Jerimaia 7 - Edo Bible (E Baibol Ẹdo) Version 1996

E Jerimaia Kporhu Vbe Ọgua Osa

^1-3 E Nọyaẹnmwa keghi gie mwẹ gha rrie onurho Ọgua Osa, ehe ne ivbi Izrẹl na la owa ya gha ga. Ọ keghi tama mwẹ wẹ ne I mudia vbe evba ne I ta emwi ne Nọyaẹnmwa ne Oghodua ne Osanobua ọghe Izrẹl ra tama iran wẹẹ, “Wa fi vbene uwa yin hẹ werriẹ kevbe emwi ne uwa ru, I gha gie uwa ye gha yin emwa na khian.

⁴ Wa dobọ ẹmwẹ ne uwa ya rẹrẹ egbe nii yi, ne uwa na kha wẹẹ, ‘Emwi rhọkpa i ra ru mwa! Ọgua Osa e Nọyaẹnmwa ọ re ọna khin, Ọgua Osa ọghe Nọyaẹnmwa ọ re ọna khin, Ọgua Osa ọghe Nọyaẹnmwa ọ re ọna khian!’

⁵ Wa fi vbene uwa ya yin hẹ werriẹ ne uwa vbe dobọ emwi ne uwa ru yi. Wa ghi gha yin da egbe ẹse.

⁶ Wa ghẹ ghi zẹ ebubẹ ye avbe erriọvbe aro kevbe avbe emọ ni i mwẹ erha kevbe ẹgbẹe. Wa dobọ emwa ni ma rukhọ ne a gbele yi vbe otọe na. Wa dobọ avbe ẹbọ ọvbehe ne uwa ga yi, te ọnii ra miẹn uwa uhunmwu.

⁷ Wa gha fiwerriẹ, I gha gie uwa gha rre otọe na ne I mu ne avbe erha uwa odede ne ọ gha re ọghe iran ẹdẹdẹmwẹdẹ.

⁸ Ghe, ẹmwẹ erẹrẹ ọ re uwa mu ẹtin yan.

⁹ Wa rha, wa do izigha, wa ghẹ, wa vẹn ihẹn re, wa zọ ese ghe Baal, wa keghi vbe gho ẹbọ ne uwa ma ka rẹn de yi.

¹⁰ Wa ru avbe emwi na ne ẹ i yẹ mwẹ, wa ghi vbe do gha mudia ye odaro mwẹ, vbe uwu ọgua Osa mwẹ, wa ghi vbe gha kha wẹẹ, ‘Ma rrọ vbe ai mwẹ ẹbe!’

¹¹ Te uwa ro ighe Ọgua Osa mwẹ, ehe ne avbe izigan lẹre yi nọ ra? I bẹghe emwi ne uwa ru nẹ.

¹² “Wa gha rrie Siailo, ehe ne I ka gha zẹ wẹ evba ọ re a gha na gha ga mwẹ ne u wa ya ghe emwi ne I ya ẹe khian rhunmwuda orukhọ ivbi Izrẹl ne emwa mwẹ.

¹³ Wa ru avbe orukhọ na hia ne, a gha rhe miẹn wẹ te I gha gu uwa guan kugba kẹghẹrẹ, wa ma danmwehọ. I tie uwa wa ma khuẹnniẹn.

¹⁴ Rhunmwuda ọnii, emwi ni ya Siailo khian, ọ re I ra ya Ọgua Osa mwẹ na ne uwa mu ẹtin ya khian.

¹⁵ I gha khulo uwa hin odaro mwẹ rre, zẹ vbe ne I vbe khulo avbe etẹn uwa ladian ighe ivbi Izrẹl. Mẹ ne Nọyaẹnmwa ọ re ọ tae.”

Iyin Ehọ Avbe Emwa Ni

¹⁶ E Nọyaẹnmwa keghi kha wẹẹ, “Jerimaia, ghẹ na erhunmwu ne iran na, ghẹ viẹ ra ne u na erhunmwu ne iran, ghẹ rinmwian mwẹ rhunmwuda, mẹ i ra zẹ ye uẹ ẹre.

¹⁷ Wa ma bẹghe emwi ne iran ru vbe Juda kevbe ore Jerusalẹm ra?

¹⁸ Avbe ibiẹka ghi ya ho erhan rre, avbe ikpia ni wan nẹ ghi hie erhẹn, avbe ikhuo ni rrọ ghi gbe irhuarhua ne iran ya fian eka ne ẹbọ ne iran tie ẹre Oloi Ẹrinmwi, iran ghi vbe sa ayọn ne avbe ẹbọ ọvbehe, ne iran miẹn ehe na ya mwẹ mu ohu.

¹⁹ Sokpan mẹ ọ re iran gele ye ohu mu ra. Ẹn o, egbe iran ọ re iran ru khọ, iran na vbe gha fa egbe iran an.

