Jerimaia 5 - Edo Bible (E Baibol Ẹdo) Version 1996

Orukhọ E Jerusalẹm

¹ Wa ne ivbi e Jerusalẹm, wa rhulẹ la idunmwu ẹvbo uwa, wa ghe lẹga. Wa ya aro uwa tobọ uwa miẹn ọẹn, wa gualọ uwu ẹki, wa gha miẹn orhiọnkpa ne ọ ru emwi ẹse ra, ra ne ọ vbe hia ne ọ gha re ne ọ gie Osa mu ẹtin yan? Adeghẹ wa gha miẹn vbọ, e Nọyaẹnmwa gha yabọ Jerusalẹm.

² A gha rhe miẹn wẹ wa kha wẹ wa ga e Nọyaẹnmwa, ọdẹn ọ re uwa ya ẹe gbe kẹkan.

³ Vbe ẹmwata, emwi ne Nọyaẹnmwa gualọ ọrọre ayekhọe ga. Ọ fi uwa emwi sokpan wa ma zẹ yọ, ọ rẹnkhẹẹn uwa, sokpan, wa ma ye mwẹ ẹwaẹn wa keghi yin ehọ, wa ma vbe zobọ vbe orukhọ ne uwa ru.

⁴ Ẹghẹ nii ọ re I na kha wẹẹ, “Avbe ivbiogue ni ma rẹn enaye ọ re ena khin. Emwi ukọnmwẹ ọ re iran wa ru, iran ma rẹn emwi ne ọ yẹ Osanobua iran, emwi ne Nọyaẹnmwa ho ne iran ru.

⁵ I gha ya iwegbe bu iran na gha khian, ne I ya gu iran guan. Vbe ne ẹmwata, iran rẹn emwi ne Osanobua iran ho. Emwi ne Nọyaẹnmwa ho ne iran ru.” Sokpan iran hia ọ re ọ wa he ne iran gha rre ototọ asẹ e Nọyaẹnmwa, iran he ne iran họn ẹmwẹ ne ẹẹn.

⁶ Onii ọ sii ẹe ne oduma gha na ke uwu ẹgbo rre do gbele iran an. Akpakomiza gha ke uwu ato rre do yanghan iran an, atalakpa ghi do gha ru ohuẹ vbe ore iran. Avbe emwa nii gha ladian, a gha yanghan iran an, rhunmwuda orukhọ iran bun. Iran keghi fi iyeke gbe Osanobua yan egbe yan egbe.

⁷ E Nọyaẹnmwa keghi nọọn wẹẹ, “Vbọzẹ ne I gha na ya orukhọ emwa mwẹ bọ iran yi. Iran hee mwẹ yotọ nẹ, iran keghi ya gha ga ẹbọ ne ẹ i re emwirhọkpa. I kokoo emwa mwẹ ne ẹko vuọn iran. Sokpan, iran keghi ya gha ru ọghe, iran vbe igberagia keghi gba gha mu yọ mu hin.

⁸ Iran ye vbe ẹsin ọwọe ne a koko ẹse, ọ keghi la iran uhunmwu sẹrriọ wẹ ẹ i ghi gie iran ya rẹn enegbe, ne dọmwadẹ ọghọe ghi na kpe lele amwẹ ogieva ẹre.

⁹ Ọ ma kei ne I rri iran oya ye emwi na ra, ne I vbe rria ẹvbo nii ikhi ye emwi vbenian?

¹⁰ I gha gie avbe eghian ne iran do giagia azara emwa mwẹ ku otọ, sokpan, ne iran ghẹ wa fuẹn ọnrẹn uan fẹẹrẹ. I gha wẹ ne iran giagia ẹre abọ kua, rhunmwuda, avbe abọ nii i re ọghomwẹ.

¹¹ Ivbi Izrẹl kevbe ivbi e Jerusalẹm wa ya mwẹ ne avbokho fẹẹrẹ. Mẹ ne Nọyaẹnmwa ọre ọ taa ẹe.”

E Nọyaẹnmwa He Izrẹl

¹² Emwa e Nọyaẹnmwa siẹn ọẹn, iran keghi kha wẹẹ, “Vbe ẹmwata, ẹ i ra ru emwi rhọkpa, ma i ra miẹn emwi ne ọ ba vbe aro, ma i ra miẹn okuo ra ukhunmwu.”

^13-14 Iran kha re wẹ avbe akhasẹ i vbe mwẹ emwi ne iran khin gberra ẹkpo ohogha. E Nọyaẹnmwa ma vbe gu iran guan hiehiere. E Nọyaẹnmwa Osanobua ne Oghodua keghi tama mwẹ wẹẹ, “Jerimaia, rhunmwuda ne avbe emwa na na kha vberriọ, I gha ru ẹe ne ẹmwẹ mwẹ ye vbe erhẹn vbe unu ruẹn. Avbe emwa nii ghi yevbe erhan, erhẹn nii ghi giẹn iran an.”

