Jerimaia 50 - Edo Bible (E Baibol Ẹdo) Version 1996

A Khọn Mu E Babilọn

¹ Uhunmwu ne Nọyaẹnmwa giee gunmwẹ vbekpa ore nọkhua e Babilọn kevbe emwa ni rrọọ ọ re ọna khin:

² “Na iyẹn ni ma avbe uhunmwu ẹvbo hia! Ya ẹe go! Mu igiemwi ẹnrẹn ladian ne u vbe ya ẹe na iyẹn! Ghẹ rhie ẹre lẹre zẹ vbe emwi oro! E Babilọn dee guọghua nẹ! E Madok ne ẹbọ ne ọ gho, a duẹ ọre ua nẹ! A fa iran an ighẹ avbe amazẹ e Babilọn! Avbe emwi ne a mannọẹn ne ọ hu ọmwa ẹko, a dunmwu ehia a!

³ Uhunmwu ẹvbo okpa ke odẹ okuọ dee do dekun e Babilọn, te ọ ra ya ẹe khian ato. Te emwa nagbọn kevbe aranmwẹ oha! Ra lẹ kua vbọ, a i vbe miẹn emwa ne ọ gha di evba ya.”

A Dọlegbe Rriowa Ọghe Izrẹl

⁴ E Nọyaẹnmwa khare wẹẹ, “Ọ gha sẹ ẹghẹ nii, ke ivbi Izrẹl, ke ivbi e Juda gha ye eve gha dee, iran ghi gha gualọ imẹ ne Osanobua iran.

⁵ Iran gha nọ odẹ ne a la ye e Zaiọn, iran ghi gha rrie odọ nii. Iran gha gunmwẹ ta ile ẹdẹdẹmwẹdẹ, iran i ghi ra vbe rra ẹre.

⁶ “Avbe emwa mwẹ yevbe avbe ohuan ne ni su ẹe gie ẹ wii ye uhunmwu oke. Iran hẹ yo hẹ rre ke oke ọkpa ya sẹ ọvbehe zẹ vbe avbe ohuan, iran mianmian ehe ne owa iran ye nẹ.

⁷ A vba gbe ọ re iran ghi khin, avbe eghian iran khare wẹẹ, ‘Iran sẹ ẹmwẹ e Nọyaẹnmwa nẹ, rhunmwuda ọnii, ma ma ru a ghẹ i ru. E Nọyaẹnmwa ọ re avbe erha iran odede mu ẹtin yan, te ọ te kei ne iran vbe rhie ekhọe lele ẹe.’

⁸ “Wa ne ivbi Izrẹl, wa lẹ hin e Babilọn rre! Wa kpao hin ẹvbo nii rre! Wa gha re emwa ne okaro ne ọ ka gha kpao.

⁹ I ra ya bọ avbe uhunmwu ẹvbo eso ni wegbe vbe odẹ okuọ yọ ne iran dekun e Babilọn. Iran gha mwamwa egbe ye okuo ghe ẹvbo nii, iran ghi khọn rẹn, ohuẹ ni guee ẹsẹse ọ re iran khin, iran ni fi ifẹnmwẹ nẹi ba emwi ku.

¹⁰ Iran gha fu emwi viọ vbe Babilọn. Iran ni fu emwi viọ vbọ gha viọ emwi nẹ ọ yẹ iran. Mẹ ne Nọyaẹnmwa tae nẹ.”

Udemwẹ E Babilọn

¹¹ E Nọyaẹnmwa khare wẹẹ, “Wa ne ivbi e Babilọn, wa ọ re ọ ya khọn ẹvbo mwẹ. Wa ghọghọ nian, ẹko wa vbe rhiẹnrhiẹn uwa, wa gha hẹ yo hẹ rre vbe ẹmila ne ọ wiẹn ọka ra ẹsin ne ọ ra mu.

