Jerimaia 49 - Edo Bible (E Baibol Ẹdo) Version 1996

E Nọyaẹnmwa Buohiẹn Amọn

¹ Ẹmwẹ ne Nọyaẹnmwa tae vbe ekpa Amọn ọ re ọna khin: “Avbe ikpia ivbi Izrẹl vbo yi? A ma ghi miẹn ne ọ khọn ne ẹvbo ẹre vbọ ra? Vbọzẹ ne iran na gie avbe emwa ni gho Milkọm khọn mu otọe ẹwae e Gad, ne iran vbe yin ẹnrẹn yi?

² “Sokpan, ẹghẹ dee ne I gha na gie iran ni rre Raba ne igiogbẹ họn ẹmwẹ okuo, a ghi ya ehia khian itowa, a ghi vbe giẹn avbe igue ẹre hia sotọ. Izrẹl ghi mu otọ ẹre werriegbe vbe obọ iran ni te miẹn ẹre re.

³ Ivbi e Hesbọn, wa gha tulo! A fuẹn Ai rua nẹ! Ikhuo e Raba, wa ya gha khiẹ! Wa viọ ukpọn akhiẹ ye egbe ne uwa gha khiẹ. Wa gha hẹ yo hẹ rre vbe uwu iro ne ọ hanrẹn. A gha mu e Milkọm ne ẹbọ uwa gha rrie iwe, ke ẹe ke avbe ohẹn ọnrẹn kevbe avbe ivbi ọba.

⁴ Vbọzẹ ne uwa ne emwa nẹi gia mu ẹtin yan na vbe rhuọ yi? Egbe wọ uwa buan nẹ. Vbọzẹ ne uwa na mu ẹtin yan iwegbe uwa yi, ne uwa na vbe kha wẹ ọmwa ne ohan gha gie ẹe dekun uwa irrọ?

⁵ “I gha si ohan ye uwa egbe vbe igienenẹ. Wa hia gha lẹkua. Edọmwadẹ ọghọe gha lẹ ne ọ rhie uhunmwu ẹnrẹn lẹre, a i ghi vbe miẹn ọmwa ne ọ gha dọlegbe si ivbiyokuo uwa koko ne uwa ọvbehe.

⁶ “Sokpan, vbe okiekie, I gha gie agbọn dọlegbe maa Amọn. Mẹ ne Nọyaẹnmwa taa ẹe nẹ.”

E Nọyaẹnmwa Buohiẹn Idọm

⁷ Emwi ne Nọyaẹnmwa ne Oghodua tae vbekpa Idọm ọ re ọna khin: “Ivbi Idọm i ghi sẹtin ye ẹrherhe iran roro emwi gba ra? Iran ni bu iran ude i ghi sẹtin tama iran emwi ne iran gha ru ra? Ẹwaẹn ne iran wan hia wa khian ne a hobẹkun ne ẹ ra?

⁸ Ivbi e Dedan, wa fi egbe egbe werriegbe ne uwa lẹ! Wa ya lẹre! Iran do fuẹn ivbi uniẹn Isọ rua rhunmwuda, ẹghẹ sẹ ne nian ne I gha na rri iran oya.

⁹ Emwa gha kọlọ alimo, iran ghi sẹ ekherhe rae ye uhunmwu erhan rẹn, avbe oyi gha ghi vbe rre vbe asọn, ne iran ho vbe uwu avbe emwi nii okpa ọ re iran viọ.

¹⁰ Sokpan, te imẹ wa bannọ ivbi Isọ rua fẹẹrẹ, I na vbe kie ehe ne iran lẹre yi hia yotọ sẹrriọ wẹ iran i ghi sẹtin lẹre ọvbehe. A fuẹn ivbi idom hia a fẹẹrẹ. A ma vbe sẹ okpa rae vbọ.

¹¹ “Wa sẹ avbe emọ ne ẹ i mwẹ erha uwa rae mẹ, I gha gbearoghe iran. Avbe ikhuo ni dẹgbẹ vbe uwu uwa sẹtin yaro khọ mwẹ.

¹² “Adeghẹ te a ghi miẹn wẹ avbe emwa ni ma te kei ne iran rrioya, vbe danmwẹ vbe uwu ukpu irrioya ni, te uwẹ ghi ro i ghe irrioya nii gha la uwẹ ban? Hiehiere, te uwẹ gha vbe wọn vbe uwu ukpu nii!

