Jerimaia 41 - Edo Bible (E Baibol Ẹdo) Version 1996

¹ Vbe uki ne ogihinrọn ọghe ukpo nii, Ismaẹl ne ovbi e Natanaia kevbe eyẹ Elisiama, okpa vbe uniẹn ivbiọba, kevbe okpa vbe uwu avbe ekhaẹmwẹ nekhua ọghe ọba, keghi viọ arhingbe ba egbe ne iran ya miẹn e Gedalaia ne Nọkhaemwisẹ. Ehe ne iran hia na wa gha rri evbare nii.

² Ismaẹl kevbe arhingbe ni gu ẹe rre evba nii keghi yuolo umozo iran ladian, iran na gbe Gedalaia a.

³ Ismaẹl keghi vbe gbele ivbi Izrẹl hia ne iran vbe Gedalaia gba rre Mizpa, kevbe ivbiyokuo e Babilọn ne ọ vbe kee ye evba.

⁴ Ẹdẹ ne ọ lelẹe, vbe ọmwaikọmwa te do rẹn wẹ iran gbe Gedalaia a.

⁵ Arhin iyenẹ keghi ke Siẹkẹm rre, kevbe Silo kevbe Sameria iran zẹlẹ ẹtu iran, iran keghi sọlọ ukpọn iran, iran vbe ya emwi valọ egbe iran. Iran keghi viọ ọka kevbe eturari mwẹ ne iran ya yo imuohan vbe Ọgua Osa.

⁶ Rhunmwuda ọnii, Ismaẹl keghi kpao vbe Mizpa rre ne ọ ya vba iran, ọ keghi gha viẹ vbene ọ wa khian nii. Ọ ghi sẹ ehe ne iran ye ọ wẹẹ. “Lahọ, wa la owa do miẹn e Gedalaia.”

⁷ Iran ghi wa da la ore ẹvbo nii ọwarọkpa, Ismaẹl kevbe emwa nii keghi gbele iran an, iran na viọ ikun iran ku uwu uhae.

⁸ Sokpan, arhin erẹnrẹn vbe uwu iran, keghi tama Ismaẹl wẹẹ, “Lahọ, ghẹ gbele ima an, ma mwẹ ọka, ọka irhuarhua kevbe ofigbọn ne ima viọ lẹre ye uwu oha.” Ẹre ọ na sẹ iran rae.

⁹ Uhae ne Ismaẹl filo ikun emwa ne ọ gbele kui keghi gha re nọkhua ne Asa ne ọba fiaẹn vbe Baasia ne ọba Izrẹl gu ẹe khọn. Ismaẹl keghi ya ikun iran ran uhae nii.

¹⁰ Iyekọnii, ọ keghi viọ avbe ivbi ọba nikhuo oghunmwu, deba avbe emwa ni ghi dekẹe vbe Mizpa, avbe emwa ne Nebuzaradan ne arowa ivbiyokuo viọ ne Gedalaia ne ọ gha gbearoghe. Ismaẹl keghi viọ ehia oghunmwu, ọ na de yan okhian ghe odẹ otọ Amọn.

¹¹ E Johanan kevbe avbe ọkaokuo ni gu ẹe rre evba keghi họn uza ne Ismaẹl do.

¹² Iran keghi rhunmwuda ọnii viọ emwa iran, iran khu ẹe, obọ iran keghi vba ẹre vbe ọkpẹn ọghọdọ nọkhua ne ọ rre Gibiọn.

¹³ Ugbẹn vbe avbe oghunmwu Ismaẹl ghi bẹghe Johanan kevbe avbe ọkaolotu ivbiyokuo nii gue ẹe, iran na ghọghọ ua,

¹⁴ iran fi ọdelegbe, iran na rhulẹe bu iran.

¹⁵ Sokpan, Ismaẹl kevbe erẹnrẹn vbe uwe iran ne iran gba rrọọ, keghi lẹẹ fe Johanan, iran keghi lẹ gha rrie otọe Amọn.

¹⁶ Ẹre Johanan kevbe ọkaokuo ivbiyokuo ni gu ẹe rrọ na gha gbearoghe avbe emwa ne Ismaẹl munọ ẹre oghunmwu kpao vbe Mizpa, iyeke vbe ọ gbe Gedalaia a nẹ, ena kegha re, avbe ivbiyokuo, ikhuo, ibiẹka kevbe avbe ọghẹrriẹnoguan.

^17-18 Ohan ivbi e Babilọn kegha mu iran rhunmwuda Ismaẹl gbe ẹe rua ighe Gedalaia ne ọba e Babilọn ya maa enọkhaemwisẹ ye otọe nii rhunmwuda ọnii, iran keghi ya gbe odẹ Igipt ne iran miẹn ehe na lẹ fe vbe obọ ivbi e Babilọn. Iran ghi khian nii, iran keghi yakọ vbe Kimham vbe ọkpẹn e Bẹtlẹhẹm.