¹² Sokpan, ẹvbo uwa nọkhua, a gha mu ẹẹn rriotọ, a gha vbe fa ẹre ua. E Babilọn ọ re ọ ghi ra do gha re ẹvbo ne ọ kanmwa sẹẹ ẹvbo vbe uwu ehia; ọ gha do khian ato ne ọ kae ne amẹ i ye.

¹³ Rhunmwuda ohu mwẹ, ọmwa ne ọ gha yin e Babilọn i ghi rrọ, te a ra yae khian itowa, emwa ni la evba hia, ọ gha yan iran unu an, orrirri ghi vbe gbe ku iran.

¹⁴ “Wa ni fi uhanbọ, wa ghae ye okuo ne uwa lẹga e Babilọn. Wa ya ifẹnmwẹ uwa hia filo e Babilọn, rhunmwuda, ọ sẹ ẹmwẹ mwẹ nẹ, mẹ ne Nọyaẹnmwa.

¹⁵ Wa kpe orhu okuo lẹga ọre ẹvbo nii hia. Banbanna nian, e Babilọn de igue nẹ. A ha uvun la ekẹn ọnrẹn gberra, a keghi dunmwu ẹn ruan sẹ otọ. Te I ghi rria e Babilọn ikhi na. Rhunmwuda ọnii nian, wa vbe rria iran ikhi, ne uwa ru iran zẹ vbene iran vbe ru emwa ọvbehe.

¹⁶ “Wa ghẹ gie a ghi kọ vbe ẹvbo nii, a ma wẹ te a ghi ra rhọ. Ohan ivbiyokuo ni ra do khọn ẹvbo nii gha mu avbe erhunmwuyẹn ni rrọ sẹrriọ wẹ iran ghi werriegbe gha rrie ẹvbo iran.”

Izrẹl Werriegbe Rri Owa

¹⁷ E Nọyaẹnmwa khare wẹẹ, “Te ivbi Izrẹl yevbe ohuan ne oduma khu khian, ọ na vbe zagha iran an. Okaro, Ọgbaisi Asiria keghi dekun iran, vbe iyeke ọnii, e Nebukiadneza ọghe Babilọn keghi gbẹn ugboloko iran.

¹⁸ Rhunmwuda ọnii, mẹ ne Nọyaẹnmwa ne Oghodua, Osanobua Izrẹl, gha rri Ọba Nebukiadneza kevbe ẹvbo ẹre oya, zẹ vbene I rri ọgbaisi ọghe Asiria oya.

¹⁹ “I gha viọ ivbi Izrẹl dọlegbe gha die otọ iran. Iran gha re vbe emwiokọ ne ọ zọ vbe Oke Kamẹl, kevbe otọe Basian, iran ghi vbe rri enọrhirhi khọn iran vbe emwiokọ ne a miẹn vbe otọe Ifreim kevbe Giliad.

²⁰ Ọ gha sẹ ẹghẹ nii, a i ghi ra miẹn orukhọ vbe Izrẹl, ra uyinmwẹ dan vbe Juda rhunmwuda, I gha ya orukhọ bọ avbe emwa ni fi yi vbọ. Mẹ ne Nọyaẹnmwa taa ẹe nẹ.”

Osanobua Bu Ohiẹn E Babilọn

²¹ E Nọyaẹnmwa khare wẹẹ, “Ya gu emwa ni rre Merateim kevbe Pekọd gbinna, gbele iran an, ne u vbe fuẹn iran an, ru emwi hia ne I tama ruẹn. Mẹ ne Nọyaẹnmwa guaan nẹ.

²² A họn urhu igbinna okuo vbe otọe nii, ọfuan nọkhua vbe rrọọ.

²³ “E Babilọn ye umọmọ dunmwu agbọn na hia ukhiọnmwẹ ukhiọnmwẹ. Banbanna nian, nene umọmọ zanzan an, emwi ne ọ rruan ẹvbo nii, wa yan uhunmwu ẹvbo hia unu an.

