Job 10 - Edo Bible (E Baibol Ẹdo) Version 1996

¹ “Agbọn khan mwẹ nẹ, Danmwehọ ẹzọ orriara ne I gui.

² Osanobua, ghẹ bu abe gbe mwẹ, tama mwẹ, de ẹzọ ne u gunmwẹ gui yi.

³ We yayi wẹ ọ kere ne ekhọe ruẹ wa wegbe vberriọ? Ne u zan emwi ne uwẹ tobọ ruẹ yi? Ne u vbe ya obọ ye iro ne emwa dan zẹe?

⁴ Aro ne ima ya ghe emwi ọ re uwẹ vbe ya ghe ẹre ra?

⁵ Ẹdagbọn uwẹ vbe kanmwa zẹ vbe ọghe ima ra?

⁶ Vbe u a ghi na zọ uhio orukhọ mwẹ khian hẹ? Ne u na vbe zọlọ abakuru mwẹ hia ladian?

⁷ U rẹnrẹn wẹ I ma rria abe. Ọmwa ne ọ gha sẹtin wọlọ mwẹ hin obọ ruẹ rre, ẹ i rrọọ.

⁸ “Obọ ruẹ ọ re ọ mwamwa mwẹ, ne ọ vbe ma mwẹ. Banbanna nian, avbe obọ nii ọ re ọ ghi rẹnkhẹn mwẹ uan na.

⁹ Yerre wẹ obuẹ ọ re u ya ma mwẹ, te u ghi ra vbe dunmwu mwẹ khian ebubẹ ra?

¹⁰ Wẹ ọ re ọ rhie ẹtin ne erha mwẹ ya biẹ mwẹ, wẹ ọ re ọ gunmwẹ wan vbe ẹko iye mwẹ.

¹¹ Wẹ ọ re ọ ye ugboloko kevbe inian yi egbe mwẹ. U keghi ye inian nekhua kevbe ikpakpa gue ugboloko nii.

¹² Wẹ ọ re ọ rhie arrọ kevbe aho ẹmwẹ ọmwa ne ẹ i bẹghe mẹ. Wẹ ọ re ọ gbearoghe mwẹ ne I na rre agbọn.

¹³ Banbanna nian, I do rẹn wẹẹ, te u wa do mwamwa emwi ne u gha ru mwẹ re ke ẹghẹ nii gha dee.

¹⁴ U kegha baba mwẹ, a deghẹ I gha fidọn. Ne u ghẹ miẹn ehe na yabọ mwẹ.

¹⁵ I gha fidọn kherhe, I la ẹmwẹ vbe obọ ruẹ. I gha gbe ẹse, a i wẹ mwẹ ọbevbaru, egbe wọ mwẹ, emwi ekhue gba mwẹ egbe.

¹⁶ Emwi gha dunna mẹ kherhe, u ghi zẹ mwẹ khu zẹ vbe oduma, u ghi gha zẹ edunna, ne emwi miẹn ehe na vba mwẹ.

¹⁷ Ẹ i mwẹ u ma miẹn ọmwa ne ọ gha sẹ osẹe gbe mwẹ ne uẹn. Ohu mwẹ ne ọ muẹn ghi gha hin ukhumwu, hin ukhunmwu, u ghi gha gualọ emwi ọgbọn ne u gha ru mwẹ re ẹghẹ hia.

¹⁸ “Vbọzẹ ne u na giẹ a biẹ mwẹ yi Osanobua? Ọ te kei ne I wu vbe ọmwa rhọkpa ma he miẹn mwẹ.

¹⁹ Akpawẹ te I wa ke ẹko la uwu idin, ọ gha te gha maa, zẹ vbe ọmwa ne ọ ma rrie agbọn na hiehiere.

²⁰ Ẹ i re te ẹdagbọn mwẹ ghi ra fo na ra? Rhie obọ hin mwẹ ẹkun rre. Ne a gunmwẹ ye ẹghẹ ne ọ kẹe mẹ zọmọ.

²¹ I gha kpao wan vbe ne I i ghi na vbe dọlegbe dee. I rrie ẹvbo ne ọ vuọn ne ebiebi ke ikhiẹkhiẹ egbe.

²² Otọe ebiebi, aghọnghọn kevbe otighi. Ehe ne uwanmwẹ tobọ re na re ebiebi.”