Jerimaia 48 - Edo Bible (E Baibol Ẹdo) Version 1996

Ufuẹnmwẹ E Moab

¹ Ẹmwẹ ne Nọyaẹnmwa ne Oghodua tae vbekpa Moab ọ re ọna khin: “Wa tohan ivbi e Nebo, a dunmwu ẹvbo iran an nẹ! A khọn mu e kirriatam, a guọghọ odin nọkhua ne ọ lẹga ẹre sotọ, a keghi vbe fa emwa ni rrọ ua.

² Ose e Moab fo vbotọ, eghian khọn mu e Hesbọn nẹ, iran vbe kun vbene iran gha ya fuẹn e Moab ua hẹ nẹ. A gha rhie obọ gue ẹvbo avbe Ọmwẹmwẹ unu. ivbiyokuo gha mu okuo gha khian.

³ Ivbi e Horonaim gha go kha wẹẹ, ‘Ọkhọ! Ọfuan!’

⁴ “A fuẹn Moab ua nẹ, gha họn vbe avbe ibiẹka viẹ.

⁵ Gha họn vbe iran so asukpẹ eve vbe odẹ ne ọ rrie Luhit; eve akhiẹ, vbe odẹ ne ọ rrie Horonaim.

⁶ ‘Ẹgiẹgiẹ, wa lẹ rhie uhunmwu hin ẹbe rre!’ erriọ iran tae, ‘Wa rhulẹ zẹ vbe ekẹtẹkẹtẹ oha ne ato!’

⁷ “E Moab, ẹtin ruẹn ọ re u mu ẹtin yan kevbe ẹfe ruẹ, sokpan, banban, uhin ighẹ te a ra khọn ruẹn, e Kemọs ne ẹbọ ruẹ gha yo iwe ọ ghi lele ivbi ọba kevbe avbe ohẹn ọnrẹn gha khian.

⁸ Ẹvbo okpa ne ọfuan ni ra la ban, ẹi rrọọ ke oke kevbe ugboghodo, te a ra fuẹn ehia a. Mẹ ne Nọyaẹnmwa taa ẹe nẹ.

⁹ Wa mu okuta ayere yotọ ne Moab ẹ i ghi rrei a fuẹn ọnrẹn uan ban. A gha ya avbe ẹvbo ni rrọọ khian itowa, a i ghi miẹn ọmwa ne ọ gha yin ẹnrẹn ọvbehe.”

¹⁰ (Ihẹn nọ ne ọmwa ne ọ ma ye ekhọekekhọe winna iwinna e Nọyaẹnmwa! Ihẹn nọ ne ọmwa ne ọ ma fian ke ne ọ vbe gbua.)

A Fuẹn Avbe Okpẹvbo E Moab Ua

¹¹ E Nọyaẹnmwa khare wẹẹ, “Te ẹkun wa sẹ e Moab otọ ẹdẹ, a ma he vbe viọ iran yo iwe ẹdẹ. Te Moab ye vbe ayọn ne a gie ẹe de hẹnhẹn vbe ne a ma na kpokpo ẹe, a ma vbe ruẹn ọnrẹn ke uru okpa ye ọvbehe. A ma he rhia uwinhinmwẹ ọnrẹn uan, Ọ ke wa ye rhiẹnrhiẹn vbene ọ ye ẹdẹ.

¹² Rhunmwuda ọnii nian, ẹghẹ dee ne I gha na gie emwa ne iran ya tue Moab kua zẹ vbe ayọn. Iran gha tue avbe uru ayọn rẹn kua, iran ghi vbe dunmwu ehia a.

¹³ Ẹghẹ nii, ivbi e Moab gha khian ne iro hanrẹn ba ẹmwẹ e Kemọs ne ẹbọ iran, zẹ vbene iro e Bẹtẹl han ivbi Izrẹl, ẹbọ ni ne iran te mu ẹtin yan.

¹⁴ “Ivbi e Moab, vbe uwa na kha hẹ yi ighẹ ọkhae wa khin? Ivbiyokuo ni din, ne a danmwẹ ghe nẹ vbe okuo.

¹⁵ A fuẹn Moab kevbe avbe okpẹvbo ni rrọ ua nẹ a gbele avbe igbama ni mose ni rrọ ua. Mẹ ọrọre ọba, e Nọyaẹnmwa ne Oghodua, I vbe guaan nẹ.”

