Jerimaia 6 - Edo Bible (E Baibol Ẹdo) Version 1996

Eghian Lẹga Jerusalẹm

¹ Uvbi e Bẹnjamin, wa lẹ ne uwa rhie uhunmwu hin ẹbe rre! Wa lẹ ladian vbe Jerusalẹm! Wa kpe okpe vbe Tẹkoa, ne uwa hie erhẹn orhiema ye Bẹt-Hake-rẹm, ọkhọ kevbe omurhia ra ke odẹ okuọ gha dee.

² Ore nọkhua ighe Zaiọn wa mose sokpan a gha dunmwu ẹẹn ruan.

³ Avbe ọba gha bu agọ ye evba deba ivbiyokuo iran. Iran gha bọlọ owa ukpọn iran ga ẹvbo nii, dọmwadẹ ọghọe vbe uwu iran gha hu agọ ye ehe ne ọ khọnrẹn.

⁴ Iran gha kha wẹẹ, “Wa mu egbe ne a dekun e Jerusalẹm. Wa mu egbe! Ma gha dunmwu ẹẹn vbe ogiavan!” Sokpan, iran gha vbe kha wẹẹ, “Ọ kpee gbe nẹ, te ẹdẹ ghi ra mu, te aghọnghọn ota ghi wa tan.

⁵ Asọn ma gha ya dekun ẹnrẹn, ma gha dunmwu owa ẹvbo ni hia a.”

⁶ E Nọyaẹnmwa ne Oghodua tama avbe ọba nẹ wẹ ne iran gia erhan gbotọ, ne iran ma utete, ne iran miẹn ehe na khọn la Jerusalẹm. Rẹn kha ne wẹẹ, “I gha rria okpẹvbo nii ikhi rhunmwuda a wọ emwa uhunmwu wa rrọọ.

⁷ Zẹ vbene uhae ya amẹ ọnrẹn ru ọgbọngbọn, erriọ ọ re Jerusalẹm ye orukhọ ẹre ru ọgbọngbọn. I họn ẹmwẹ ọkhọ ọfuan vbe ore ẹvbo nii. Emianmwẹ kevbe ẹwẹn okpa ọ re I bẹghe vbọ.

⁸ Ivbi e Jerusalẹm, wa gie avbe ọlọghọmwa na gha bu uwa ude, ne I ghẹ ya he uwa yotọ, I ghi ya ore ẹvbo rua khian ato, ehe ne ọmwarhọkpa i yin.”

Izrẹl Ni Sọtẹ

⁹ E Nọyaẹnmwa ne Oghodua keghi tama mwẹ wẹẹ, “A gha bannọ Izrẹl ua fo zẹ vbe azara ne a kọlọ ọmọ rẹn fo nẹ fẹẹrẹ. Rhunmwuda ọnii nian, wa dẹlẹ inu ne ẹtin uwa gha sẹ vbọ werriegbe vbe uwu avbe emwa nii vbene ẹghẹ na he ye rrọ na.”

¹⁰ Mẹ keghi wanniẹn wẹẹ, “Deghẹ mẹ gu iran guan, I na gha bu iran ude, gha ọ ra danmwehọ mwẹ yi? Iran ze vbe udu, iran he ne iran danmwehọ uhunmwu ne u gie, iran ghi gha giẹ ye ẹmwẹ ne u wẹ ne I tama iran.

¹¹ Ohu iran ne ọ mu ẹẹn wa vbe giẹn vbe erhẹn vbe uwu ime, Nọyaẹnmwa, I i ghi sẹtin zin ẹnrẹn ọvbehe.” Ẹre Nọyaẹnmwa na tama mwẹ wẹẹ, “Hihiẹ ohu mwẹ yan avbe ibiẹka vbe adesẹ ore, kevbe ye ehe ne avbe igbama na si koko. A gha viọ avbe ọdọ kevbe avbe amwẹ kpao, a i ra vbe sẹ avbe ọmaẹn rae.

¹² “A gha viọ owa iran ne emwa ọvbehe, erriọ ọre a ra vbe ru ugbo iran kevbe amwẹ iran. Te I ra wa rri emwa ni rre otọe na oya.

¹³ Emwa hia fẹẹrẹ, ọkpọlọ kevbe ọ kanmwa, wa la odẹ ne ọ ma khuia gualọ igho. Uhin ighẹ te avbe akhasẹ kevbe avbe ohẹn ghi mu emwa ni ru.

¹⁴ Iran gha ru vbene a miẹn wẹ ẹwẹn avbe emwa mwẹ, emwi ne ọ bolo ọmwa egbe kẹkan nọ. Iran gha kha wẹ ehia wa maa, vberriọ emwi ne ọ maa rhọkpa i rrọọ.

