Jerimaia 39 - Edo Bible (E Baibol Ẹdo) Version 1996

Udemwẹ E Jerusalẹm

¹ Vbe uki ne ogigbe ọghe ukpo ne ogihinrin ne Zedekaia kegha re ọba e Juda, e Nebukiadneza ne ọba e Babilọn keghi viọ avbe ivbiyokuo ẹre gha die Jerusalẹm, ọna do gha khọn rẹn.

² Vbe ikpẹdẹ ne ogihinrin ọghe uki ne ogienẹ, vbe ukpo ne ogiowọrọ ne Zedekaia yae vbe ọba, iran keghi ha ekẹn ne a gbe lẹga ẹvbo gberra.

³ (Iran ghi khọn mu e Jerusalẹm nẹ, avbe ekhaẹmwẹ nekhua hia ọghe ọba e Babilọn kegha die Onurho Adesẹ, iran na do totaa, ne usun ọ re iran ye ighe Negal Sareza, Semga Nebo, e Sasiekim deba Negal Sareza ọvbehe.)

⁴ Ugbẹn vbe Zedekaia ne ọba kevbe avbe ivbiyokuo ẹre ghi miẹn vbene emwi ye hẹ, iran kegha ho ne iran lẹkua hin ẹvbo rre vbe asọn. Iran keghi la odẹ ogba ọghe ọba, iran na lele onurho ne ehe ne ekẹn ọlẹga eva na vba egbe iran na lẹẹ mu aro da odẹ Iya e Jọdan.

⁵ Sokpan, ivbiyokuo e Babilọn keghi zẹẹ iran khu, obọ iran keghi vba e Zedekaia vbe otọe ne ọ rriẹe vbe ọkpẹn e Jẹriko. Iran keghi mu ẹẹn gie ọba Nebukiadneza ne ọ gha rre Ribla vbe otọ Hamat, evba nii ọ re Nebukiadneza na bu abe gbe ẹe.

⁶ Ọ keghi gbele ivbi Zedekaia nikpia vbe Ribla vbe Zedekaia wa rre evba ghe ẹre. Ọ kevbe giagia avbe ekhaẹmwẹ e Juda uhunmwu kua.

⁷ Vbe iyeke ọnii, ọ keghi wọlọ e Zedekaia aro kua, ọ na ya ọgiọrọ rrọ ẹre wẹ ne a do mu ẹẹn gha rrie Babilọn.

⁸ Vbe uwu ẹghẹ na, ivbi Babilọn keghi giẹẹn ẹguae ọba sotọ ke ẹe kevbe owa avbe emwa nii, iran keghi vbe guọghọ ekẹn ne a gbe lẹga e Jerusalẹm kua.

⁹ Vbe okiekie ehia, e Nebuzaradan ne arowa ivbiyokuo keghi viọ avbe emwa ni ghi kẹe vbe ẹvbo nii gha rrie e Babilọn, deba avbe emwa ni ka lẹ bu ẹre.

¹⁰ Ọ keghi sẹ usun iran ni ghi ru ivbiogue sẹẹ rae ye Juda, avbe emwa ne ẹ i mwẹ emwi rhọkpa, ọ keghi munọ ogba azara kevbe oha ne iran.

Ufanmwẹ E Jerimaia

¹¹ Sokpan e Nebukiadneza ne ọba keghi tama Nebuzaradan ne arowa ivbiyokuo ne ọ yae gie uhunmwu vbenian.

¹² “Wa ya gualọ e Jerimaia, ne uwa gbearoghe ẹre ẹsẹse, wa ghẹ kuan ẹre egbe sokpan, wa ru emwi ne ọ rhirhi nọ ne ẹẹn.”

¹³ Rhunmwuda ọnii, e Nebuzaradan, ke ẹe kevbe avbe ọkaokuo ẹre ni kọnkọn ighe avbe Nebuzaradan, e Negal, e Sareza deba avbe ekhaẹmwẹ ọba e Babilọn ni dekẹe hia.

¹⁴ Na do rhie mwẹ ke uwu ẹguae ladian. Iran keghi rhie mwẹ ne ẹẹn gha gbearoghe ighe e Gedalaia ne ovbi Ahikam kevbe eyẹ e Siafan, ne a wa vbe tama wẹ ne ọ miẹn wẹ I sẹ owa vbe egbe hẹnnẹdẹn Ẹre I na ghi gu avbe emwa nii tota ye evba.

Idaehọ Ẹbẹdmẹlẹk

¹⁵ Ẹghẹ ne a na mu mwẹ khui ye ẹguae, e Nọyaẹnmwa keghi giee mwẹ wẹ,

¹⁶ ne I tama Ẹbẹdmẹlẹk ne ovbi e Sudan wẹ e Nọyaẹnmwa ne Oghodua ne Osanobua Izrẹl khare wẹẹ, “Zẹ vbene I tae, ọkhọ ọ re I ra wẹ ne ọ rruan ẹvbo na ighe ẹ i re ọmaa, emwi na gha sunu, wẹ gha rre evba ne u bẹghe ẹre.

¹⁷ Sokpan, mẹ ne Nọyaẹnmwa gha degue ruẹ, ai ra rhie ruẹ ne avbe emwa ne afianma rẹn fian an.

¹⁸ I gha degue ruẹ, ai ra gbe uẹ ua. U gha miẹn uhunmwu rhunmwuda u mu ẹtin ruẹn yan mwẹ. Mẹ ne Nọyaẹnmwa ọ re ọ taa ẹe.”