²⁰ Rhunmwuda ọnii, mẹ ne Nọyaẹnmwa ne Udazi gha gie ohu mwẹ ne ọ mwẹ ọghae hihiẹn yan Ọgua Osa na. I gha hihiẹ ọe yan emwa nagbọn kevbe avbe aranmwẹ oha, uhin ya sẹ egbe erhan kevbe emwiokọ. Te ohu mwẹ ra ye vbe erhẹn na i miẹn ọmwa ne ọ gha sẹtin dọ ẹre yọ.

²¹ “Wa ne emwa mwẹ, wa giẹn ese uwa eso ua fẹẹrẹ vbe Ogiukpo, a ghi vbe fan obọ ẹre ne uwa, ne uwa ya rri eso vbọ, sokpan, emwi ne imẹ ne Nọyaẹnmwa khare ọrọre wẹ, wa sẹtin wa rri ehia fẹẹrẹ.

²² Ẹghẹ ne I na viọ avbe erha uwa odede ke Igipt ladian, I ma yi iyi ma iran vbekpa ese ne a giẹn uan ra ese ọvbehe ne ọ rhirhi a gha khin.

²³ Sokpan, I wa tama iran wẹ ne iran gha họn ẹmwẹ mẹ, ne I miẹn ehe na gha ru Osanobua iran, kevbe ne iran vbe gha re emwa mwẹ. I keghi vbe tama iran wẹ ne iran gha ru vbene I tama iran, ne emwi miẹn ehe na gha dunna ne iran.

²⁴ Sokpan, iran ma họn, iran ma kue vbe zẹ yọ, sokpan, emwi ne ekhọe izevbudu kevbe ekhọe dan ne iran mwẹ tama iran, ọ re iran ru.

²⁵ Ke ẹdẹ ne erha uwa ke Igipt ladian gha dee do sẹ ẹdẹnẹrẹ na, te I gha gie avbe eguọmwadia mwẹ ighe avbe akhasẹ gie uwa.

²⁶ Sevba ọmwa ne ọ zẹyọ ra ne ọ vbe danmwehọ I rrọọ, sokpan, wa keghi do ze vbe, udu wa keghi vbe sọtẹ sẹẹ avbe erha uwa odede.

²⁷ “Rhunmwudọnii nian Jerimaia, u ghi ta avbe ẹmwẹ na ma avbe emwa mwẹ, sokpan, iran i ra danmwehọ ruẹ. u gha tie iran sokpan, iran i ra khuẹnniẹn.

²⁸ U ghi tama iran wẹ, uhunmwu ẹvbo iran i họn ẹmwẹ mẹ, mẹ ne Nọyaẹnmwa ne Osanobua iran, ra ne oya ne a rri iran re vbe gha rhie ẹwaẹn ne iran. A ye ekhọe ga wu nẹ. A i ghi dọlegbe guan kan rẹn ọvbehe.

Uyinmwẹ Orukhọ Vbe Iya E Hinọm

²⁹ Ivbi e Jerusalẹm, wa gha khiẹ, wa zẹ eto uwa hẹ kua, wa ya so ihuan orinmwi vbe uhunmwu oke rhunmwuda, ohu mu imẹ ne Nọyaẹnmwa I keghi vbe he avbe emwa mwẹ.

³⁰ “Ivbi e Juda ru emwi dan ọkpa, iran ya viọ amazẹ iran ne ọ sọnnọ mwẹ ye uwu Ọgua Osa mwẹ, iran keghi mu awua yọ.

³¹ Iran ma Ogiukpo okpa ne iran tie ẹre Tofẹt ye Iya Hinọm, ne iran miẹn ehe na gha ya ivbi iran nikpia ke nikhuo zọ ese vbe erhẹn. I ma gie iran ru emwi na, ọ ma vbe zẹdẹ gha rrọ mwẹ ekhọe hiehiere.

³² Rhunmwuda ọnii, ẹghẹ dee ne ai ghi ra ye gha tie ẹre Tofẹt ra Iya Hinọm sokpan Iya Ugbelemwẹ. Iran gha ya gha re orinmwi ye evba, rhunmwuda, ehe ọvbehe i ghi ra gha rrọ ne a gha re iran yi.

³³ Ikun iran ghi gha re evbare ne avbe ahianmwẹ kevbe avbe aranmwẹ oha, ai ra vbe miẹn ọmwa ne ọ gha khulo iran hinrre.

³⁴ Otọe nii gha khian ato. I gha dobọ urhu oghọghọ kevbe ọyẹnmwẹ yi vbe avbe okpẹvbo e Juda kevbe ore Jerusalẹm, deba uwemwẹ oghọghọ ọghe evbare irhiọha.”