Jerimaia 52 - Edo Bible (E Baibol Ẹdo) Version 1996

Udemwẹ E Jerusalẹm

¹ Ọmọ ukpo ọkpayanugie ọ re Zedekaia gha ye vbe ọ rriọba vbe Juda, ọ keghi ya ukpo owọrọ vbe ẹkete vbe Jerusalẹm. A keghi tie eni iye ẹẹ Hamutal ovbi okpia ne a tie ẹre Jerimaia ne ọ gha rre ẹvbo ne a tie ẹre Libna.

² E Zedekaia ne ọba keghi rukhọ ghe Nọyaẹnmwa zẹ vbene ọba Jehoiakim vbe ru.

³ Ohu ivbi e Juda kevbe ivbi e Jerusalẹm keghi mu e Nọyaẹnmwa sẹrriọ wẹ ọ keghi viọ iran hin ehe ne irẹn ye rre. E Zedekaia keghi sọtẹ ọba e Babilọn ighẹ Nebukiadneza.

⁴ Ẹre Nebukiadneza na rhunmwuda ọnii viọ avbe ivbiyokuo ẹre hia rre, ọ na dekun e Jerusalẹm vbe ikpẹdẹ ne ogigbe ọghe uki nogigbe ọghe ukpo nogihinrin ne Zedekaia yae vbe ọba. Iran keghi bu agọ ye vbe a ma he la ẹvbo nii, iran ke ghi, ghae ga ẹvbo nii.

⁵ Iran keghi mudia viọ aro igbinna da ẹre ọ te do sẹ ukpo ne ogiowọrọ ne Zedekaia yae vbe ọba.

⁶ Ọ ghi rre ikpẹdẹ ne ogihinrin ọghe uki ne ogienẹ ọghe ukpo ne a kha na, vbe a ghi miẹn wẹ ohanmwẹ wegbe sẹ vberriọ wẹ emwa ma ghi miẹn evbare re.

⁷ A keghi guọghọ ekẹn ẹvbo nii gberra. A gha rhe miẹn wẹ te ivbi e Babilọn ghae ga ẹvbo ni, avbe ivbiyokuo ni rrọọ keghi lẹẹ kua vbe asọn. Iran keghi la odẹ ogba ọha ladian iran na la onurho ne ọ rre ehe ne ekẹn eva na vba egbe, iran na lẹ ghe odẹ Iya e Jọdan.

⁸ Sokpan ivbiyokuo e Babilọn keghi zẹẹ Ọba Zedekaia khu, iran na mu ẹẹn vbe otọe ne ọ rriẹe ne ọ rre ọkpẹn e jẹriko, ivbiyokuo ẹre hia keghi lẹ sẹ ọe rae.

⁹ Iran keghi mu Ọba Zedekaia bu Ọba Nebukiadneza, ne ọ gha rre Ribla vbe otọe Hamat, evba ọ re Nebukiadneza na bu ohiẹn ọnrẹn.

¹⁰ Vbe Ribla, rẹn keghi gbele ivbi e Zedekaia a vbene Zedekaia na wa ghe ẹre, ọ na vbe wẹ ne iran giagia iran uhunmwu kua ighẹ avbe ekhaẹmwẹ e Juda.

¹¹ Vbe iyekọni, ọ na wẹ ne iran wọlọ e Zedekaia aro kua, a na ye ọgiọrọ rrọ ẹre mu gha rrie Babilọn. Uwu eghan ọ re Zedekaia gha ye ọ te do sẹ ẹdẹ ne ọ wu.

Uguọghomwẹ Ọgua Osa

¹² Vbe ikpẹdẹ ne ogigbe ọghe uki ne ogisẹn vbe ọ rre ukpo okpa irrọvbugie ne Ọba Nebukiadneza rriọba e Babilọn, e Nebuzaradan ne arowa ivbiyokuo ẹre kevbe ne ọ gue ẹe zẹ iro keghi la ore Jerusalẹm.

¹³ Ọ keghi giẹẹn Ọgua Osa sẹ otọ deba owa emwa ni hin usi hia ni rre Jerusalẹm.

¹⁴ Avbe ivbiyokuo ẹre keghi guọghọ ekẹn ne a gbe lẹga ẹre sotọ.

¹⁵ Ẹre Nebukiadneza na viọ emwa ni ghi kẹe vbe ore ẹvbo nii oghunmwu gha rrie Babilọn. Emwa ni te kẹe vbe ore, avbe iran ni kere vbe avbe owinna ni guẹ emwi deba avbe emwa ni lẹ kua bu ivbi e Babilọn gha khian.

¹⁶ Sokpan, ọ keghi sẹ eso vbe uwu iran ni ghi ru ivbiogue sẹẹ rae ye Juda, avbe emwa ne ẹ i mwẹ emwirhọkpa, ọ keghi viọ iran ya gha winna vbe uwu ogba azara kevbe ugbo.

¹⁷ Ivbi e Babilọn keghi guọghọ avbe orre kevbe ikẹkẹ okhuae ẹrọnmwọ ni rre Ọgua Osa deba avbe ẹgbẹdin ne lẹulẹu ọghe ẹrọnmwọ, iran na viọ ẹrọnmwọ nii hia gha rrie Babilọn.

¹⁸ Iran kevbe viọ Ọsọbiri kevbe emwi ne a ya hẹ emuẹn, ne a ya kpolo Ogiukpo huan, kevbe avbe emwi ne a ya dọlọ ukpa yi, avbe ọkpan ne a da esagiẹn avbe emwi ne a ya zọ ese yi, avbe ọkpan ne a ya giẹn eturari, kevbe avbe emwi ẹrọnmwọ ne a ghi ya ru emwi hia vbe ẹghẹ ugamwẹ vbe Ọgua Osa.

