Jerimaia 46 - Edo Bible (E Baibol Ẹdo) Version 1996

Obọ Ke Okhunmwu Ne Igipt Vbe Kakẹmis

¹ E Nọyaẹnmwa keghi gunmwẹ guaan vbekpa avbe uhunmwu ẹvbo.

² Ọ na suẹn ọnrẹn vbe egbe Igipt. Ẹmwẹ ne ọ tae vbekpa ivbiyokuo e Nẹko ne ọba Igipt ẹre ọ na khin, ọmwa ne Nebukiadneza ne ọba e Babilọn khọn mu Kakẹmis vbe ọkpẹn Yufretes ne Ẹzẹ vbe ukpo ne ogienẹ ne Jehoiakim yae vbe ẹkete e Juda:

³ “Avbe ọkaokuo ivbi Igipt wa davan wẹẹ, ‘Wa viọ asa uwa mwẹ, ne uwa khian la uwu okuo!

⁴ Wa gbalọ avbe ẹsin uwa egbe, ne uwa hin iran! Wa tẹn ye uviẹn ne uwa viọ erhu uwa rhuẹ. Wa lọ asoro uwa! Wa viọ ẹwu ematọn okuo uwa yọ!’

⁵ “Sokpan, de emwi ne I ghi bẹghe?” erriọ Nọyaẹnmwa nọrẹn. “Ehia ye ohan lẹ werriegbe. Iran khulo iran, avbe ivbiyokuo iran zẹ ulẹ ua udu iran kpan fi ẹko, iran keghi lẹ vbene okhian sẹtin kẹ iran sẹ, iran ma vbe gbe aro ghe iyeke.

⁶ Iran ni sẹtin rhulẹ i ra lẹ fe, avbe ivbiyokuo i ra sẹtin lẹ fe, vbe odẹ okuọ vbe ọkpẹn Yufretes, iran rrua owẹ, iran keghi dele.

⁷ Gha ọ na khin ne ọ guakpao yi zẹ vbe Naẹl zẹ vbe ẹzẹ ne ọ ro sẹ oke ẹre?

⁸ Igipt nọ, ọ gha guakpao zẹ vbe Naẹl zẹ vbe ẹzẹ ne ọ ro la oke ẹre, Igipt khare wẹẹ, ‘I gha ro gue agbọn hia, I gha fuẹn avbe okpẹvbo rua deba emwa ni rrọọ.

⁹ Tama avbe ẹsin ne iran gha khian, kevbe avbe ikẹkẹ okuo ne iran khianmwu. Gie avbe ivbiyokuo ladian, emwa ni ke Sudan kevbe Libya rre, iran ni viọ asa mwẹ, kevbe emwa ni guẹ uhanbọ ne a fi, ni ke Lidia rre.’ ”

¹⁰ Ẹdẹ Osanobua ne Udazi ne Oghodua ọ na khin ẹdẹnẹrẹ na, ọ ra kioya ẹdẹnẹrẹ na, ọ gha rria avbe eghian rẹn ikhi. Umozo ẹre gha rri iran ne ẹko vuọn ẹẹn ọ gha vbe wọn esagiẹn iran ẹko te do vuọn ẹẹn. Ẹdẹnẹrẹ na ọ re Oghodua ra ye avbe oghunmwu ẹnrẹn zọ ese vbe odẹ okuọ, vbe ọkpẹn e Yufretes.

¹¹ Ivbi Igipt, wa gha rrie Giliad ne uwa ya gualọ ukhunmwu, ukhunmwu uwa rhọkpa i ghi sẹ, emwi ne ọ gha sẹtin sinmwi uwa i ghi rrọọ.

¹² Agbọn ẹvbo họn efa ne ọ rruan uwa nẹ, agbọn hia họẹn vbe uwa viẹ. Ovbiyokuo ọkpa ghi ya owẹ rri ọvbehe gberra iran eveva ghi dele gbe otọ.

Urremwẹ E Nebukiadneza

¹³ E Nebukiadneza ne Ọba e Babilọn ghi mu okuo gha die Igipt, e Nọyaẹnmwa keghi gu mwẹ guaan. Ọ wẹẹ,

¹⁴ “Ya kha vbe ore ẹvbo Igipt, vbe Migdọl, Mẹmfis kevbe Tapanhes wẹẹ, ‘Wa mu egbe ne uwa ya gbinna ne egbe uwa; emwi ne uwa mwẹ, a gha fuẹn ehia vbe okuo!

