Jerimaia 4 - Edo Bible (E Baibol Ẹdo) Version 1996

A Tie Ye Afiwerriẹ

¹ E Nọyaẹnmwa khare wẹẹ, “Ivbi Izrẹl, adeghẹ wa ho ne uwa fiwerriẹ, wa fiwerriẹ, bu mwẹ gha dee. Adeghẹ wa viọ avbe amazẹ ni sọnnọ mwẹ kua, wa na mudia ke mwẹ ẹse,

² ọ sẹtin gha re emwi ne ọ kere ne uwa, ne uwa gha ye eni mwẹ vinhẹn. Ẹghẹ nii avbe uhunmwu ẹvbo hia gha rinmwian mwẹ ne I fiangbe iran, iran ghi vbe gha rho mwẹ.”

³ E Nọyaẹnmwa tama ivbi Juda kevbe Jerusalẹm wẹẹ, “Wa gua otọ ne uwa ma he te gua, wa ghẹ kọ emwi ye uwu igban.

⁴ Wa ya ile ne uwa gu imẹ ne Nọyaẹnmwa uwa ta gha ru emwi, ne uwa ye egbe uwa fiohan mẹ, wa ne ivbi e Juda kevbe ivbi e Jerusalẹm. Adeghẹ wa ma ru vberriọ, ohu mwẹ gha vẹn zẹ vbe erhẹn rhunmwuda emwi dan hia ne uwa he ru. Ọ gha vẹn, orhunmwu ọkpa ne ọ gha dọ ẹre yọ irrọọ.”

A Họẹn Ighe Okuo Die Juda

⁵ Wa si orhu la otọe nii hia! Wa kporhu ne ọ la ke ne ọ gia họn! Wa tama ivbi e Juda kevbe ivbi e Jerusalẹm ne iran lẹ gha rrie ẹvbo ne a gbe odin gaa.

⁶ Wa ma iran odẹ Zaiọn! Wa lẹ ne uwa fe vbe ẹbe. Wa ghẹ rhọ eghẹrẹ! E Nọyaẹnmwa mu ọfuan kevbe omurhia nọkhua ke odẹ okuọ dee.

⁷ Zẹvbe oduma ne ọ ke ehe ne ọ lẹre yi dee. Onii ne ọ rẹnkhẹn ẹvbo ua la odẹ nẹ. Ọ dee do rẹnkhẹn e Juda. Te a ra ye avbe ẹvbo ni rre Juda khian itowa ọmwa ne ọ gha yin ẹnrẹn i ghi rrọọ.

⁸ Rhunmwuda ọnii wa viọ ukpọn akhiẹ yọ, wa gha tu wa gha viẹ egbe. Rhunmwuda, ohu nọkhua ọghe Nọyaẹnmwa ma he la hin e Juda uhunmwu rre.

⁹ E Nọyaẹnmwa khare wẹẹ, “Ẹdẹ ne ẹdẹrriọ, egbe gha wọ avbe ọba kevbe avbe ekhaẹmwẹ, orrirri gha gbe ku avbe ohẹn, ọ gha yan avbe akhasẹ unu uan.”

¹⁰ Ẹghẹ nii ọ re imẹ na kha wẹẹ, “E Nọyaẹnmwa ne Udazi, uwa hiẹ ivbi e Jerusalẹm fẹẹrẹ. U te kha wẹ ọfumwegbe gha rrọọ, a rhie umozo yan iran ẹho.”

¹¹ Ẹghẹ dee, ne a gha na tama ivbi e Jerusalẹm ighe ẹhoho ne ọ kaka emwi ruan hoho ke odẹ ato bu iran dee. Ẹ i re ẹhoho ne wẹlẹẹ ne ọ hoho ihunhun kua kẹkan.

¹² Ẹhoho ne Nọyaẹnmwa ra gie rre gha wegbe sẹ ọnii ẹsẹse! E Nọyaẹnmwa tobọ ẹre ọ re ọ bu ohiẹn emwa rẹn.

Eghian Lẹga E Juda

¹³ Ghe vbe eghian nii wa dee zẹ vbe ubimwẹ amẹ. Avbe ikẹkẹ okuo ẹre yevbe ẹhoho ẹziza, okhian kẹ avbe ẹsin okuo ẹre sẹ oghohọn. Ma wiri, ọghe ima fo.

¹⁴ E Jerusalẹm, kpe ọkhọ hin uwu ekhọe ruẹ rre, ne u miẹn ehe na miẹn uhunmwu. Vbe u a gha zẹ iro dan kpee sẹhẹ vbe ekhọe ruẹ?

¹⁵ Emwa ne a gie ẹre uhunmwu ke Dan kevbe avbe uhunmwu oke Ifreim gha dee, ọ re ọ do na iyẹn dan nii.