²⁴ E Babilọn, te uwẹ gunmwẹ gha gbinna, banbanna nian, ifi ne I khuẹẹn khẹ ruẹ mu ẹẹn nẹ, a gha rhe miẹn wẹ, wẹ ma rẹn.

²⁵ I kie aza ne I viọ emwi igbinna mwẹ yi nẹ, I keghi vbe ya ohu viọ iran ladian, rhunmwuda, mẹ ne Nọyaẹnmwa ne Udazi, e Nọyaẹnmwa ne Oghodua, mwẹ emwi ne I ra ru vbe Babilọn.

²⁶ Wa la igienenẹ dekun ẹnrẹn, ne uwa zẹ ọduẹ ye ehe ne ọ viọ oka yi. Wa si emwi ne uwa fu viọ vbọ gboo, zẹ vbe ne a si avbe ọka gboo! Wa fuẹn ẹvbo ni uan! Wa ghẹ sẹ emwi ọkpa rae vbọ hiehiere!

²⁷ Wa gbele ivbiyokuo iran hia a! Wa rẹnkhẹn iran! Ọghe ivbi e Babilọn fo vbotọ! Ẹghẹ sẹ nẹ ne a gha ya rri iran oya!”

²⁸ (Iran ni lẹ vbe owa, lẹ hin e Babilọn rre gha die Jerusalẹm. Iran na iyẹn vbene Nọyaẹnmwa rria ikhi ye ẹmwẹ vbene ivbi e Babilọn ru Ọgua Osa ẹre hẹ.)

²⁹ “Wa tama iran ni fi uhanbọ ne iran dekun e Babilọn. Wa gie iran gha khian ighe avbe emwa ni ghi guara fi uhanbọ kevbe ifẹnmwẹ. Wa ghae ga ẹvbo nii, wa ghẹ vbe gie ọmwarhọkpa miẹn uhunmwu vbọ. Wa ru ẹre emwi hia ne irẹn vbe ru emwa re werriegbe. Wa hae nẹ zẹ vbene irẹn ka ru. Rhunmwuda, uhiomwẹ ọ re ọ ya yin da mwẹ, mẹ ne ọmwa Nọhuanrẹn ọghe Izrẹl.

³⁰ Rhunmwuda ọnii, a gha gbele avbe igbama ẹnrẹn ye adesẹ ore ẹvbo, a gha vbe fuẹn avbe ivbiyokuo ẹre hia a, vbe ẹdẹ nẹdẹrriọ. Mẹ ne Nọyaẹnmwa taa ẹe nẹ.

³¹ E Babilọn, uhiomwẹ wa gba ruẹ egbe rhunmwuda ọnii, mẹ ne Udazi, e Nọyaẹnmwa ne Oghodua, mu aro igbinna da ruẹ. Ẹghẹ sẹẹ nẹ ne I gha na rria ruẹ ikhi.

³² Okpẹvbo ruẹ ne u ye hio gha rrua owẹ, ọ ghi de, ọmwa ne ọ gha si ẹẹ kpaegbe, i rrọ. I gha mu erhẹn ye avbe okpẹvbo ruẹ, emwi ni rre eni hia ghi la ọ rhiae rrie.”

³³ E Nọyaẹnmwa ne Oghodua khare wẹẹ, “A wọ ivbi Izrẹl kevbe Juda uhunmwu. Iran ni munọ iran oghunmwu gha baba iran, iran i ra gie iran kpao gha rrie.

³⁴ Sokpan, ọmwa ne ọ wegbe ọ re ọmwa ne ọ ra miẹn iran fan khin, e Nọyaẹnmwa ne Oghodua, ọ re a tie ẹre. Rẹn ọ re ọ ra tobọ ẹre mu ẹzọ iran gui, ọ ghi rhie ọfumwegbe ye otọ agbọn, sokpan, orueghe ghi gha re ọghe ivbi e Babilọn.”