¹³ “Mẹ tobọmwẹ vẹn ihẹn ne wẹ e Bozra gha khian ne ọ mianmwẹ ughe, ọ ghi vbe khian ato, emwa gha yae gha gbogiẹ, a ghi ya ẹe gha tie ihẹn. Avbe igue ni lẹga ẹre hia gha khian itowa ẹdẹdẹmwẹdẹ. Mẹ ne Nọyaẹnmwa ọ re ọ taa ẹe.”

¹⁴ Mẹ keghi kha wẹẹ, “Idọm, e Nọyaẹnmwa gie uhunmwu gunmwẹ. Ọ gie ọmwa okpa uhunmwu ne ọ ya tama avbe uhunmwu ẹvbo hia wẹ ne iran si ivbiyikuo iran koko ne iran dekun ruẹn.

¹⁵ “E Nọyaẹnmwa ra do ya uwẹ khian ne ọ ma wegbe, ai ghi vbe miẹn ọmwa ne ọ gha ya ọghọ nuẹn.

¹⁶ Itengbemu ruẹ hiẹ ruẹ nẹ. Ai ghi miẹn ọmwa ne ọ muohan ruẹn zẹ vbene a te ka mu ohan ruẹn yi. Odukhunmwu okuta nekhua ni yo sẹẹ ọ re u diaa, odukhunmwu gban an ọghe avbe oke nekhua, ọ gha khọn ruẹn ne u ya gha rre uwu iso zẹ vbe oghohọn, te Nọyaẹnmwa ra siọ fi otọ. E Nọyaẹnmwa taa ẹe nẹ.

¹⁷ “Okuo ne ọ ra sunu vbe egbe Idọm gha mu ohan sẹ vberriọ wẹ ọmwa ne ọ rhirhi la evba gberra, ohan gha mu ẹn, afianma gha vbe fian ẹẹn.

¹⁸ Emwi ne ọ mian Sọdom kevbe Gomorra vbe ẹghẹ ne a na guọghọ iran kevbe avbe ẹvbo ni lẹga iran uan, ọ re ọ ra vbe rruan Idọm. Ọmwa i ghi dọlegbe yin ẹnrẹn ọvbehe. Mẹ ne Nọyaẹnmwa ọ re ọ taa ẹe.

¹⁹ Zẹ vbe oduma ne ọ ke uwa ẹgbo Ẹzẹ Jọdan ladian la uwu oha ne aranmwẹ na rria ne ọ bii nunuunu, I gha rre ne ivbi Idọm ye ugbugbe lẹ hin ẹvbo iran rre. Ẹghẹ nii, ọkaolotu ne imẹ zẹe ghi ghi do gha khaemwisẹ yan avbe uhunmwu ẹvbo. De ọmwa ne a gha ya gie mwẹ yi? De ọmwa ne ohan gha gie ẹe si mwẹ evẹn? De ogie ne ohan gha gie ẹe gbe odan ghe mwẹ?

²⁰ Rhunmwuda ọnii, danmwehọ vbene I khuan khẹ ivbi Idọm hẹ kevbe emwi ne I ra ru ivbi ẹvbo e Tẹman re. Te a ra silo ivbi iran kpao, izegbe ghi zẹ emwa hia.

²¹ Idọm gha de, uwemwẹ emwa gha mu otọ agbọn hia rueghe, urhu urunranmwẹ ghi gha re ne avbe họn ya sẹ odẹ Abọ Ẹzẹ Akaba.

²² Avbe eghian gha hẹrhu e Bozra zẹ vbe oghohọn ne ọ vin ghe otọ kẹe ke ifuẹn ne a rhanrẹn vbe ẹdẹ ne ẹdẹrriọ, ivbiyokuo Idọm ghi gha guọ zẹzẹzẹ zẹvbe okhuo ne emwi ubiẹmwẹ ru.”

E Nọyaẹnmwa Bu Ohiẹn E Damaskọs

²³ Emwi ne Nọyaẹnmwa tae vbekpa Damaskọs ọ re ọ na khin: “Ekhọe emwa ni rre Hamat kevbe Apad ma sẹ otọ, afianma vbe fian iran rhunmwuda, iran họn iyẹn dan, ohawa lẹ rhu iran zẹ vbe amẹ okun iran i ghi sẹtin kẹtin.

