Jerimaia 43 - Edo Bible (E Baibol Ẹdo) Version 1996

A Rhie Jerimaia Gha Rrie Igipt

¹ I keghi talọ emwi hia ne Nọyaẹnmwa ne Osanobua avbe emwa nii giee mwẹ ne I tama iran fo ma iran.

² Ẹre Azaraia ne ovbi e Hosiaia, kevbe Johanan ne ovbi e Karea, kevbe avbe emwa nii hia nekpa fẹẹrẹ na tama mwẹ wẹẹ, “Ohoghe ọ re u ta, e Nọyaẹnmwa ne Osanobua mwa ma gie uẹ ne u tama ima wẹ ne ima ghẹ gha rrie Igipt ne a ya yin odọ nii.

³ E Barọk ne ovbi e Neria ọ re ọ kpe ekpe ruẹ ye ima egbe, ne obọ ivbi e Babilọn miẹn ehe na ke okhunmwu ne ọghe ima ne a miẹn wẹ adeghẹ iran ma ghi gbele ima an, iran ghi viọ ima gha rrie Babilọn.”

⁴ Rhunmwuda ọnii, ke Johanan kevbe avbe ọkaokuo, kevbe emwa nii, ne ọ ghi zẹye ẹmwẹ ne Nọyaẹnmwa tae wẹ ne iran gha rre otọ e Juda, ẹ ighi rrọọ.

⁵ Rhunmwuda ọnii, e Johanan, kevbe avbe ọkaokuo keghi viọ emwa ni ghi kẹe vbe Juda gha rrie Igipt, deba avbe emwa ni ke dọmwadẹ uhunmwu ẹvbo ne a zagha iran kui gha dee.

⁶ Avbe ikpia kevbe ikhuo, ibiẹka kevbe avbe ivbi ọba nikhuo. Iran keghi viọ emwa hia ne arowa ivbiyokuo ighe Nebuzaradan te sẹrae ne Gedalaia gha gbearoghe, kpao kevbe Barọk, kevbe imẹ.

⁷ Iran keghi fieghe uhunmwu ye ẹmwẹ e Nọyaẹnmwa, iran kegha rrie Igipt, iran na la uwu ẹre ya sẹ Tapanhes.

⁸ Evba nii, ọre Nọyaẹnmwa na tama mwẹ wẹẹ,

⁹ “Munọ avbe okuta ni kọnkọn eso ne u tọnnọ iran ye uwu ehe ne a ya owẹ la vbe onurho ne a la ghe owa enọkhaemwisẹ vbe ore ẹvbo na, u ghi vbe gie eso vbe avbe ivbi Izrẹl bẹghe ruẹ vbe u a gha ru ẹe.

¹⁰ Ẹghẹ nii, u ghi ya tama iran wẹẹ, ‘Mẹ ne Nọyaẹnmwa ne Oghodua, ne Osanobua Izrẹl, I gha rhie ẹre gha dee ighe e Nebukiadneza ne ọguọmwadia mwẹ, ọba e Babilọn, ọ ghi gha die emwana, ọ gha mu ẹkete ẹre yan avbe okuta ne u tọnnọ ye evba, ọ ghi vbe tan owa ukpọn ọghe ọba yan rẹn.

¹¹ E Nebukiadneza gha rre do khọn Igipt. Iran ne a kha re ighe emianmwẹ ọ ra gbele iran, emianmwẹ gha gbele iran, iran ne a wẹ te a ra munọ iran oghunmwu gha rrie, a gha munọ iran oghunmwu gha rrie, iran ne a khare ighe te a ra gbele iran vbe okuo, a gha gbele iran vbe okuo.

¹² I gha mu erhẹn ye avbe, owa ẹbọ ni rre Igipt, a deghẹ ọba e Babilọn ma ghi giẹn iran ẹbọ rua, ọ gha hẹ iran gha rrie. Zẹ vbene ọsuohuan rhọ imi hin ukpọn rẹn rre fẹẹrẹ, erriọ ọ re ọba e Babilọn ra rhọ otọ Igipt fo, ọ ghi kpao ke irẹn kevbe akhọnmiotọ.

¹³ Ọ gha guọghọ okuta ne a ma ẹẹn ọghe ighobioye ne ọ rre Heliopolis vbe Igipt, ọ ghi giẹn avbe aro ẹbọ ni rre Igipt sotọ.’ ”