Jerimaia 44 - Edo Bible (E Baibol Ẹdo) Version 1996

Uhunmwu Ne Nọyaẹnmwa Giee Gie Ivbi Izrẹl Ni Rre Igipt

¹ E Nọyaẹnmwa keghi gunmwẹ guaan vbekpa ivbi Izrẹl ni rre Igipt, ni rre avbe ẹvbo na ighe Migdọl, Tapanhes, kevbe Mẹmfis kevbe obọ ne ọ laghe odẹ ekẹn vbe ẹvbo nii

² E Nọyaẹnmwa ne Oghodua ne Osanobua Izrẹl wẹẹ, “Aro uwa tobọ uwa sẹ ọyanroua ne I ru e Jerusalẹm re, kevbe avbe okpẹvbo ọvbehe ni rre Juda. ye do sẹ wanwanna, itowa ọ re ehia ye khin, ọmwa rhọkpa i vbe rrọọ.

³ Rhunmwuda, emwa iran ru emwi dan ne iran na ya ohu mu mwẹ. Iran zọ ese ghe avbe ẹbọ ọvbehe; iran kevbe gha ghoo avbe ẹbọ ne iran tobọ iran, ra uwa, ra avbe erha uwa odede ma gho ẹdẹ.

⁴ I kegha giee avbe eguọmwadia mwẹ ighe avbe akhasẹ gie uwa, iran na vbe gha tama uwa ne uwa ghẹ gha ru avbe emwi dan na ne ẹ i yẹ mwẹ.

⁵ Sokpan, wa ma danmwehọ, amawẹ te uwa ghi ra zẹ yọ. Wa ma dobọ emwi dan ne uwa ru yi ra ne uwa dobọ ese ne a zọ ghe ẹbọ yi.

⁶ “Rhunmwuda ọnii, I ke hihiẹẹ ohu kevbe okuosu mwẹ yan avbe ẹvbo ni rre Juda, kevbe avbe idunmwu ni rre Jerusalẹm I na rhu erhẹn ye ehia. A keghi ya ehia khian itowa kevbe ne ọ ghi mianmwẹ ughe, zẹ vbene iran ye ẹdẹ nẹrẹ na.

⁷ Rhunmwuda ọnii nian, te imẹ ne Nọyaẹnmwa ne Oghodua ne Osanobua Izrẹl ghi nọ nian wẹ, vbọzẹ ne uwa na ru egbe uwa emwi oya vbenian yi. Te uwa ho ne ọkhọ rruan ikpia kevbe ikhuo emọ obọ kevbe emọ owẹ, vbene a gha na miẹn wẹ, ẹ i ghi zẹdẹ kẹe vbe emwa uwa?

⁸ “Vbọzẹ ne uwa na ya ẹmwẹ ẹbọ ne uwa gho ya ohu mu mwẹ yi, kevbe ne uwa na zọ ese ghe avbe ẹbọ ọvbehe vbe Igipt vbe emwa na, ehe ne uwa do yin? Te uwa ru ọna ra ne uwa wa ya fuẹn egbe uwa a, ne avbe uhunmwu ẹvbo ni rre otọ agbọn gha ya uwa gbe ogie ne a vbe gha ya uwa tie ihẹn?

⁹ Wa wa mianmian emwi dan hia ne iran ru vbe avbe ẹvbo e Juda nẹ ra, kevbe vbe adesẹ ore e Jerusalẹm ighe avbe erha mwa odede kevbe avbe ọba e Juda kevbe avbe amwẹ iran, kevbe uwa kevbe avbe amwẹ uwa.

¹⁰ Sokpan, do sẹ ẹdẹnẹrẹ na, wa ma ye mu egbe rriotọ. Wa ma he ye ya ọghọ mẹ ra ne uwa gha ya uhi ne I yi ne uwa kevbe avbe erhan uwa odede ru emwi.

¹¹ “Rhunmwuda ọnii nian, mẹ ne Nọyaẹnmwa ne Oghodua, ne Osanobua Izrẹl gha mu aro aa uwa, I ghi fuẹn e Juda hia a.

¹² Zẹvbe ọghe ivbi e Juda ni ghi kee, ni vbe muegbe ne iran kpao gha rrie Igipt ne iran ya yin odọ nii, I gha miẹn wẹ a fuẹn iran hia a. Iran fẹẹrẹ, ke ni kpọlọ kevbe ni kanmwa, ehia gha wulo vbe Igipt, okuo ma ghi gbele iran an, iran gha khian emwi ne ọ mianmwẹ ughe, emwa gha ya iran gbogiẹ a ghi gha ya eni iran tie ihẹn.

¹³ I gha rri iran ni rre Igipt oya, zẹ vbene i vbe ya okuo, ohanmwẹ kevbe emianmwẹ rri e Jerusalẹm oya.

¹⁴ Avbe ivbi e Juda ne a sẹrae, ni vbe dọlegbe gha die Igipt, okpa ne ọ ra miẹn uhunmwu i rrọọ. Ọkpa ne ọ gha werriegbe rrie Juda i rrọọ, ehe ne ọ te khọn iran ne iran dọlegbe ya yin nii. Ọmwa okpa ne ọ gha dọlegbe rre i rrọọ gberra omwa ibọzẹghẹ ni lẹ hin owa rre do lẹre vbe evba.”

¹⁵ Vbe iyekọnii, avbe ikpia hia ni rẹnrẹn ighe avbe amwẹ iran zọ ese ghe avbe ẹbọ ọvbehe, deba avbe ikhuo ni mudia vbe evba, kevbe avbe ivbi Igipt ni rre odẹ ekẹn ọghe Igipt, emwa ni wa bun ẹsẹse, iran keghi tama mwẹ wẹẹ,

¹⁶ “Ma i ra zẹdẹ zẹ ye ẹmwẹ ne u ya eni e Nọyaẹnmwa tama ima.