³⁵ E Nọyaẹnmwa khare wẹẹ, “Uwu ọrọre ọghe ivbi e Babilọn! Uwu ọrọre ọghe emwa ẹnrẹn, ọghe iran ni khaemwisẹ, avbe umẹwaẹn ne ọ mwẹ.

³⁶ Uwu ọrọre ọghe avbe akhasẹ ọre ne ọhọn ohoghe, u miẹn vbene iran kọn hẹ! Uwu ọrọre ọghe avbe ivbiyokuo ẹre u miẹn vbene ohan mu iran hẹ!

³⁷ Dunmwu avbe ẹsin kevbe avbe ikẹkẹ okuo ẹre! Uwu ọ re ọghe avbe ivbiyokuo ne ọ ve ẹre igho hẹ ba egbe. U miẹn vbe iran mitan hẹ! Dunmwu emwi ewe ẹre hia a, zanzan ẹn ne u vbe fu ẹre viọ.

³⁸ Ghẹ gie amẹ rhọ ye otọ ẹre, vbe si avbe ẹzẹ ọre ka. Otọe amazẹ ni mu ohan ọre Babilọn khin ọ na vbe ya avbe emwa nii khian akpa.

³⁹ Rhunmwuda ọnii, e Babilọn gha khian ne avbe esu, avbe orhiọn dan kevbe avbe ahianmwẹ ni ma huan ghi ru ọbafi ẹre khian. Emwa i ra dọlegbe yin evba nii ọvbehe, yasẹ ẹghẹ ne ọ dee hia fẹẹrẹ.

⁴⁰ Emwi ne ọ rruan e Sọdom kevbe Gomorra, ọ re ọ ra vbe rruan e Babilọn, ẹghẹ ne I na fuẹn iran kevbe ẹvbo ni lẹga iran an. Ọmwa i ghi ra dọlegbe yin evba nii ọvbehe. Mẹ ne Nọyaẹnmwa taa ẹe nẹ.

⁴¹ Arhin eso ke odẹ okuọ dee, okpẹvbo ne ọ wegbe ne ọ rrei ẹsẹse; avbe ọba nibun wa mu egbe okuo.

⁴² Iran viọ uhanbọ kevbe umozo iran mwẹ obọ nẹ ekhọe iran wegbe, iran i vbe mwẹ itohan urhu iran yevbe ọghe okun ne ọ vannọ vbe iran a gha hin ẹsin iran khian. Iran mu egbe ne iran ya khọn e Babilọn.

⁴³ Ọba e Babilọn họn ẹmwẹ na, obọ ẹre keghi luẹluẹ, akhiẹ dan dekun ẹnrẹn obalọ ne ọ yevbe ọghe okhuo ne ọ ra biẹ.

⁴⁴ “Mẹ ne Nọyaẹnmwa gha ke uwu ẹgbo ladian zẹvbe oduma, vbe ẹkpo e Jọdan kevbe otọe ne avbe aranmwẹ na rria, I ghi ru ẹe ne ivbi e Jọdan ya ugbugbe lẹ hin ẹvbo iran rre, ẹghẹ nii, ọkaolotu ne I zẹe, gha kha yan otọe nii. De ọmwa ne uwa ra ya gie mwẹ yi? De ọmwa ne ohan gha gie ẹe gunmwẹ suan yi?

⁴⁵ Rhunmwuda ọnii, danmwehọ vbene I khuan khọ e Babilọn hẹẹ, kevbe ne I ho ne I ru emwa rẹn hẹ ya sẹ egbe avbe ivbi iran, te a ra kpolo ehia gha rrie dọmwadẹ ọghọe ghi runran.

⁴⁶ Ẹdẹ ne Babilọn gha de gbotọ, ọ gha la sẹ vberriọ wẹ otọe agbọn hia ghi mu rueghe, avbe agbọn ẹvbo nekpa gha họn utumwẹ wa bu rre ẹre.”