Job 1 - Edo Bible (E Baibol Ẹdo) Version 1996

Esu Danmwẹ E Job Ghe

¹ Okpia ọkpa kegha rrọ vbe ẹvbo ne a tie ẹre Uz, a keghi tie eni okpia na e Job, ọmwa na keghi ga Osanobua, ọ kevbe guobọ ẹre ẹsẹse. Ọmwa esiesi wa gha nọ, ọ keghi gha hia ne ọ ghẹ ru emwi dan rhọkpa.

² Ọ kegha mwẹ emọ ikpia ihinrọn kevbe emọ ikhuo eha.

³ Ọ kegha mwẹ ohuan arriaisẹn ihinrọn (7,000), e kamẹl arriaisẹn eha (3,000), oghẹn ẹmila arriaisẹn (1,000) kevbe ekẹtẹkẹtẹ iyisẹn isẹn (500). Ọ kevbe gha mwẹ eguọmwadia ni bun ẹsẹse. Rẹn ọ re ọ wa gha re ọmwa ne ọ fe sẹẹ vbe odẹ Owẹn owiẹ.

⁴ Ivbi e Job ghi gha le evbare tie egbe sowa ọsegbe ọsegbe. Iran ghi vbe gha tie etẹn iran nikhuo ne iran do gu iran rri evbare.

⁵ Vbe owiẹ ne ọ ghi lele avbe ẹdẹ vberriọ, e Job ghi rhiọkpaegbe vbe owiẹ fioo, ọ ghi ya zọ ese ya họnmwẹ ivbi ẹre hia egbe ua. Emwi ne ọ ya ẹe ru ọna ọrọre wẹ rẹn rorẹe wẹ, u gha ghe, ọ defi eso unu vbọ, ọ na fi unu giẹ Osanobua.

⁶ Ọ ghi sẹ ẹdẹ ne avbe ighele ẹrinmwi do ya gha niẹn obọ vbe odaro e Nọyaẹnmwa, Esu kevbe gha rre evba vbe uwu ẹbu iran.

⁷ E Nọyaẹnmwa keghi nọ rẹn wẹẹ, “Vbe uwẹ a ke dee vbọ?” Esu keghi wanniẹn wẹẹ, “I hẹ yo hẹ rre zozo lele otọe agbọn khian.”

⁸ E Nọyaẹnmwa keghi tama rẹn wẹẹ, “U ma miẹn ọguọmwadia mwẹ ighẹ e Job, orhiọnkpa irrọ vbe uhunmwu otọe agbọn ne ọ guobọmwẹ kevbe ne ọ vbe maa zẹ vbe ọre. Ọ wa ga mwẹ, ọ keghi vbe hia vbe ẹghẹ hia ne ọ ghẹ ru orukhọ.”

⁹ Esu keghi wanniẹn wẹẹ, “E Job gha ga a ra adeghẹ ẹ i mwẹ ere ne ọ re vbọ?

¹⁰ U tan obọ gue ẹre, kevbe ẹgbẹe ọre kevbe emwi hia ne ọ mwẹ. U fiangbe emwi hia ne ọ ru. Ẹmila ne u hẹ ne ẹẹn vuọn otọe ẹvbo na hia.

¹¹ U gha miẹn ẹre emwi hia ne ọ mwẹ, u gha miẹn wẹ, ọ gha sirra gha tie ihẹn ne uẹn!”

¹² E Nọyaẹnmwa keghi tama Esu wẹẹ, “Ọ maa khekherriọ. A viọ emwi hia ne ọ mwẹ yuẹ obọ, sokpan, ghẹ kuan irẹn tobọ ọre.” Ọre Esu na kpao.

A Fuẹn Ivbi E Job Kevbe Emwi Ẹnrẹn Hia A

¹³ Ọ ghi sẹ ẹdẹ ọkpa, ivbi e Job keghi koko gha rri evbare vbe owa ọtẹn iran nọdiọn.

¹⁴ Orhiọnkpa keghi mu ulẹ bu e Job gha dee, ọ tama rẹn wẹẹ, “Ma ghi ye avbe ẹmila gua vbe ugbo, avbe ekẹtẹkẹtẹ na vbe gha rre otọe erria vbe ọkpẹn evba.

¹⁵ Avbe ivbi e Sabia keghi wa rre vbe udomwurri, iran na wa fu ehia viọ gha rrie. Iran gbele eguọmwadia ruẹ hia a, mẹ ọkpa ọ re ọ miẹn uhunmwu, ọ re I na lẹ gha dee do tama ruẹn.”

¹⁶ Te ọnii he ye guan vbe ọguọmwadia ọvbehe rre do tama rẹn wẹẹ, “Avan nukhunmwu de yan avbe ohuan kevbe avbe ọsuohuan, ọ keghi gbele iran hia a, mẹ ọkpa ọ re ọ miẹn uhunmwu, ọ re I na do tama ruẹn.”

¹⁷ Vbe irẹn ma he ye guan fo, ọguọmwadia ọvbehe keghi rre do kha wẹẹ, “Otu izigan emwa Kialdia eha keghi rre, do hẹ rhu ima. Iran keghi munọ avbe e kamẹl hia viọ gha rrie, iran gbele avbe eguọmwadia ruẹ hia, mẹ ọkpa ọre ọ ghi kẹe. Mẹ ọkpa ọ re ọ miẹn uhunmwu, ọ re I na do tama ruẹn.”

¹⁸ Vbe irẹn ma he ye guan fo ọguọmwadia ọvbehe keghi rre do kha wẹẹ, “Avbe ivbi uẹ kegha koko rri evbare vbe owa ovbi uẹ nọdiọn,

¹⁹ ẹhoho nọkhua keghi ke uwu ato hoho rre. Ọ keghi bi owa ni gbe otọ, ọ na gbele iran hia a. Mẹ ọkpa ọ re ọ miẹn uhunmwu ọ re I na do tama ruẹn.”

²⁰ Ọre Job na guakpaegbe, ọ keghi ya akhiẹ sọ ukpọn ye egbe ẹre ẹkun. Ọ khiokhio eto, ọ na de mu aro rhu otọ.

²¹ Ọ keghi kha wẹẹ, “Irhunmwirhun ọ re iye mwẹ biẹ mwẹ re, irhunmwirhun ọ re I vbe ya rrie. E Nọyaẹnmwa ọ re ọ viọ emwi ne ọmwa, e Nọyaẹnmwa ọ re ọ vbe miẹn ọmwa ẹre. Urhomwẹ nọ ne eni ẹnrẹn.”

²² Vbene emwi na hia ye sunu sẹ, e Job ma rukhọ vbe ekpa ne ọ gha na zan Osanobua.