Jerimaia 51 - Edo Bible (E Baibol Ẹdo) Version 1996

Orhiete Ibuohiẹn E Babilọn

¹ E Nọyaẹnmwa khare wẹẹ, “I ra gie ẹhoho omurhia gie Babilọn kevbe emwa ẹnrẹn.

² I gha gie avbe orhunmwuyẹn ne iran ya mu e Babilọn rhia, zẹ vbe ẹhoho ne ọ kpolo ebe ne ọ kakae kua. Ẹdẹ omurhia gha rre, iran gha dekun ẹnrẹn vbe igienenẹ, iran ghi ya ẹe khian otọe ne ọ dihoi rua.

³ Ghẹ rhie ẹghẹ ne ivbiyokuo ẹre ya viọ ẹwu igbinna iran yọ, ra ne iran fi ifẹnmwẹ iran. Ghẹ fi yi vbe avbe igbama rẹn hiehiere! Wa fuẹn ivbiyokuo iran an fẹẹrẹ.

⁴ “Obọ gha vba iran, iran ghi vbe wulo ye adesẹ ore ẹvbo iran.

⁵ Mẹ ne Nọyaẹnmwa ne Osanobua Izrẹl, ma fi iyeke gbe Izrẹl kevbe Juda, a gha rhe miẹn wẹ iran ru orukhọ ghe imẹ ne Nọhuanrẹn Izrẹl.

⁶ Wa lẹ ladian vbe Babilọn! Wa lẹ rhie uhunmwu hin ẹbe rre! Wa ghẹ gie a gbele uwa ye orukhọ e Babilọn. Te imẹ rria ẹre ikhi na, I ra vbe rri ọre oya ne ọ ma ẹẹn.

⁷ “Te Babilọn te ye vbe ukpu igoru vbe obọ mwẹ, ọ kegha ya ayọn ne otọ agbọn hia da ne ọ gha gbe iran. Avbe uhunmwu ẹvbo da ayọn rẹn, ẹrherhe iran keghi kulo.

⁸ E Babilọn de udemwẹ udomwurri, ọ keghi rẹnkhẹn uan. Wa khiẹ ọre! Wa gualọ ukhunmwu rhie ye ọre ẹwẹn, u gha ghe, ọ gha rrie.

⁹ Avbe orhunmwuyẹn ni rre evba khare wẹẹ, ‘Ma te ra ye Babilọn obọ, sokpan, ẹghẹ la nẹ. Wa gie ima kpao nian ne a gha rrie owa. Osanobua ya ẹtin ẹnrẹn hia rrii e Babilọn oya, ọ vbe fuẹn ọnrẹn uan fẹẹrẹ.’ ”

¹⁰ E Nọyaẹnmwa khare wẹẹ, “Emwa mwẹ gha wee, iran wẹẹ, ‘E Nọyaẹnmwa rhie ma ighẹ ma ọ re ọ rri ase. Wa gia gha rrie Jerusalẹm ne a ya tama iran emwi ne Nọyaẹnmwa ne Osanobua mwa ru.’ ”

¹¹ E Nọyaẹnmwa bọọ avbe ọba e Midia yọ rhunmwuda, ọ ho ne ọ fuẹn e Babilọn ruan. Erriọ ọ re ọ ra ya rria ikhi ye ẹmwẹ Ọgua Osa ọghọe ne iran guọghọ ua. Arowa avbe ivbiyokuo ni ra do gbinna tama iran wẹẹ, “Wa zẹ ifẹnmwẹ uwa ukpẹ! Wa viọ asa uwa mwẹ.

¹² Wa tama iran ne iran dekun ekẹn e Babilọn. Wa viọ ẹvbo ba iran ni ba odẹ, wa gie iran ni khẹ odẹ gha khian, wa gie emwa ni gha lẹre gbakhẹ iran vbe odẹ.” E Nọyaẹnmwa ru emwi ne ọ wẹ rẹn gha ru ivbi e Babilọn re nẹ.

