Jerimaia 47 - Edo Bible (E Baibol Ẹdo) Version 1996

Uhunmwu Ne Nọyaẹnmwa Gie Vbe Ekpa E Filistia

¹ Vbe ọ te sẹ ẹghẹ ne ọba Igipt na mu okuo gha rrie Gaza, e Nọyaẹnmwa keghi gunmwẹ guaan vbe ekpa e Filistia.

² Ọ wẹẹ: “Ghe! Amẹ bi vbe odẹ okuọ, ọ gha khọn rre zẹ vbe ẹzẹ ne ọ ro sẹ oke ọ gha ro gue otọ kevbe emwi ni rrọọ hia, avbe okpẹvbo kevbe ẹvbo ni rrọọ hia, emwa hia gha go wẹ wa bu rre, emwa ni rre agbọn gha viẹ eve orriara.

³ Iran gha họn ukpukpẹ owẹ avbe ẹsin, e khuanghankhuanghan ọghe ikẹkẹ okuo, kevbe okhirhikhirhi owẹ ikẹkẹ, erha emọ i ra werriegbe ya viọ ivbi iran, obọ iran gha wu ginna iran egbe.

⁴ Ẹghẹ sẹe nẹ ne a gha ya fuẹn e Filistia a, ne a ya giagia iyobọ ne ọ ghi te kẹe hin e Taia kevbe Saidọn rre. Mẹ ne Nọyaẹnmwa gha dunmwu e Filistin uan, iran hia ni ke eghute e Kret rre.

⁵ Ivbi e Gaza miẹn akhiẹ nọkhua, ọgbunu gbe ivbi Askẹlọn unu an vbe Filistia ra khiẹ kpee sẹ hẹ vbe otọ yi?

⁶ Wa gha tu wẹ ‘Umozo e Nọyaẹnmwa! Vbe u a ra lọkọ emwa kpee sẹhẹ vbe otọ yi? Werriegbe la uwu ako umozo ruẹ, gha rre evba ne u hẹwẹ.’

⁷ Sokpan, vbe ọ ghi ra ya hẹwẹ hẹẹ, vbe I waa iwinna ne ẹẹn ne ọ winna? Mẹ Ọ re ọ tama rẹn ne ọ dekun Askẹlọn, kevbe avbe emwa ni rre eghute.”