¹⁷ Emwi ne ima khare ighe ma ra ru hia ọ re ima ra ru. Ma gha zọ ese ghe avbe ẹbọ nokhuo ọghe ima ighe Ọba okhuo ne Ẹrinmwi, ma gha vbe gha sa ayọn ye otọ ne ẹẹn, zẹ vbene ima kevbe avbe erha mwa odede, avbe ọba ima kevbe avbe ọkaolotu ima ka ru ẹe dee yi vbe avbe ẹvbo e Juda, kevbe vbe adesẹ idunmwu ni rre Jerusalẹm. Vbe ẹghẹ nii, evbare keghi maa ne ima ọghe ọkpọkua, te agbọn wa gha maa ima ẹghẹ nii, ma ma vbe gha mwẹ ọlọghọmwa.

¹⁸ Sokpan, ke ẹghẹ ne ima ya dobọ ese ne a zọ ghe Ọba okhuo ne Ẹrinmwi yii gha dee, a na vbe dobọ ayọn ne a sa ye otọ ne ẹẹn yii, ma ma miẹn emwi rhọkpa, emwa ima wulo vbe okuo, ohanmwẹ vbe gbele eso ua.”

¹⁹ Avbe ikhuo ni keghi vbe rhie te ẹe wẹẹ, “Ẹghẹ ne ima na gha fian eka ne a mannọẹn khọ Ọba okhuo ne Ẹrinmwi, a na vbe zọ ese ghe ẹre, ẹko avbe ọdafẹn ima rhiẹnrhiẹn ye emwi ne ima gha ru.”

²⁰ Ẹre ima na tama avbe ikpia kevbe avbe ikhuo ni rhie ewanniẹn na mẹ wẹẹ,

²¹ “Zẹ vbe ese ne uwa kevbe avbe erha uwa odede, avbe ọba uwa kevbe avbe ọkaolotu uwa, kevbe avbe emwa ni rre otọe nii zọre vbe avbe ẹvbo ni rre Juda, kevbe avbe idunmwu ni rre Jerusalẹm, te uwa ro ighe e Nọyaẹnmwa ma rẹn ra, ra te uwa ro ighe ọ mianmian nẹ?

²² Vbe ẹdẹnẹrẹ na nian, ẹvbo uwa khian itowa, ọmwarhọkpa i ghi vbe rrọọ. Ọ khian emwi ne ọ mianmwẹ ughe, te emwa ghi vbe ye eni ẹnrẹn tie ihẹn, rhunmwuda, e Nọyaẹnmwa ma ghi sẹtin fi aro ua ye uyinmwẹ dan, kevbe emwi dan hia ne uwa ru.

²³ Ọkhọ rruan uwa nian rhunmwuda ne uwa na gha zọ ese ghe avbe ẹbọ ọvbehe, wa na vbe ru orukhọ ghe Nọyaẹnmwa vbekpa ne uwa ma na gha ru zẹ vbene ọ khare.”

^24-25 I keghi tama avbe emwa nii hia, kpataki, avbe ikhuo ni rrọọ, vbene e Nọyaẹnmwa ne Oghodua ne Osanobua Izrẹl tama ivbi e Juda ni rre Igipt hẹ wẹẹ, “Ke uwa kevbe avbe amwẹ uwa gba gu Ọba okhuo ne Ẹrinmwi kee ọta nẹ. Wa yan rẹn ighẹ wa gha zọ ese ghe ẹre, wa gha vbe sa ayọn imuohan yotọ ne ẹẹn, wa keghi gele mu ẹẹn sẹ zẹ vbene uwa yan rẹn. Ọ wa ma ẹsẹse khekherriọ! Wa gha mu eyan uwa sẹ! Wa gha ha emwi ne uwa ve!

²⁶ Sokpan, wa danmwehọ nian, eyan ne imẹ ne Nọyaẹnmwa, ya eni mwẹ nọkhua yan ma uwa ne ivbi Izrẹl ni rre Igipt wẹẹ, ‘Mẹ i ghi ra dọlegbe gie ọmwaikọmwa vbe uwu uwa ya eni mwẹ yan emwi wẹ I ya eni e Nọyaẹnmwa ne Udazi ne ọ rrọọ vinhẹn.’

²⁷ “I gha wa ru ẹe wẹ ne agbọn ghẹ dọlegbe ma uwa, we ne uwa hia fuan. Te uwa hia ra wulo. Ne okuo ma gbe, emianmwẹ ghi gbẹe, a te do miẹn wẹ okpa ma ghi kẹe vbe uwu uwa.

²⁸ “Sokpan, ibozẹghẹ vbe uwu uwa gha miẹn uhunmwu, wa ghi werriegbe ke Igipt gha die Juda. Iran ni miẹn uhunmwu nii ọ re ọ ghi ra rẹn ne ẹmwẹ ọnrẹn ghi sẹẹ vbọ, ọghomwẹ ra ọghe iran.

²⁹ Mẹ ne Nọyaẹnmwa gha rhie ama ne uwa ya rẹn wẹ I gha rri uwa oya vbe emwa na kevbe wẹ eyan ne I yan rẹn wẹ I gha gie ọkhọ mian uwa, te ọ ra sẹ.

³⁰ I gha rhie Hofra ne ọba Igipt ye avbe eghian rẹn obọ, iran ni ho ne iran gbe ẹe rua zẹ vbene I rhie Zedekaia ne ọba e Juda ye Nebukiadneza ne ọba e Babilọn obọ, ọmwa ne ọ gha re eghian rẹn ne ọ ho ne ọ gbẹe rua.”