¹³ Ẹvbo nii mwẹ ẹzẹ ni bun kevbe emwi ẹfe nibun, sokpan, ẹdẹ ọre gba nẹ. A fian irri uwa ẹre fua nẹ.

¹⁴ Nọyaẹnmwa ne Oghodua ọ re ọ tobọ ẹre ya arrọọ irẹn tobọ ẹre vẹn ihẹn wẹ, rẹn gha viọ emwa nibun rre ne iran do gu e Babilọn gbinna zẹ vbe irhiso, iran gha vbe we uwemwẹ akhọnmiotọ.

Ihuan Urhomwẹ Ghe Osanobua

¹⁵ E Nọyaẹnmwa ọ re ọ ya ẹtin ẹnrẹn yii otọe, ẹwaẹn ẹnrẹn ọ re ọ ya yii agbọn, ọ kevbe rhaan aro iso ne ọ vbẹ.

¹⁶ Ọ gu amẹ ne ọ rre odukhunmwu iso guan, ọ kegha davan. Ọ si amẹ koko ke ehe ne agbọn sẹẹ gha dee ọ ye ayan yan ke uwu amẹ ne ọ rhọ, ọ keghi gie okpẹhoho ke uwa aza ọghọe ladian.

¹⁷ Emwa nagbọn gha miẹn ọna iran ghi khian akpa ne ẹ i mwẹ ẹwaẹn. Iran ni mannọ amazẹ ghi khian ne egbe fu rhunmwuda, ẹbọ ne iran ma ẹẹn, ohoghe nọ, ẹ i vbe mwẹ arrọọ.

¹⁸ Iran i vbe mwẹ esa, emwi ne a zan nọ. Ẹghẹ ne Nọyaẹnmwa gha na ru iran emwi, a gha fuẹn iran an.

¹⁹ Osanobua Jekọb i ye vbe iran, rẹn ọ re ọmwa ne ọ yii emwi hia, ọ keghi zẹẹ Izrẹl ne iran wa gha re emwa irẹn to bọ irẹn. E Nọyaẹnmwa ne Oghodua ọre a tie ẹre.

Umọmọ E Nọyaẹnmwa

²⁰ E Nọyaẹnmwa khare wẹẹ, “E Babilọn wẹ ọrọre umọmọ mwẹ emwi igbinna ne I ya khọn okuo. I lo ruẹ ya rẹnkhẹn avbe uhunmwu ẹvbo kevbe avbe otọe arriọba,

²¹ ne I ya zagha avbe ẹsin ke iran ni hin iran ne I ya guọghọ avbe ikẹkẹ okuo kevbe iran ni gua ẹe khian,

²² ne I ya gbele ikpia kevbe ikhuo, ne I gbele eniwanrẹn kevbe ibiẹka, ne I gbele ibiẹka ikpia kevbe ibiẹka ikhuo,

²³ ne I ya rẹnkhẹn avbe ọsuohuan kevbe avbe ohuan iran, ne I ya gbele avbe ọwẹe kevbe avbe ẹmila ne iran ya gua, ne I ya guọghọ avbe nikhaemwisẹ kevbe avbe ekhaẹmwẹ nekhua.”

Oya Ne A Rri E Babilọn Re

²⁴ E Nọyaẹnmwa khare wẹẹ, “Wa gha miẹn ọẹn vbe I a gha ha e Babilọn osa emwi dan ne iran ru vbe Jerusalẹm.

²⁵ E Babilọn, te u yevbe oke ne ọ fuẹn uhunmwu otọ agbọn hia, sokpan, mẹ ne Nọyaẹnmwa, oghian ruẹn ọ re imẹ khin. I gha dobọ mu ẹẹn, I ghi guoghọ ọ sẹ otọ, I ghi ya uwẹ khian emuẹn.

²⁶ Okuta ne a ghẹ ghi lo i rrọ vbe itowa ruẹ ne a ya ẹe bọ owa. Te u ra yevbe ato ẹdẹdẹmwẹdẹ. Mẹ ne Nọyaẹnmwa ọ re ọ taa ẹe.