¹⁶ Ẹdẹ ọfuan ọghe Moab dee, urẹnkhẹnmwẹ ọnrẹn gha sotọ ban.

¹⁷ “Wa khiẹ ẹvbo nii, wa ni yin diake ẹe wa hia fẹẹrẹ ni rẹn usi ẹre. Wa kha wẹẹ, ‘A ye arriọba ẹtin ẹnrẹn owẹ yotọ, uyi kevbe ẹtin ẹnrẹn i ghi rrọ ọvbehe.’

¹⁸ Wa ni rre Dibọn, wa ke ukpo uyi uwa tuorre, ne uwa tota ye ebubẹ vbe otọ. Ọmwa ne ọ fuẹn Moab ua rre emwa na, ọ keghi ye avbe owa ọkhẹ ẹre khian itowa.

¹⁹ Wa ni rre Aroa, wa mudia ye ọkpẹn odẹ ne uwa gha khẹ, wa nọ avbe iran ni lẹ khian, wa nọ iran emwi ne ọ sunu.

²⁰ Iran gha tama uwa wẹẹ, ‘E Moab dee guọghọ ua, wa viọe ighẹ a fa ẹre ua nẹ. Wa ya ya ẹe go lele ọkpẹn Ẹzẹ Anọn wẹẹ a fuẹn Moab ua.’

²¹ “Ibuohiẹn sẹ egbe avbe ẹvbo nii rre uhunmwu oke, avbe Holọn, e Jaza, e Mẹfat,

²² e Dibọn, e Nebo, e Bẹt, e Diblateim,

²³ e kirriatam, e Betgamọl, e Betmiẹn,

²⁴ e Kiriot kevbe Bozra. Ibuohiẹn sẹ egbe ẹvbo hia ni rre Moab, ni rrei nẹ ke ni i rrei.

²⁵ A dunmwu ẹtin e Moab sẹ otọ nẹ, a fuẹn iwegbe ẹre ua nẹ. Mẹ ne Nọyaẹnmwa ọ re ọ taa ẹe.”

A Gha Gbe Moab Uhunmwu Kotọ

²⁶ E Nọyaẹnmwa khare wẹẹ, “Wa ye ayọn ne Moab da ne ọ gha gbe ẹe, rhunmwuda ọ sọtẹ mwẹ nẹ. E Moab gha de wunnu vbe uwu ekpa ne ọ kpaa yotọ, emwa hia ghi gha giẹ ọe.

²⁷ E Moab, ye rre vbene u gha ya ivbi Izrẹl gbogiẹ hẹẹ. U ke gha ru iran vbene a miẹn wẹ te a mu iran vbe uwu ẹbu otu izigan.

²⁸ “Wa ne emwa ni rre Moab, wa kpao vbe ore ẹvbo uwa rre. Wa ya gha rre ukpe uhunmwu oke okuta! Wa ye egbe uwa do gha yevbe idu ne ọ bọ oko ye ẹzẹ ne ọ la uguowẹ okuta.

²⁹ E Moab hio gbe. I họn nẹ vbene iran hio hẹ, ne iran na vbe tọn egbe mu, iran ghi gha ye obọ rra ẹwẹe, ne iran na vbe kha i ghẹ a ma he miẹn egbe iran ẹdẹ.

³⁰ Mẹ ne Nọyaẹnmwa rẹn vbene iran hio hẹ. Orhuọ ne iran rhuọ i mwẹ asa, emwi ne iran ru i vbe kpee vbe otọ.

³¹ Rhunmwuda ọnii, I gha viẹ ivbi e Moab hia, kevbe ivbi e Ka Hẹrẹs.

³² I gha viẹ ivbi e Sibma, sẹẹ ivbi Jaza. Orẹ nọkhua e Sibma, te u yevbe azara ne abọ ẹre niẹn fian Okun Nọbaa rraa, rhinrin ya sẹ Jaza. Sokpan, banbanna nian, a fuẹn ọnrẹn uan ighe ọmọ ne u mọ vbe ẹghẹ uyunmwu deba alimo ruẹ hia.

³³ A rhie oghọghọ kevbe ọyẹnmwẹ hin otọe Moab ne ọ maa emwiokọ rre nẹ. I dobọ ayọn ne ọ la ke udin ayọn rre yi nẹ. A i ghi miẹn ọmwa ne ọ gha zẹ udin ayọn, ne ọ gha vbe gha we ne oghọghọ.

