa nọ avbe aranmwẹ oke kevbe ọghe okun ne iran ma uwa ẹwaẹn iran.

⁹ Iran hia rẹnrẹn ighẹ obọ e Nọyaẹnmwa ọ re ọ yi iran.

¹⁰ Osanobua ọ re ọ dia ẹdẹ agbọn avbe emwi ne ọ yi; obọ ẹtin ẹnrẹn ọre ẹdẹ agbọn emwa hia ye.

¹¹ Sokpan, zẹ vbene evbare ne a danmwẹ rhiẹnrhiẹn aranmwẹ ruẹn, erriọ ọ re ẹmwẹ ne a họn vbe rhiẹnrhiẹn ehọ ruẹ.

^12-13 “Avbe ọmaẹn mwẹ ẹwaẹn, sokpan Osanobua mwẹ ẹwaẹn kevbe ẹtin. Avbe ọmaẹn rherhe bẹghe vbene emwi ra de hẹ. Osanobua rẹn vbene emwi ra de hẹ kevbe, ẹtin ne a ya ru ẹe vbene a gha ru ẹe hẹ.

¹⁴ Osanobua gha dunmwu emwi sotọ, de ọmwa ne ọ gha dọlegbe bọ ẹe? Osanobua gha mu ọmwa ye ẹwẹdọ, de ọmwa ne ọ gha sẹtin fan ẹẹn fua?

¹⁵ Osanobua gha mu amẹ, uyunmwu ghi rre. Ọ gha zẹ amẹ obọ fua, ogbigbi orogho amẹ ghi rre.

¹⁶ “Osanobua wegbe, rẹn ọ re ọ khọnmiotọ vbe ẹghẹ hia. Ke ne a rẹrẹ, kevbe ne ọ rẹrẹ ọmwa, obọ ẹtin ẹnrẹn ọ re iran hia ye.

¹⁷ Ọ ghi miẹn iran ni khaemwisẹ ẹwaẹn, Ọ ghi ya iran ni da kha gha ru emwi ukọnmwẹ.

¹⁸ Ọ gha silo avbe ọba hin ẹkete iran rre, Ọ ghi ya iran khian eviẹn.

¹⁹ Ọ ghi gbe avbe ohẹn kevbe emwa ẹtin uhunmwu ke otọ.

²⁰ Ọ ye obọ gue emwa ne a mu ẹtin yan unu, ọ ghi vbe miẹn avbe ọmaẹn ẹwaẹn iran.

²¹ Ọ fa iran ni rre ukpo ẹtin uan, ọ kevbe dobọ ẹtin iran ni dakha yi.

²² Ọ giẹ uwanmwẹ gha rrie ehe ne ọ so ebiebi zẹ vbe uwu.

²³ Ọ ye avbe okpẹvbo khian ni wegbe kevbe ni kpọlọ, sokpan, ọ khọn miẹn iran otọ, ọ kevbe fuẹn iran an.

²⁴ Ọ ye ọkaolotu iran khian akpa, ọ keghi giẹ iran gha zozo, iro han iran, iran wirua.

²⁵ Iran baba odẹ khian vbe uwu ebiebi iran kegha kpigogo, zẹvbe ọdayọn.”