²⁴ Te ivbi e Damaskọs ghi mitan, iran ye afianma lẹ kua. Iran rre uwu obalọ kevbe omanọ, zẹvbe okhuo ne emwi ubiẹmwẹ ru.

²⁵ “Okpẹvbo ne ọ hinusi nii. Ne oghọghọ te ye, khian ne emwa lẹ sẹrae fẹẹrẹ.

²⁶ Ọ gha sẹ ẹdẹ ne ẹdẹrriọ, a gha gbele avbe igbama ye adesẹ ore ẹvbo, a ghi fuẹn avbe ivbiyokuo ẹre hia a.

²⁷ I gha mu erhẹn ye ekẹn e Damaskọs, I ghi vbe giẹn ẹguae e Bẹnhadad na. Mẹ ne Nọyaẹnmwa ne Oghodua taa ẹe nẹ.”

Ibuohiẹn Emwa E Keda Kevbe Ẹvbo E Hazọ

²⁸ Emwi ne Nọyaẹnmwa tae vbekpa ẹwae Keda kevbe avbe otọe ne Nebukiadneza ne ọba e Babilọn khọn rẹn, ne Hazọ gha kha yan ọ re ọna khin: “Dekun emwa Keda, ne u vbe fuẹn emwa odẹ ahọ nii uan!

²⁹ Fu iran avbe owa ukpọn, deba emwirri iran, ukpọn ne iran tan ye onurho owa ukpọn iran, deba emwi hia ni rre owa ukpọn iran, fu iran avbe ekẹtẹkẹtẹ viọ ne u vbe tama avbe emwa nii wẹẹ, ‘Ugborrirri lẹ khinkhian uwa.’

³⁰ “Ivbi e Hazọ, mẹ ne Nọyaẹnmwa tama uwa ne uwa lẹ gha rrie ehe ne ọ rrei ne uwa ya lẹre. e Nebukiadneza ne ọba ne Babilọn wa khuan khẹ uwa, ẹmwẹ ne ọ tae ọrọre wẹẹ,

³¹ ‘Wa larre! Wa gie ima ya hẹrhu iran ni ro ighẹ iran i ghi rre uwu ẹbe, ẹkun sẹ iran otọ nẹ. Ẹvbo iran i mwẹ ẹkhu ne a yi yọ, ra emwi ne a ya khui ẹre, ẹi vbe mwẹ emwi ne a ya degue ọ re hiehiere.’

³² “Wa viọ e kamẹl iran kevbe ẹmila iran hia. I gha zagha iran lele ehe hia ighẹ iran ni gbe eto muotọ na, I ghi vbe gie ọkhọ egbe hia rruan iran.

³³ A gha ye Hazọ khian ato ẹdẹdẹmwẹdẹ, ehe ne a miẹn wẹ avbe ekuaghagha okpa ọ re a miẹn vbọ. Ọmwa rhọkpa i ghi ra dọlegbe yin evba. Mẹ ne Nọyaẹnmwa taa ẹe nẹ.”

E Nọyaẹnmwa Bu Ohiẹn Ẹlam

³⁴ E Zedekaia ghi wa da rriọba e Juda, e Nọyaẹnmwa ne Oghodua keghi gunmwẹ guan vbekpa Ẹlam.

³⁵ Ọ wẹẹ, “I gha gbele avbe emwa ni fi uhanbọ hia, iran ni do ya Ẹlam khian ẹvbo ne ọ mwẹ ẹtin.

³⁶ I gha gie ẹhoho hoho vbe Ẹlam ke igienenẹ rre. I gha vbe zagha emwa rẹn lele ehe hia a te do miẹn wẹ a i ghi miẹn ẹvbo okpa ne ai na miẹn emwa rẹn ni lẹ hin owa rre.

³⁷ I gha ru ẹe ne emwa Ẹlam gha fian afianma avbe eghian iran ni ho ne iran gbele iran. Vbene ohu nọkhua ya mu mwẹ, erriọ I ra ya fuẹn emwa Ẹlam uan, I gha gie ivbiyokuo gie iran, a te do miẹn wẹ I wa fuẹn iran fẹẹrẹ.

³⁸ I gha fuẹn avbe ọba kevbe olotu iran an fẹẹrẹ, I ghi do mu ẹkete mwẹ gbọ ye evba.

³⁹ Sokpan, vbe okiekie ehia, I gha gie agbọn vbe dọlegbe maa ivbi Ẹlam. Mẹ ne Nọyaẹnmwa taa ẹe nẹ.”