¹⁵ Wa ne ivbi Izrẹl, e Nọyaẹnmwa gie emwa ke ehe ne ọ wa rrei dee ne iran do gu uwa gbinna. Uhunmwu ẹvbo nẹdẹ, kevbe ne ọ wegbe nọ, uhunmwu ẹvbo ne uwa i họn ẹvbo ne iran zẹ.

¹⁶ Emwa ni fi uhanbọ iran kegha re emwa ni wegbe ne ẹ i mwẹ itohan vbe iran a gha gbele emwa.

¹⁷ Iran gha rri emwiokọ kevbe evbare uwa fo. Iran gha gbele ivbi uwa nikpia kevbe nikhuo, iran gha gbele avbe ohuan kevbe ẹwe uwa, iran gha dunmwu ogba azara kevbe erhan ohọ uwa hia a. Ẹvbo ne a gbe odin ga ne uwa mu ẹtin yan, ivbiyokuo iran gha guọghọ ẹe rua.

¹⁸ E Nọyaẹnmwa khare wẹẹ, “Uhin do sẹ egbe ẹghẹ ne a kha na, mẹ i ra ye wa fuẹn emwa mwẹ fo.

¹⁹ Iran gha nọ emwi ne ọ si ẹe ne I na ru avbe emwi na, u ghi tama iran Jerimaia wẹ, zẹ vbene iran fi iyeke gbe mwẹ, iran na gha gho ẹbọ ẹrrẹe vbe ẹvbo iran, erriọ zẹẹ iran khian ya ga avbe orhunmwuyẹn vbe ẹvbo ne iran ma yan.”

Osanobua Ye Obọ Sekhae Ne Emwa Irẹn

²⁰ E Nọyaẹnmwa khare wẹẹ, “Wa tama ivbi uniẹn e Jekọb, wa tama ivbi e Juda wẹẹ:

²¹ Wa danmwehọ wa ne akpa vbe abobo, ni mwẹ aro, sokpan iran i ya ẹe bẹghe, ni mwẹ ehọ sokpan iran i ya ẹe họn ẹmwẹ.

²² Mẹ ọrọre Nọyaẹnmwa vbọzẹ ne uwa i na ya ọghọ mẹ? Vbọzẹ ne uwa i na guọ vbe odaro mwẹ? Mẹ ọ re ọ mu uzekhae ya ru ehe ne uwu okun lae. Uwu etẹbitẹ ne irẹn i sẹtin fian rra. Okun sẹtin gha vba kua sokpan, ẹ i sẹtin gberra, ulẹmwẹ okun sẹtin gha davan, sokpan ẹ i sẹtin hae gberra.

²³ “Sokpan, wa na, wa ze vbe ẹkoko udu, wa keghi vbe sọtẹ, wa lahin odẹ rre, wa keghi sẹ mwẹ rae.

²⁴ Wa ma he zẹ ọe vbe iro ẹdẹ wẹ, wa gha ya ọghọ mẹ, vberriọ, mẹ ọ re ọ giẹ amẹ ahọ orhọ kevbe ahọ uyunmwu rre, I ghi vbe gha rhie ẹghẹ emwiorhọ ne uwa vbe ukpukpo.

²⁵ Sokpan, orukhọ uwa ma gie avbe emwi ne ọ maa na sẹ uwa obọ.

²⁶ “Emwa dan rre uwu ẹbu emwa mwẹ. Iran rre ihako zẹ vbe emwa ni rhuẹ ifi ne ọ mu ahianmwẹ, sokpan ifi ne ọ munọ emwa ọ re iran rhuẹ re.

²⁷ Zẹ vbene ohuẹ viọ ahianmwẹ vuọn okhuae ẹre, erriọ ọ re iran viọ emwi ne iran furu vuọn owa iran. Ọnii ọ sii ẹe ne iran na fee kevbe ne iran na vbe mwẹ ẹtin.

²⁸ Ọnii ọ re ọ vbe sii ẹe ne iran na kọnkọn egbe, ẹko kevbe vuọn iran. Emwi dan ne iran ru i mwẹ okhiẹ. Iran i rhie emwi ni khẹke emọ ni i mwẹ erha ne iran, ra ne a bu ohiẹn ẹse ne ọmwa ne a zẹ kpokpo.

²⁹ “Sokpan, mẹ ne Nọyaẹnmwa gha rria iran ikhi ye emwi na, I gha rria uhunmwu ẹvbo na ikhi.

³⁰ Emwi ohan ne ọ gborrirri sunu nẹ vbe otọe nii.

³¹ Avbe akhasẹ i ta ẹmwẹ ọvbehe gberra ohoghe, vbene avbe akhasẹ khare ọ re avbe ohẹn ya khaemwisẹ yan emwa, emwa mwẹ i vbe wẹ hẹn. Sokpan, ena hia ghẹ ghi fo nia, vbe iran gha ru hẹ?”