Job 11 - Edo Bible (E Baibol Ẹdo) Version 1996

^1-2 Ẹre Zofa ne ovbi e Neama na wanniẹn wẹẹ, “A i miẹn ne ọ gha rhie ewanniẹn ye avbe ẹmwẹ oya na ra? Etalọ vbe nian ọ re ọ ghi ra ye ọmwa rria asẹ ra?

³ Te uwẹ ro ra e Job ighẹ ma i ra miẹn ẹmwẹ zẹ wanniẹn ọn? Wẹ ẹmwẹ ọtagiẹ ruẹ gha rhie obọ gue ima unu.

⁴ U khare ighẹ ẹmwata ọ re u ta, u wẹ ọmwa ne ọ huanrẹn u khin vbe odaro Osanobua.

⁵ Vbọrrọ nian wẹ Osanobua gha zẹ ẹmwẹ wanniẹn!

⁶ Ọ gha tama ruẹn wẹ ẹwaẹn mwẹ ilawẹ emwi eso rrọ ne ọmwa i sẹtin rẹn otọ ẹre. Oya ne Osanobua rriọ re na, ma sẹ vbene ọ te khẹke uẹ.

⁷ “Wẹ gha sẹtin rẹn okhiẹ kevbe ukpẹ ọre ra ighẹ ẹtin kevbe ukpọlọmwẹ Osanobua?

⁸ Iso i he re ehe ne Osanobua isẹtin gberra, sokpan ọ gberra ehe ne ẹtin ruẹn sẹe. Osanobua rẹn ehe ne iran ni wulo nẹ ye, sokpan wẹ ma rẹn ọnrẹn.

⁹ Ukpọlọmwẹ Osanobua sẹe uvbẹmwẹ agbọn na, ọ vbe vbẹ vbe otọ sẹ okun.

¹⁰ Deghẹ Osanobua muẹn, ọ na wẹ ne a gui ẹzọ ruẹ, de ọmwa ne ọ gha da ẹre obọ yi yi?

¹¹ Osanobua rẹn emwa ni re ẹwobi, ọ bẹghe emwi dan ne iran ru hia.

¹² Ẹghẹ ne a gha na biẹ ede zẹ vbe aranmwẹ owa ọ re emwa ni kọn de ẹwe ua, gha na suẹn gha wan.

¹³ “Dọlọ ekhọe ruẹ yi e Job, sua owẹ sẹ ehe ne Osanobua ye.

¹⁴ Viọ avbe emwi dan kevbe ni la ihan hin owa ruẹ rre.

¹⁵ Ne u dọlọ mu agbọn hẹn, vbe ne ọ digiẹ kevbe ne ẹ i mu ohan,

¹⁶ Ẹghẹ nii, u ghi do mianmian ọlọghọmwa ruẹn hia. Zẹ vbe orogho ne ọ lẹ gberra, ne a ma ghi yerre ọvbehe.

¹⁷ Ẹdagbọn ruẹn ghi wan uwanmwẹ sẹẹ owẹn ogiavan ẹghẹ ne ọ te so ebiebi sẹ vbe ẹdagbọn, ghi wan uwanmwẹ zẹ vbe owiẹ.

¹⁸ Wẹ ghi do gha rrọ vbe ne ẹkun na sotọ, kevbe ne ọ vuọn ne idaehọ. Osanobua gha degue ruẹ, ọ ghi rhie ikẹtin ne uẹn.

¹⁹ Afianma avbe eghian ruẹn i ghi ra fian an, emwa ni bun gha do nọ iyobọ vbe obọ ruẹ.

²⁰ Sokpan, ọmwa dan gha ghe lẹga, egbe ghi wọ ẹre. Ọ ghi miẹn wẹ ehe ne a la miẹn uhunmwu vbọ i rrọọ. Idaehọ ọkpa ne iran mwẹ ọrọre wẹ, ẹ i mwẹ a ma ghi wu.”