¹⁵ Te ekhue ghi mu iran ra rhunmwuda ẹkẹkhẹrhẹ ne iran ru? Hiehiere, ekhue ma zẹdẹ mu iran. Iran ma rẹn vbene emwi gbe ọmwa egbe hẹ. Rhunmwuda ọnii, iran gha dele, zẹ vbene emwa ọvbehe ka vbe dele yi evba nii ọ re ọ ghi ra gha re ufomwẹ iran. Mẹ ne Nọyaẹnmwa taa ẹe nẹ.”

Izrẹl He odẹ Osanobua

¹⁶ E Nọyaẹnmwa tama emwa rẹn wẹẹ, “Wa mudia ye ada ne uwa rhie aro yotọ. Wa nọ ehe ne avbe odẹ nẹdẹ ye kevbe avbe odẹ ni maa sẹẹ nii. Wa gha la ẹe, wa gha vbe gha rre ọfumwegbe.” Sokpan, iran khare wẹẹ, “Ẹn o, ma i ru vberriọ.

¹⁷ Ẹre Nọyaẹnmwa na zẹ avbe abodẹ ne iran gha ra ehọ vbene okpe ne a kpe kha hẹ.” Sokpan iran keghi kha wẹẹ, “Ma i ra ehọ emwi rhọkpa.”

¹⁸ Rhunmwuda ọnii, e Nọyaẹnmwa keghi kha wẹẹ, “Wa danmwehọ, wa ne avbe uhunmwu ẹvbo, ne uwa ruẹ ẹwaẹn vbe emwi ne ọ ra sunu vbe egbe emwa mwẹ.

¹⁹ Otọ agbọn, danmwehọ! Zẹ vbe emwi ne I ra ya rria iran ikhi ye uma ne iran si, I ra gie ọkhọ rruan iran na, rhunmwuda, iran he iruemwi mwẹ yotọ, iran ma vbe ya ẹmwẹ mwẹ ru emwi.

²⁰ De emwi ne iran wẹ I ya eturari ne iran viọ ke Siẹba rre ru yi ra avbe emwi ne ọ winhin ne iran viọ ke urria rre? Mẹ i ra rhan obọ miẹn emwi ihaoko iran ra ne izọ ese iran gha yẹ mwẹ.

²¹ Rhunmwuda ọnii, I gha gie iran na rrua owẹ ne iran dele. Erha kevbe avbe emọ gha wulo, erriọ vbe nọ ne avbe ọse kevbe ẹdogbo.”

Okuo Ne Ọ Ke Odẹ Okuọ Rre

²² E Nọyaẹnmwa khare wẹẹ, “Emwa ke ẹvbo ne ọ rre odẹ okuọ dee, uhunmwu ẹvbo nọkhua okpa ne ọ mwẹ ẹtin gha mu egbe okuo.

²³ Iran viọ uhanbọ kevbe umozo iran nẹ, emwa ni mwẹ ekhọe ne ọ rri kevbe ne ẹ i mwẹ itohan ọre iran khin. Urhu iran yevbe ọghe okun ne ọ davan vbe iran hin ẹsin iran khian. Iran mu egbe ne iran ya khọn e Jerusalẹm.”

²⁴ Ivbi e Jerusalẹm keghi kha wẹẹ, “Ma họn ẹmwẹ na nẹ, obọ mwa keghi luẹluẹ ye ima egbe, akhiẹ kevbe obalọ hihiẹ yan mwa, zẹvbe okhuo ne emwi ubi-ẹmwẹ ru.

²⁵ Ohan i ghi gie ima khian ladian hin adesẹ ore ẹvbo rre, ra ne a khian lele ukpo, rhunmwuda, te avbe eghian mwa viọ emwi igbinna mwẹ, ohan rre ehe hia lẹga mwa.”

²⁶ E Nọyaẹnmwa khama emwa rẹn wẹẹ, “Wa viọ ukpọn akhiẹ ye egbe ne uwa gha wunnu vbe uwu emuẹn, wa ye ameve ne ọ rriara khiẹ zẹ vbe ne ọmwa gha khiẹ ukpọmọkpa, rhunmwuda emwa ne ọ ra do fuẹn uwa a gha dekun uwa vbe amaro amakọ.

²⁷ E Jerimaia, danmwẹ emwa mwẹ ghe zẹ vbene u gha danmwẹ ematọn ghe ne u gualọ vbene iran ye hẹ miẹn.

²⁸ Etẹ ni zevbudu ọ re iran khin, iran ye gbain zẹvbe ne oze kevbe ematọn ye. Te iran hia kẹkẹ ua, iran ghi gha va ẹlẹ khian, iran ghi gha na iyẹn ẹrrẹe.

²⁹ Erhẹn nii wa baa gidigidi sokpan, avbe odan ni kulo nẹ i ranran ne iran siẹn kua. Ẹ i zẹdẹ mwẹ esa ne a ye gha dọlọ avbe emwa mwẹ yi, rhunmwuda, a ma he ye viọ emwa dan ni rrọ kpao.

³⁰ Ikpakpa erhan ne ẹ i mwẹ vbe ọ gia ya ru ọ re iran khin rhunmwuda, mẹ ne Nọyaẹnmwa he iran yotọ nẹ.”