Jerimaia 42 - Edo Bible (E Baibol Ẹdo) Version 1996

Emwa Nii Nọ E Jerimaia Erhunmwu Ne Iran

¹ Ẹre avbe ọkaokuo hia, deba ẹ Johanan ne ovbi e Karea kevbe Azaraia, ne ovbi e Hosiaia na viọ emwa ughughan ni rre ukpo ughughan gha dee,

² iran tama mwẹ wẹẹ, “Lahọ u ghi ru vbene ima tama ruẹn. Na erhunmwu ghe Nọyaẹnmwa Osanobua mwa ne ima. Na erhunmwu ne ima ni miẹn uhunmwu. Ma te ka wa bun yi, u gha miẹn nian wẹ ima ibozẹghẹ ọ re ọ ghi kẹe.

³ Na erhunmwu ne Nọyaẹnmwa Osanobua mwa ma ima odẹ ne ima gha la kevbe emwi ne ima gha ru.”

⁴ Mẹ keghi wanniẹn wẹẹ, “Ọ wa maa ẹsẹse, I gha na erhunmwu ghe Nọyaẹnmwa Osanobua, vbene uwa nọrẹn, emwi ne ọ rhirhi ghi vbe ta, I gha tama uwa. I i ra vbe rhie emwiọkpa lẹre ne uwa.”

⁵ Ẹre iran na tama mwẹ wẹẹ, “E Nọyaẹnmwa ọrọre osẹe ima, adeghẹ ma ma ru vbene e Nọyaẹnmwa wa yi ẹre iyi ne ima hia fẹẹrẹ ne Nọyaẹnmwa la obọ ruẹ rhie ne ima.

⁶ Adeghẹ ọ yẹ ima ra ọ ma yẹ ima, ma gha ru vbene Nọyaẹnmwa Osanobua mwa khare ọmwa ne ima wẹ ne u na erhunmwu ghe ne ima. Emwi hia gha ma ima, adeghẹ ma họn ẹmwẹ ne ẹẹn.”

Ewanniẹn Ne Nọyaẹnmwa Rhie Ne Jerimaia

⁷ Vbe iyeke ikpẹdẹ igbe, e Nọyaẹnmwa keghi gunmwẹ guan.

⁸ Rhunmwuda ọnii, I keghi tie Johanan, avbe ọkaokuo hia ni gu ẹe rrọọ kevbe emwa nekpa hia.

⁹ I keghi tama iran wẹẹ, “E Nọyaẹnmwa ne Osanobua Izrẹl, ọmwa ne uwa gie mwẹ bu khare wẹẹ,

¹⁰ ‘A deghẹ wa ho ne uwa ye gha rre otọe na, ẹghẹ nii, I gha dọlọ uwa yi. I i ghi ra vbe rhia uwa a. I gha mu uwa mudia, I i ra silo uwa vbọlọ. Ọkhọ ne I gie ẹe rruan uwa, wa ya ẹko mwẹ rhiaa ẹsẹse.

¹¹ Wa ghẹ ghi gie ohan ọba e Babilọn mu uwa ọvbehe. I gu uwa rrọọ. I gha vbe miẹn uwa fan hin obọ ẹtin ẹnrẹn rre.

¹² Vbene imẹ na mwẹ itohan nii, I gha ru ẹe ne ọ vbe tohan uwa, ne ọ vbe gie uwa werriegbe gha rrie owa. Mẹ ne Nọyaẹnmwa ọ re ọ taa ẹe.’

^13-15 “Sokpan, ọ ma kei ne uwa ni ghi kẹe ni rre Juda fieghe uhunmwu ye ẹmwẹ e Nọyaẹnmwa ne Osanobua uwa. Ne uwa he ne uwa di otọe na ya. Ọ ma kei ne uwa kha wẹẹ, ‘Ẹn o, te ima rrie Igipt ne ima ya gha rre odọ nii, ehe ne ima i ghi ra na miẹn okuo vbe egbe ọvbehe, ra ne ima ye họn urhu e wa gha die okuo, ra ne ohanmwẹ ye gha gbe mwa.’ Wa gha kha vberriọ, ẹghẹ nii, e Nọyaẹnmwa ne Oghodua, Osanobua Izrẹl khare wẹẹ, ‘Wa gha kha ighẹ te uwa rrie Igipt ne uwa ya yin ẹnrẹn.

¹⁶ Ẹghẹ nii, okuo ne uwa mu ohan rẹn gha khu uwa mu, ohanmwẹ ne uwa mu ohan rẹn gha lele uwa, Igipt vbe odọ niii ọ re uwa ra wulo yi.

¹⁷ Emwa hia ni wa kha ighe Igipt iran ra ya dia, okuo ọ re ọ ra gbele iran, ra ohanmwẹ ra emianmwẹ. Ọkpa ne ọ ra miẹn uhunmwu i rre uwu iran, ọkpa ne ọ gha lẹ ọkhọ ne I ra we ne ọ do rruan iran fe, ẹ i rrọọ.’

¹⁸ “E Nọyaẹnmwa ne Osanobua Izrẹl khare wẹẹ, ‘Zẹ vbe ne a hihiẹẹ izohu kevbe okuosu mwẹ yan ivbi e Jerusalẹm erriọ zẹ ọ re a gha hihiẹ okuosu mwẹ yan uwa adeghẹ wa kpao gha rrie Igipt. Wa gha khian ne ọmianmwẹ ughe, emwa gha ye uwa gha gbogiẹ, wa ghi khian ne a ya tie ihẹn ne ọmwa. Wa ighi dọlegbe ye aro uwa kan emwana ọvbehe.’ ”

¹⁹ Ọre I na rhie te ẹe wẹẹ, “E Nọyaẹnmwa tama uwa na ne ọ ghi kẹe vbe Juda wẹ ne uwa ghẹ dọlegbe gha rrie Igipt. Rhunmwuda ọnii nian, I tama uwa yotọ nẹ o.

²⁰ Ighẹ uwu abakuru nọkhua ọ re uwa wa ye na. Wa ọ re ọ tama mwẹ ne I na erhunmwu ghe e Nọyaẹnmwa ne Osanobua ima ne uwa, wa na vbe yan wẹ, emwi ne ọ rhirhi a khama uwa ne uwa ru, wa gha ru ẹe.

²¹ Banbanna nian, I tama uwa nẹ sokpan, wa wa fieghe uhunmwu ye emwi hia ne Nọyaẹnmwa ne Osanobua ima giee mwẹ wẹ ne I tama uwa.

²² Rhunmwuda ọnii, wa ghi yerre o, okuo ọ re uwa ra wulo yi, ra ohanmwẹ ra emianmwẹ ọ re ọ ra gbele uwa a vbe ẹvbo ne uwa khare ighe wa ra gha rrie ne uwa ya yin ẹnrẹn.”