¹⁶ Iran rre do tama avbe uhunmwu ẹvbo nii yotọ, iran ke tama Jerusalẹm wẹ avbe eghian wa ke ẹvbo ne ọ rrei okpa dee. Avbe eghian na gha go ye avbe okpẹvbo e Juda uhunmwu,

¹⁷ iran ghi vbe lẹga e Jerusalẹm zẹvbe emwa ni khẹ ugbo; rhunmwuda, iran sọtẹ ghe Nọyaẹnmwa nẹ. E Nọyaẹnmwa tae nẹ.

¹⁸ E Juda, vbene u ya gha yin hẹ kevbe avbe emwi ne u gha ru ọ re u ya sii emwi na ye egbe ruẹ egbe. Orukhọ ruẹ ọ re ọ sii usẹ na rre. Ọ bi agbada ye uwẹ ogiudu nẹ nian.

Akhiẹ Ne Jerimaia Khiẹ Ne Emwa Rẹn

¹⁹ Obalọ ẹre! Egbe mwẹ i rrọ obalọ ẹre, udu mwẹ! Udu mwẹ wa fi kpikpikpi I i sẹtin hunwan, i họn ẹmwẹ avbe okpe nii, deba ugomwẹ okuo.

²⁰ Ọfuan okpa lele ọvbehe itowa ọre ẹvbo nii hia ghi khin. Iran dunmwu agọ ima hia vbe udomwurri iran yanghan ukpọn onurho ni rrọ ua.

²¹ Inu ẹghẹ I ra ghe okuo ne ọ khọn ni la vbotọ ne I vbe gha họn ulamwẹ okpe?

²² E Nọyaẹnmwa khare wẹẹ, “Akpa ọ re avbe emwa mwẹ khin, iran ma rẹn mwẹ. Iran ye vbe emọ ni kọẹn iran imwẹ irẹnmwi hiehiere. Iguẹsẹ iran khin vbe emwi dan ne a ru emwi esi ne a ru i dunna ne iran.”

E Jerimaia Miẹn Umian Ọfuan Ne Ọ Dee

²³ I tọn aro mu ghe otọ agbọn, ọ keghi wa gha re ehe nẹi mọ ọmọ, ehe ne ọ rhiara. I ghe odukhunmwu uwanmwẹ i rrọọ.

²⁴ I tọn aro mu ghe avbe oke nekhua, ehia ke gha guọ zẹzẹzẹ, avbe oke negiẹrẹ kegha de yo de rre.

²⁵ I keghi miẹn wẹ emwa i rrọ hiehiere, uhin ighe te avbe ahianmwẹ wa tinnọ kua.

²⁶ Otọe ne ọ te ma emwiokọ khian ato, ẹvbo nekhua, ni rrọọ khian itowa, rhunmwuda ohu nọkhua ọghe Nọyaẹnmwa.

²⁷ (E Nọyaẹnmwa tae nẹ, wẹ otọ agbọn hia gha khian ne ọ rhia ẹe, sokpan wẹ rẹn i ra fuẹn ọnrẹn uan fẹẹrẹ.)

²⁸ Otọ agbọn gha khiẹ, iso gha so ebiebi, erriọ Nọyaẹnmwa khare, ẹ i ra fi ẹe werriẹ. Ọ ta emwi ne irẹn ra ru ne, ẹ i ghi vbe kie werriegbe vbọ.

²⁹ A ghẹ ghi họn owogho avbe iran ni hin ẹsin ke ni viọ uhanbọ mwẹ dọmwadẹ ọghọe gha lẹ fua. Eso gha lẹ la uwu ẹgbo, eso gha lẹ mu uhunmwu okuta nekhua hin, a gha sẹ dọmwadẹ ẹvbo rae vbe ihoi, a i ghi miẹn ọmwa ne ọ gha diẹe ya ọvbehe.

³⁰ E Jerusalẹm, ọwuẹ fo! Vbe u a ghi na ya ododo han hẹ yi? Vbe u a na viọ ikpẹrọnmwọ ye egbe hẹ? Ne u na vbe ba itiro? Te u wa te egbe ne u ba gha mose kẹkan, avbe enida ruẹ hee uẹ yotọ ne, iran ho ne iran gbuẹ ua.

³¹ I họn urhu eve ọkpa, ọ yevbe ọghe okhuo, ne emwi ubiẹmwẹ ru, vbe ọ khian biẹ ọmọ okaro. Utumwẹ e Jerusalẹm nọ, ọ gha hẹwẹ ukuke, o nien obọ ladian gha kha wee, “I wiri! Iran ra do gbe mwẹ uan.”