²⁷ “Wa ta ẹe ne iran suẹn igbinna! Wa kpe okpe nii ne avbe agbọn ẹvbo hia miẹn ehe na họn. Wa mu avbe uhunmwu ẹvbo hia egbe yotọ khẹ okuo ne iran gu e Babilọn gbinna. Wa tama avbe otọe arriọba Ararat, e Mini kevbe Askẹnaz ne iran dekun ẹnrẹn. Gie ọkaokuo ne ọ ke odaro igbinna nii. Viọ avbe ẹsin rre zẹ vbe oibirri irhiso.

²⁸ “Wa mu avbe agbọn ẹvbo egbe ne uwa ya khọn e Babilọn. Wa gie ne a tie avbe ọba e Midia, avbe ọkaolotu iran kevbe avbe ekhaẹmwẹ iran, deba avbe ivbiyokuo avbe otọe ne iran gbearoghe hia.

²⁹ Otọe guọe zẹzẹzẹ, ọ kevbe mu rueghe, rhunmwuda, e Nọyaẹnmwa mu ẹẹn sẹ nian ighe ne ọ na wẹ te irẹn ra ya Babilọn khian ato, ehe ne ọmwarhọkpa i ghi ye.

³⁰ Avbe ivbiyokuo e Babilọn dobọ igbinna yi nẹ, iran vbe mudia ye okhiẹ ẹvbo iran. “Ẹtin fo iran nẹ, te iran ghi yevbe ikhuo. A guọghọ onurho ẹvbo nii sotọ nẹ avbe owa ni rrọ hia gha giẹn.

³¹ Avbe emwa ne a gie ẹre uhunmwu gha vẹ ya gha khama ọba e Babilọn wẹ emwa guọghọ ekẹn la ẹre ẹvbo vbe igienenẹ.

³² Avbe eghian khọn mu ehe ne a na fian ẹzẹ rra nẹ iran vbe mu erhẹn ye avbe odin ne a gbe ga ẹvbo. Ivbiyokuo e Babilọn vẹ kua.

³³ Vbe ọ ma he kpee wan, avbe eghian gha hele iran yotọ, iran ghi gha ya owẹ rrilo iran muotọ vbe ọka vbe ehe ne a na khuọn rẹn. Mẹ ne Nọyaẹnmwa ne Oghodua, ne Osanobua Izrẹl ọ re ọ taa ẹe.”

³⁴ Ọba e Babilọn giagia e Jerusalẹm, ọ na rrii ọe ọ ke tue ẹvbo nii kua fo zẹ vbe esago. Ọ keghi mi ẹn re, zẹ vbe ugbogiorinmwi ọ viọ avbe emwi ni yẹ ọre vbọ ọ na viọ ni dekẹe kua.

³⁵ Wa gie ivbi e Zaiọn kha wẹẹ, “Iba ne emwa zẹẹ vbe egbe mwa, uhunmwu e Babilọn ọ re ọ ye!” Wa gie ivbi e Jerusalẹm kha wẹẹ, “Oya ne ima ree hia uhunmwu e Babilọn ọ re ọ ye.”

E Nọyaẹnmwa Gha Yi Izrẹl Obọ

³⁶ Ẹre Nọyaẹnmwa na tama ivbi e Jerusalẹm wẹẹ, “I gha mu ẹzọ ruẹ gui, I ghi vbe ru ẹe ne avbe eghian rri oya ye emwi ne iran ru uwa re. I gha si uhunmwu ẹzẹ e Babilọn ka, I ghi vbe gie avbe ẹzẹ ọre ka.

³⁷ Ẹvbo ni gha khian utete itowa, ehe ne avbe aranmwẹ oha ghi dia. Te ọ khian gha mianmwẹ ughe, ọmwarhọkpa i ra yin evba, emwa ni miẹn ọẹn hia gha vbe runran.

³⁸ Ivbi e Babilọn hia gha tulo utumwẹ oduma, iran gbọ vbe ivbi oduma.

