Jerimaia 8 - Edo Bible (E Baibol Ẹdo) Version 1996

¹ “Ọ gha sẹ ẹghẹ nii, a gha vulo iran ladian vbe uwu idin ighe ugboloko avbe ọba, kevbe avbe ekhaẹmwẹ e Juda, deba ọghe avbe ohẹn kevbe avbe akhasẹ kevbe ọghe avbe emwa ọvbehe ni gha rre Jerusalẹm.

² Ne a gha na te si iran koko ne a re iran, a gha zagha ugboloko iran lele otọe zẹ vbe emwi ne a ya ye emwiokọ maa sayọ. A gha wawa iran lele otọ vbe uwu ovẹn, kevbe uki kevbe avbe orhọnmwẹ ne ọ wa yẹ avbe emwa na, kevbe ne iran vbe gha ghoo, ne iran vbe gha gualọ otọ emwi vbe obọ ẹre, kevbe ne iran gha ya uhunmwu rhanmwẹ otọ na.

³ A vbe ivbi ẹvbo dan na ni ghi miẹn uhunmwu vbọ, ni rre dọmwadẹ ehe ne I zagha iran kui, gha ho wẹ iran wu ọ re ọ maa sẹẹ ne iran gha rre agbọn, Mẹ ne Nọyaẹnmwa ne Oghodua tae nẹ.”

Orukhọ Kevbe Irrioya

⁴ E Nọyaẹnmwa keghi tama mwẹ wẹ ne I tama avbe emwa irẹn wẹẹ, “Ọmwa gha de, ẹ i ghi kpaegbe ra? Ọmwa gha bibi odẹ, ẹ i ghi werriegbe ra?

⁵ Emwa mwẹ vbọzẹ yi ne uwa na fi iyeke gbe mwẹ wa i ghi dọlegbe werriegbe? Wa rhikhan mu ẹbọ uwa, wa ma ghi dọlegbe bu mwẹ gha dee.

⁶ I wa gbe ehọ kotọ gha danmwehọ, sokpan wa ma ta ẹmwata. A ma miẹn ọkpa ne ọ vbe khiẹ ye ẹmwẹ emwi dan ne ọ ru. A ma miẹn ọkpa ne ọ, vbe nọ wẹẹ, ‘De emwi ne I baku ru?’ Dọmwadẹ ọghọe wa rhie uhunmwu da odẹ ọre zẹ vbe ẹsin ne ọ khọn rrie okuo.

⁷ Avbe olọkọmwọrhu rẹn ẹghẹ ne ọ kere ne iran ya werriegbe, avbe uhaiso kevbe ivbianumẹ rẹn ẹghẹ ne iran ya hẹ kpao, sokpan, wa ne emwa mwẹ, wa ma rẹn uhi ne I lele ya khaemwisẹ yan uwa.

⁸ Vbe uwa ra na sẹtin kha hẹ yi ighe wa wan, kevbe wẹ wa rẹn uhi mwẹ? Ghe avbe ọgbenbe ne ẹ i gia mu ẹtin yan, fi avbe uhi nii werriẹ nẹ.

⁹ A ye ekhue mu avbe umẹwaẹn uwa, ehia tighi ye iran aro, obọ vba iran. Iran hee ẹmwẹ mwẹ yotọ nẹ, de ẹwaẹn ne iran ghi mwẹ nian?

¹⁰ Rhunmwuda ọnii, I gha munọ ugbo iran ne emwa ọgbọn ọvbehe, I ghi vbe viọ amwẹ iran ne ikpia ọvbehe. Emwa hia fẹẹrẹ, ke ọ kpọlọ kevbe ọkanmwa, wa ni gha hia ne iran gha la odẹ ne ọ ma khuia khuan igho. Uhin ighe te avbe akhasẹ kevbe avbe ohẹn ghi mu emwa ni ru.

¹¹ Iran gha ru vbene a miẹn wẹ ẹwẹn avbe emwa mwẹ, emwi ne ọ bolo ọmwa egbe kẹkan nọ. Iran gha kha wẹẹ, ‘Ehia wa maa vberriọ,’ emwi ne ọ maa rhọkpa irrọọ.

