Jerimaia 40 - Edo Bible (E Baibol Ẹdo) Version 1996

E Jerimaia Tota Ke Gedalaia

¹ E Nebuzaradan ne arowa ivbiyokuo ghi fan mwẹ fua nẹ, vbe Rama, e Nọyaẹnmwa keghi gunmwẹ guan. Te a ya ọgiọrọ rro mwẹ mu gha rrie evba deba avbe emwa nekpa ne ivbi e Jerusalẹm kevbe Juda ne a viọ ẹre oghunmwu rrie Babilọn.

² Arowa ivbiyokuo keghi rhie mwẹ ghe efọnkpa, ọ wẹẹ, “E Nọyaẹnmwa ne Osanobua ruẹ niẹn obọ ye ẹvbo na aro wẹ ọkhọ gha rruan rẹn,

³ banbanna nian, ọ ru nẹ vbene ọ khare ighe rẹn gha ru. Avbe emwi na hia sunu rhunmwuda ighe emwa ruẹn ru orukhọ ghe Nọyaẹnmwa iran ma vbe họn ẹmwẹ ne ẹẹn.

⁴ Banbanna nian, I ra rhan ọgiọrọ hin ruẹn urhu abọ rre ne I fan an fua. A deghẹ u ho ne u lele mwẹ gha rrie Babilọn, u sẹtin ru vberriọ, I gha gbearoghe ruẹ. Sokpan, a deghẹ u i ho ne u gha khian, ai ra vbe gba ru ẹe. Otọe ẹvbo na hia rre evba ne u gha na zẹ, u sẹtin gha rrie ehe ne ọ yẹ ruẹ.”

⁵ Ugbẹn vbe I ma ghi rhie ewanniẹn ne ẹẹn, e Nebuzaradan keghi kha wẹẹ, “Bu ẹre gha khian ighe e Gedalaia ne ovbi Ahikam ne ọ vbe re eyẹ e Siafan, ne ọba Babilọn ya ru ne ọkhaemwisẹ yan avbe ẹvbo e Juda. U sẹtin gu ẹe tota deba avbe emwa nii, ra u sẹtin gha rrie eheikehe ne ọ ghi khọn ruẹn wẹ u gha yo.” Ẹre ọ na do ya emwi mẹ, ọ kevbe viọ evbare mẹ ni viọ gha khian, ọ na sẹ mwẹ rae ne I kpao.

⁶ I keghi bu e Gedalaia vbe Mizpa, I na gu avbe emwa ni ghi kẹe vbe ẹvbo nii tota.

E Gedalaia Ne Nọkhaemwisẹ E Juda

⁷ Eso vbe uwu ekhaẹmwẹ kevbe ivbiyokuo e Juda ma ladian do gbe lahọ. Iran keghi họn wẹ ọba e Babilọn ye Gedalaia ru enọkhaemwisẹ otọe nii, ọ vbe maa e Gedalaia enọkhaemwisẹ yan iran hia ne a ma viọ kpao gha rrie e Babilọn, avbe emwa ni ghi ru ivbiogue sẹẹ vbe otọe nii.

⁸ Ẹre Ismaẹl ne ovbi e Natanaia, e Johanan ne ovbi e Karea, e Seraia ne ovbi e Tanhumet, avbe ivbi Efaia ni ke Nẹtofa rre, kevbe Jezenia ne ọ ke Maaka rre na bu e Gedalaia gha rrrie Mizpa.

⁹ E Gedalaia keghi tama iran wẹẹ, “Mẹ ọ re ọ tama uwa nian wẹ ne uwa ghẹ fian afianma rhọkpa, ne uwa ya rinmwian ivbi e Babilọn. Wa gbe ẹkun sẹ otọ vbe emwa na, wa gha ga gie ọba e Babilọn.

¹⁰ Mẹ tobọmwẹ gha mudia vbe Mizpa ne I gha ta ne unu uwa vbe ivbi e Babilọn a rre. Sokpan, wa sẹtin gualọ ayọn gha viọ hin rre, kevbe emwiokọ kevbe ofigbọn oliv, ne uwa vbe yin avbe igue ne uwa ye.”

¹¹ Vbe ẹghẹ ne a kha na avbe ivbi Izrẹl hia ni rre Moab, Amọn, Idọm kevbe avbe ẹvbo ọvbehe keghi họọn wẹ ọba e Babilọn kue ne ivbi Izrẹl eso ye gha rre Juda, kevbe wẹ ọ ya Gedalaia ru ne ọkhaemwisẹ yan iran.

¹² Iran keghi rhunmwuda ọnii kpao vbe avbe ehe ne iran te ka zagha lele, iran na werriegbe gha die Juda. Iran keghi bu e Gedalaia gha die Mizpa, iran keghi si ayọn kevbe emwiokọ ọrhẹnrhẹn gbo vbe evba.

Iran Gbe Gedalaia a

¹³ Vbe iyekọna, e Johanan kevbe avbe ọkaolotu ivbiyokuo ni ma rinmwian, keghi bu e Gedalaia gha dee.

¹⁴ Iran tama rẹn wẹẹ, “U ma rẹn nian wẹ e Balis ne ọba Amọn gie Ismaẹl wẹ ne ọ do gbe uẹ ua.” Sokpan, e Gedalaia ma yayi.

¹⁵ Ẹre Johanan na hẹko tama rẹn wẹẹ, “Gun mwẹ ya gbe Ismaẹl rua, ọmwarhọkpa i vbe rẹn ọmwa ne ọ ru ẹe. Vbọzẹ ne a gha na rhie otọ ne ẹẹn ne ọ ya gbe uẹ ua. Ọnii gha zagha avbe Ju ni te do lẹga ruẹ na hia kua, ọ ghi vbe si ọfuan gie emwa hia ni rre Juda.”

¹⁶ Sokpan, e Gedalaia wanniẹn wẹẹ, “Ghẹ ru ẹe! Ẹmwẹ ne u tae vbe ekpa Ismaẹl na i re ẹmwata.”