³⁹ Te iran zuan ra? I gha le evbare ne iran, I gha ya ayọn ne iran da, iran ghi vbe gha ghọghọ. Iran gha ya vbiẹ vbe ne iran i ghi ra na rhiọrre ọvbehe.

⁴⁰ I gha viọ iran ne a gbelua zẹ vbe ivbi ohuan, ewe kevbe ogho. Mẹ ne Nọyaẹnmwa guaan nẹ.”

Emwi Ne Ọ Rruan E Babilọn

⁴¹ E Nọyaẹnmwa khare vbe ekpa e Babilọn wẹẹ, “A khọn rẹn muotọ ighe ẹvbo ne uhunmwu otọ agbọn hia tian! U miẹn vbe Babilọn ghi khian ẹvbo ne ọ mianmwẹ ughe ne otọ agbọn hia hẹ!

⁴² Okun lẹẹ rhu e Babilọn, ọ na ya ulẹmwẹ amẹ ne ọ wee rhu ẹe ginna otọ.

⁴³ Avbe okpẹvbo ni rrọọ khian emwi ne ọ mianmwẹ ughe, ọ keghi vbe yevbe ato ne amẹ i ye, ehe ne emwa i ye a ma wẹ te emwa ra khian sọe.

⁴⁴ I gha rri e Bẹl ne ẹbọ e Babilọn oya, I ghi ru ẹe ne ọ viọ avbe emwi ne ọ do hẹ ladian. Avbe uhunmwu ẹvbo i ghi ra dọlegbe gho ẹre ọvbehe. “Ekẹn e Babilọn dele.

⁴⁵ Wa ne ivbi Izrẹl, wa lẹ ladian vba. Wa lẹ viọ uhunmwu uwa hin ẹbe rre vbe obọ ohu nọkhua ne ọ mu mwẹ.

⁴⁶ Wa ghẹ gie awẹawẹ ne uwa họn ya egbe wọ uwa ra ne ohan gha mu uwa. Ukpukpo ọ re awẹawẹ ughughan ya zọ ladian, awẹawẹ ọghe uyinmwẹ ikẹtin vbe otọe nii, kevbe ẹghẹ ọba okpa ne ọ gu ọba ọvbehe khọn.

⁴⁷ “Rhunmwuda ọnii, ẹghẹ dee ne I gha na ru avbe ẹbọ e Babilọn emwi. Ekhue gha mu ẹvbo nii hia, a gha vbe gbele emwa rẹn hia a.

⁴⁸ Emwi hia ni rre otọe kevbe ni rre iso gha wee ne oghọghọ vbe emwa ni ke odẹ okuọ rre do fuẹn e Babilọn, a gele rhie ẹre gbe otọ.

⁴⁹ E Babilọn gbele emwa nibun vbe agbọn na hia, banbanna nian, e Babilọn gha de rhunmwuda, ọ gbele ivbi Izrẹl nibun. Mẹ ne Nọyaẹnmwa taa ẹe nẹ.”

Uhunmwu Ne Osanobua Giee Gie Ivbi Izrẹl Ni Rre Babilọn

⁵⁰ E Nọyaẹnmwa tama emwa rẹn ni rre Babilọn wẹẹ, “Wa lẹẹ uwu fe nẹ! Banbanna nian, wa ladian. Wa ghẹ mudia. A gha rhe miẹn ighe wa khian rrei vbe owa, wa mu ẹmwẹ imẹ ne Nọyaẹnmwa uwa ro, ne uwa vbe ye Jerusalẹm rre.

⁵¹ Wa khare wẹ, a fa ima an nẹ, a keghi gie ekhue mu mwa, egbe wa wọọ mwa yotọ rhunmwuda, avbe orhunmwuyẹn mu nọ avbe ehe nọhuanrẹn vbe Ọgua Osa ya khian ọghe iran.

⁵² Rhunmwuda ọnii nian, I khare wẹ ẹghẹ dee ne I gha na ru avbe ẹbọ e Babilọn emwi, emwa ne emwi vbare ghi gha solo vbe otọe ni hia.