³⁴ “Ivbi e Hesbọn kevbe Elialẹ tu ladian, a vbe họn urhu utumwẹ iran ya sẹ Jahaz. Emwa ni rre Zoa vbe họn ẹẹn. Avbe họn ẹẹn vbe odẹ Horonaim kevbe Eglat Siẹlisiya. Uhin ighe Ẹzẹ Nimrim tobọẹre kae sẹ otọ.

³⁵ I gha ru ẹe ne emwa e Moab ghẹ ghi zọ ese ne a giuan vbe ehe ne iran na ga, kevbe ne iran ghẹ ghi zọ ese ghe ẹbọ iran. mẹ ne Nọyaẹnmwa tae nẹ.

³⁶ “Rhunmwuda ọnii ekhọe mwẹ khiẹ ne Moab kevbe ivbi e Ka Hẹrẹs zẹ vbene ọmwa ye ufere so ihuan irorinmwi, rhunmwuda, emwi ne iran mwẹ hia la ọrhiae rrie.

³⁷ Iran hia khiokhio eto mu otọ iran keghi vbe gbẹn ẹtu iran. Iran valọ obọ iran, edọmwadẹ ọghọe keghi vbe rhuan ukpọn akhiẹ.

³⁸ Akhiẹ Ọ re ọ ghi rre ehe hia vbe ẹrhunrhun owa kevbe ughe e Moab hia, rhunmwuda, I guọghọ Moab nẹ zẹvbe esago nẹi yẹ ọmwa rhọkpa.

³⁹ “A salọ Moab ua! Wa gha go! A fa Moab ua nẹ. Itowa ọ re ghi nọ, te avbe ẹvbo ni lẹga ẹre hia ghi ya ẹe gbogiẹ. Mẹ ne Nọyaẹnmwa taa ẹe nẹ.”

E Moab I Miẹn Uhunmwu

⁴⁰ E Nọyaẹnmwa tae nẹ wẹ ẹvbo ọkpa gha do hẹ rhu e Moab zẹ vbe oghohọn ne ọ rhan ifuẹn uan.

⁴¹ A ghi vbe khọn mu avbe okpẹvbo kevbe ehe ne a gbe odin gaa ni rrọ hia. Vbe ẹdẹ ne ẹdẹrriọ, avbe ivbiyokuo e Moab ghi gha guọ zẹzẹzẹ vbe okhuo ne emwi ubiẹmwẹ ru.

⁴² A gha fuẹn Moab ua, ẹi ghi ra vbe gha re okpẹvbo ọvbehe rhunmwuda, ọ sọtẹ mwẹ nẹ.

⁴³ Ohan, uye kevbe ifi diakhẹ ivbi e Moab, e Nọyaẹnmwa guaan nẹ.

⁴⁴ Ọmwa ne ọ te wẹ ne irẹn lẹ fe vbe obọ ohan nii, gha de ye uye, ọmwa ne ọ ghi vbe sẹtin hin odukhunmwu ke uwu uye ladian, ifi gha mu ẹẹn, rhunmwuda, e Nọyaẹnmwa rhie ẹghẹ ọfuan ọghe Moab yotọ nẹ.

⁴⁵ Iran ni lẹ hin ẹvbo iran rre, ne ẹtin vbe fo nẹ, gha te gha ho ne a miẹn iran yi vbe Hesbọn, ẹvbo nii ne ọba e Saihọn gha khaemwisẹ yan ẹghẹ ọkpa, sokpan, erhẹn wa to vbọ nian. Erhẹn giẹn ehe ne a ka sẹ vbọ kevbe avbe oke ni yo ọghe avbe ivbi e Moab ne okuo ye.

⁴⁶ Wa tohan ivbi e Moab. A fuẹn iran an ighe avbe emwa ni gho Kemọs, a keghi vbe viọ ivbi iran nikpia kevbe nikhuo zẹ vbe oghunmwu gha rrie.

⁴⁷ Sokpan e Nọyaẹnmwa gha gie agbọn dọlegbe maa e Moab vbe ẹghẹ ne ọ dee. Avbe emwi na hia, ọre Nọyaẹnmwa khare ighe ọ gha sunu vbe egbe Moab.