¹² Wa ne emwa mwẹ, ekhue mu uwa yọ ra vbe uwa ru ẹkẹkhẹrhẹ na? Hiehiere! Ekhue ma zẹdẹ mu uwa. Wa ma kue rẹn vbene emwi gbe ọmwa egbe hẹ. Rhunmwuda ọnii, wa gha dele zẹ vbene emwa nekpa vbe dele. I gha rri uwa oya, ọnii ọ re ọ khian gha re ufomwẹ uwa. Mẹ ne Nọyaẹnmwa taa ẹe nẹ.

¹³ “Te I te ra si emwa mwẹ koko zẹ vbene ọmwa rhọ emwiokọ ẹre si koko, sokpan, iran yevbe azara ne ọ ma mọ ọmọ, kevbe erhan ohọ ne ọ ma mọ, uhin ighẹ ebe ni rrọ luẹluẹ nẹ. Rhunmwuda ọnii, I keghi fan obọ ẹre ne avbe ọrriọvbe ya otọe nii khian ọghe iran.”

¹⁴ Emwa Osanobua keghi nọ wẹẹ, “Vbọzẹ ne ima na tota hẹkpẹẹ yi? Wa larre, wa gie ima lẹ gha rrie avbe ẹvbo ne a gbe odin gaa nii, ne ima ya wulo vbe odọ. Osanobua bu ohiẹn uwu gbe ima nẹ, ọ mu eruan ne ima wọn ne, rhunmwuda ne ima na ru orukhọ ghe ẹre.

¹⁵ Wa rhie aro ye odẹ gha khẹ ọfumwegbe kevbe ẹghẹ amu ọmwa egbe rran, erhọkpa ma dunna, sokpan emwi ohan nọkhua ọ re ọ rre ye ihe ẹre.

¹⁶ Avbe eghian ima sẹẹ ore Dan nẹ, ma họn vbe ẹsin iran hiọnrọn. Ẹvbo ni hia ọ re ọ mu rueghe vbe ẹsin iran a tu. Eghian ima rre nẹ, ne iran do rhia otọ ima kevbe emwi ni rrọọ hia a, ore ẹvbo mwa kevbe emwa ni rrọọ.”

¹⁷ E Nọyaẹnmwa khare wẹẹ, “Wa gbe aro kotọ, I ra viọ ẹyẹn ku uwu ẹbu uwa, avbe ẹyẹn ni mwẹ obi, ne ẹ i gia vbe ta ẹre ohun, iran gha salọ uwa.”

E Jerimaia Khiẹ Emwa Rẹn

¹⁸ Akhiẹ mwẹ i mwẹ ukhunmwu I khuọnmwi emianmwẹ udu.

¹⁹ Wa danmwehọ! I họẹn vbe emwa mwẹ wa go vbe otọe na hia. I họn vbe emwa mwẹ wa go ladian wẹẹ, “E Nọyaẹnmwa i ghi rre Zaiọn ra? Ọba e Zaiọn I ghi rre evba ra?” E Nọyaẹnmwa ne ọba keghi wanniẹn wẹẹ, “Vbọzẹ ne uwa na ye ohu mu mwẹ rhunmwuda ẹbọ uwa ne uwa ga? Kevbe ne uwa na ya uhunmwu rhanmwẹ otọ ne ẹbọ ẹrrẹe ne ẹ i mwẹ esa.”

²⁰ Emwa ni keghi datu wẹẹ, “Ukhunmwu rrie, ẹghẹ emwiorhọ gberra, a ma ye miẹn mwa fan.”

²¹ A guọghọ mwẹ ogiudu ua rhunmwuda a guọghọ emwa mwẹ uan te I ghi khiẹ, ehia yan mwẹ unu uan.

²² Ukhunmwu ighi rre Giliad ra? Avbe ọbo i ghi rre evba ra? Vbọ ghi zẹ ne a ma na ye mu avbe emwa mwẹ egbe rran khekherriọ?