¹⁵ Vbọzẹ ne Apis ne ẹbọ uwa nọkhua na de yi? E Nọyaẹnmwa ọ re ọ gbe ẹe fi otọ!’

¹⁶ Ivbiyokuo uwa hia rrua owẹ, iran dele edọmwadẹ ọghọe gha tama ogieva ẹre wẹẹ, ‘Ẹgiẹgiẹ! Gie ima bu emwa ima gha rrie owa ne a lẹfe vbe obọ umozo avbe eghian.’

¹⁷ “Wa he ọba Igipt eni ọgbọn, ‘Nọfianyanegbe ne olunu ne ọ hoho au.’

¹⁸ Mẹ ne Nọyaẹnmwa ne Oghodua ọrọre ọba. Mẹ ọrọre Osanobua ne ọ rrọọ, zẹ vbene oke Tabọ ghe avbe oke hia ginna otọ, vbene Oke Kamẹl yo gberra uhunmwu okun, erriọ ọ re ẹtin ẹnrẹn khian gha ye ighe ọmwa ne ọ do gu uwa gbinna.

¹⁹ Wa mu egbe ne a ra ya viọ uwa oghunmwu gha rrie, wa ne ivbi Igipt! A gha ye Mẹmfis khian ato, itowa ne ọmwarhọkpa i ye.

²⁰ Igipt ye vbe ẹmila ne mose mose, ne udian ne ọ sa ọmwa ne ọ ke odẹ okuọ rre khu khian.

²¹ Uhin avbe ivbiyokuo ne ọ ve ẹre igho viọ ba egbe, egbe wọ ehia yotọ nẹ zẹ vbe ivbi ẹkhuia ẹmila. Iran ma kpaegbe ne iran gbinna iran hia fi iyeke gbe, iran na lẹẹ ẹdẹ ne iran ra khian rhie sotọ nẹ, ẹdẹ ne iran ra la ọrhiae rrie.

²² Igipt lẹẹ fua ọ gha mẹ khian vbe ẹyẹn, vbe ivbiyokuo avbe eghian, ya egbe dee. Iran ya ughanmwa yaan rẹn, vbe ikpia ni ra tọn erhan gbotọ.

²³ Ne iran na vbe ya ẹgbo khian ne gbẹlẹzẹ. Emwa iran bun gbe, ẹ i gia ka ivbiyokuo iran bun sẹẹ irhiso.

²⁴ A fa ivbi Igipt ua, iran ni ke odẹ okuọ rre khọn iran muotọ, mẹ ne Nọyaẹnmwa taa ẹe nẹ.”

²⁵ E Nọyaẹnmwa ne Oghodua, ne Osanobua Izrẹl wẹẹ, “I gha rria Amọn ikhi, ẹbọ ne Tẹbes gho, ke ẹe kevbe Igipt, deba avbe ẹbọ ẹre kevbe avbe ọba ẹre. I ra mu ọba Igipt kevbe iran ni mu ẹtin ya rẹn.

²⁶ I ghi viọ iran ne emwa ni ho ne iran gbele iran an, ne Nebukiadneza ne Ọba e Babilọn kevbe ivbiyokuo ẹre. Sokpan, ọ ghẹ ghi kpee fua, emwa gha vbe dọlegbe yin Igipt vbene ọ ka ye yi vbe ẹghẹ ne ọ gberra. Mẹ ne Nọyaẹnmwa taa ẹe nẹ.”

E Nọyaẹnmwa Gha Miẹn Emwa Ẹnrẹn Fan

²⁷ “Wa ne emwa mwẹ, wa ghẹ gie ohan mu uwa. Ivbi Izrẹl, wa ghẹ runran. I gha fannọ uwa ke otọe ne ọ rrei nii gha dee, ke otọe ne uwa na re oghunmwu gha dee wa gha werriegbe rri owa. Wa ghi do gha rrọ vbe ọfumwegbe, ẹkun gha sẹ uwa otọ, ọmwa rhọkpa i ghi ra ye do runran uwa.

²⁸ I gha bu uwa rre, I ghi do miẹn uwa fan I gha fuẹn ehia a ighe avbe ẹvbo ne I zagha uwa kui, sokpan, mẹ i ra fuẹn uwa a. Mẹ i ra sẹ uwa rae vbe ne a i na rri uwa oya hiehiere, sokpan, I gha rrie uwa oya, I gha ru ẹe vbe ne ọ kei yi. Mẹ ne Nọyaẹnmwa guaan nẹ.”