¹⁹ Iran keghi vbe viọ avbe emwi hia ne a ye esiliva kevbe igoru ru, avbe ọkpan negiẹrẹ, avbe uyẹngbe ne a wan erhẹn yi, avbe ọkpan na a da esagiẹn emwi ne a ya zọ ese yi, avbe emwi ne a ya hẹ emuẹn avbe erhan ọmukpa, avbe ọkpan eturari, kevbe avbe ọkpan ne a ya hihiẹ ayọn imuohan kua.

²⁰ Avbe emwi ẹrọnmwọ hia ne Solomọn ne ọba ru ye Ọgua Osa, avbe orre eveva, avbe ikẹkẹ okhuae, avbe ẹgbẹdin ne lẹulẹu deba avbe ẹkhuia ẹmila iweva ni mu ẹẹn mwẹ, iran keghi re ne ọkhua gbe, ẹ i gie mwa.

^21-22 Umwọmwẹ ọ re avbe orre eveva na gha khin, eveva kegha re ibata ehairrọvbọgban vbe uyomwẹ kevbe ibata evairrọvbugie vbe ọlẹga. Te uvun la uwu ẹre. Umwẹimimwẹ ọghe ematọn ọlẹga ẹre kegha re akhuẹn ikpinhianbọ eha. Vbe odukhunmwu orre ọkpọkpa, a keghi vbe mu orre ne ọ ma digba gbe yan rẹn, uyomwẹ ọnrẹn kegha re ibata ihinrọn vbe ukhiọnmwẹ, a keghi vbe gbẹnnẹ iran egbe hia, a keghi vbe ya okuta erọnmwọ tee ehe ne a gbẹnnẹ vbọ nii, ena hia okuta ẹrọnmwọ ọ re a vbe ya ru iran.

²³ Vbe dọmwadẹ ehe ne a gbẹnnẹ vbe orre nii, okuta ẹrọnmwọ iyisẹn kegha rrọ, a keghi ke otọe bẹghe enẹirrọvbiyisẹn vbọ.

A Viọ Ivbi E Juda Gha rrie Babilọn

²⁴ Vbe deba ena, e Nebuzaradan ne arowa ivbiyokuo keghi viọ avbe Seraia ne Ogie Ohẹn, e Zẹfanaia ne ohẹn ne ọ zẹ diake ẹe, kevbe iran kpataki vbe uwu iran ni rre asẹ vbe Ọgua Osa, oghunmwu gha rrie.

²⁵ Vbe uwu avbe emwa ni rre ẹvbo nii, ọ keghi munọ avbe arowa ne ọ gha kha yan ivbiyokuo, ihinrọn vbe uwu iran ni ghi dekẹe vbe avbe iguọbaziro, ọmwa ne ọ zẹ diake arowa ivbiyokuo, ne ọ vbe re ne ọ sin avbe ẹmwẹ ivbiyokuo ẹro, deba avbe adazẹ iyeha.

²⁶ E Nebuzaradan keghi viọ iran gie ọba e Babilọn vbe ọ rre ore ẹvbo e Ribla.

²⁷ Vbe otọe Hamat. Iran ghi sẹ evba, ọba na wẹ ne a mama iran, ọ na gbele iran an. Erriọ ọ re a na miẹn wẹ a viọ ivbi e Juda hin otọe iran rre gha rrie iwe.

²⁸ Vbenian a gbẹnnẹ ẹmwẹ emwa ne Nebukiadneza viọ kpao zẹ vbe oleghan: ọ ghi rre ukpo ihinrọn ne ọ rriọba, ọ keghi viọ arhin ehayan ugie ọ ya yan arriaisẹn eha (3,023) kpao.

²⁹ Vbe ukpo evairrọvbugie ne ọ rriọba, ọ keghi viọ arhin evayan ọgban yan arriaenẹ (832) kpao vbe Jerusalẹm.

³⁰ Ọ ghi rre ukpo ehayan ugie, arhin isẹn yan ikiọkhọ yan arriaeha (745) ne Nebuzaradan viọ kpao. Ehia keghi do gha re arraeha yan arriaisẹn enẹ (4,600).

³¹ Vbe ukpo ne Ivomẹrodak rriọba e Babilọn, ọ keghi ru ọba Jehoiakin ọghe Juda ẹse, ọ na fan ẹẹn hin ẹwẹdọ rre. Ọna ke gha re vbe ikpẹdẹ isẹn yan ugie ọghe uki ne ogiweva vbe ukpo ne ogba vbe ihinrọn yan ọgban ne a mu e Jehoiakin oghunmwu kpao.

³² Ivomẹrodak ke wa gha ye obọ esi mu ẹẹn, ọ keghi rhie ẹre ye ukpo uyi ne ọ yo sẹẹ ọghe avbe ọba ọvbehe hia ni vbe gu irẹn rre iwe vbe Babilọn.

³³ A keghi gie Jehoiakin bannọ ẹwu oleghan rẹn kua, kevbe ne ọ do gha rri evbare vbe eteburu ọghe ọba vbe ẹdagbọn rẹn ni ghi dekẹe hia.

³⁴ Inu ẹghẹ ne ọ ghi ya vbe agbọn, a keghi gha rhie igho ne ọ gha sẹ ọe lo ya dẹlẹ emwi ne ọ ho ne ẹẹn vbe ẹghẹ ne ọ kei yi.