⁵³ Ọ gha khọn e Babilọn ne ọ khian la uwu iso ne ọ ya bọ ẹvbo ne a gbe odin ga ye odọ, te I gha ye gie emwa ne iran ya fuẹn ọnrẹn uan. Mẹ ne Nọyaẹnmwa taa ẹe nẹ.”

A Dọlegbe Fuẹn E Babilọn Sayọ

⁵⁴ E Nọyaẹnmwa khare wẹẹ, “Wa danmwehọ urhu eve vbe Babilọn ọghe iran ni khiẹ ye uguọghọmwẹ otọe nii.

⁵⁵ I ra dunmwu e Babilọn ruan ne I vbe ru ẹe ne ọ gbẹmwẹ. Avbe ivbiyokuo lẹ larọ zẹ vbe ulẹmwẹ amẹ ne ọ vannọ. Iran kevbe ye owogho suẹn igbinna.

⁵⁶ Te iran rre do fuẹn Babilọn ruan kevbe ivbiyokuo ẹre hia, a vbe bunnọ uhanbọ iran. Osanobua ne ọ rria ikhi orukhọ mẹ khin, I gha ru e Babilọn emwi ne ọ ma ẹẹn.

⁵⁷ I gha ye ayọn ne avbe enikhaemwisẹ iran da, ne ọ gha gbe iran, avbe umẹwaẹn, ọkaolotu, kevbe ivbiyokuo. Iran gha ya lovbiẹ, sokpan iran i ghi rhiọrre. Mẹ ne ọba taa ẹe nẹ. Mẹ ọrọre Nọyaẹnmwa ne Oghodua.

⁵⁸ A gha rrua ekẹn e Babilọn nọkhua gbe otọ. A ghi vbe giẹn avbe ẹkhu ẹre ne ẹrẹkhẹrẹ sẹ otọ. Iwinna avbe uhunmwu ẹvbo khian ekẹkan, ẹsọn iran giẹn uan vbe erhẹn. Mẹ ne Nọyaẹnmwa ne Oghodua guaan nẹ.”

A Rhie Uhunmwu Ne Jerimaia Gie Gha Rrie Babilọn

⁵⁹ Ovbi ọkpọmwa ọghe Zedekaia ne ọba kegha re Seraia ne ovbi e Neraia kevbe eyẹ ọghe Maasai, ọ ghi rre ukpo enẹ ne Zedekaia rriọba vbe Juda, e Seraia keghi lele ẹe rrie Babilọn, I keghi giee ẹre uhunmwu eso.

⁶⁰ I keghi gbennẹẹn avbe ọkhọ ne ọ ra sunu vbe egbe Babilọn, deba avbe emwi nekpa na hia fẹẹrẹ vbekpa e Babilọn.

⁶¹ I keghi tama Seraia wẹẹ, “U gha sẹ e Babilọn, ghẹ mwẹ u ma tie emwi ne a gbẹnnẹ ye emwa na ladian ma avbe emwa nii. Iyeke ọnii, u ghi na erhunmwu wẹẹ,

⁶² ‘E Nọyaẹnmwa, u tae nẹ ighẹ u gha fuẹn emwa na sẹrriọ, a i ghi ra miẹn emwi ne ọ ma he wu rhọkpa vbọ, ọ re ọmwa nọ ra aranmwẹ, kevbe wẹ, ọ gha vbe gha yevbe ato ẹdẹdẹmwẹdẹ.’

⁶³ “E Seraia, u gha tie ebe na fo nẹ, u ghi gba ẹe ginna okuta ne ọ kpolo, u ghi mu ẹẹn fi Ẹzẹ Yufretes.

⁶⁴ U ghi vbe kha wẹẹ, ‘Emwi ne ọ ra rruan e Babilọn ọ re ọ na khin ọ gha dinmwi, ẹ i ghi ra vbe dọlegbe laghe odukhunmwu, rhunmwuda ọkhọ ne Nọyaẹnmwa ra gie ẹe do sunu vbe egbe ẹre.’ ” Ẹmwẹ e Jerimaia fo vbe emwa.