Jerimaia 38 - Edo Bible (E Baibol Ẹdo) Version 1996

E Jerimaia Vbe Uwu Uhae Ne Ọ Kaa Nẹ

¹ E Siefanaia ne ovbi e Matan, e Gedalaia ne ovbi e Pasiọ, e Jehukal ne ovbi e Malkaia keghi họn wẹ, I gha tama avbe emwa vbene

² e Nọyaẹnmwa khare wẹẹ, “Ọmwaikọmwa ne ọ tota ye ẹvbo na, okuo, ra ohanmwẹ ra emianmwẹ gha gbe ẹe sokpan, ọmwaikọmwa ne ọ ladian, ọ na ya rhie egbe ẹre ye ivbi e Babilọn obọ, a i ra gbe ẹe rua, ọ gha ghi ba gbe, ọ gha miẹn uhunmwu, rẹn vbe ikpakpauhunmwu ẹnrẹn okpa kẹkan.”

³ I keghi vbe gha tama iran wẹ e Nọyaẹnmwa khare wẹẹ, “Te I ra mu ẹvbo na ne ivbiyokuo e Babilọn, iran gha vbe khọn rẹn muotọ.”

⁴ Ẹre avbe ekhaẹmwẹ na na ya tama ọba wẹẹ, “Te ọ kere ne a gbe ọmwa na an. Ẹmwẹ ne ọ guan na te ọ ya ye egbe wọ avbe ivbiyokuo ni rre ẹvbo, erriọ ọ re ọ vbe ru avbe emwa ni rre ore ẹvbo hia. Ẹ i re te ọ zẹdẹ yi avbe emwa ni obọ, te ọ ho ne ọ kuan iran egbe.”

⁵ E Zedekaia ne ọba keghi wanniẹn wẹẹ, “Ọ maa khekherriọ, wa ru ẹe vbene uwa ho ne uwa ru ẹe, mẹ I ra da uwa obọ yi.”

⁶ Rhunmwuda ọnii, iran keghi mu mwẹ. Iran keghi ya irri mu mwẹ fi uwu uhae e Malkaia ne Okoro, ore ẹguae ọ re nene uhae ye. Amẹ i ghi rre nene uhae, ekhuọrhọ okpa ọ re ọ ghi rrọọ, ọ keghi ziẹn mwẹ.

⁷ Vbene ọ rhirhi a gha ye hẹ, Ẹbẹdmẹlẹk ne ovbi e Sudan ọghẹrriẹnoguan ne ọ winna vbe ẹguae, keghi họọn wẹ iran mu mwẹ fi uwu uhae. Vbe ẹghẹ ne a kha na, ọba keghi bu ohiẹn emwi vbe onurho e Bẹnjamin.

⁸ Ẹbẹdmẹlẹk kegha khian, ọ na ya tama ọba wẹẹ,

⁹ “U gha tọ u kpẹre Umogun, emwi ne iran na ru i maa. Iran ya mu e Jerimaia fi uwu uhae, agbọn hia rẹnrẹn wẹ, te ohanmwẹ ra gbe ẹe rua ye evba rhunmwuda evbare i ghi rre ẹvbo.”

¹⁰ Ẹre ọba na tama Ẹbẹdmẹlẹk wẹ ne ọ viọ arhin eha ba egbe ne ọ do si mwẹ ladian vbe uhae nii ne I ghẹ wu.

¹¹ Ẹre Ẹbẹdmẹlẹk na viọ emwa nii ba egbe gha rrie uwu aza ẹguae, ọ na ya viọ osọnmwẹ ukpọn eso vbe evba, ọ na viọ ẹre ye irri gun mwẹ.

¹² Ọ keghi tama mwẹ wẹ ne I viọ avbe osẹ mwẹ ukpọn nii ye ototọ irere ne i rri ghẹ bolo mwẹ egbe. I keghi ru vberriọ.

¹³ Iran keghi sii mwẹ ladian hin uwu uhae nii rre. Vbe iyekọni, a na ghi da mwẹ yi ye uwu ẹguae.

E Zedekaia Do Nọ Ibude Vbe Obọ e Jerimaia

¹⁴ Ọ ghi vbe sẹ ẹghẹ ọvbehe, e Zedekaia ne ọba keghi giee ne a tie mwẹ gha die onurho Ọgua Osa ne ogieha ọ keghi tama mwẹ wẹẹ, “I ho ne I nọ ruẹn ota okpa, u ghi wa ta ẹmwata ne ọ rrọ ma mwẹ.”

¹⁵ Mẹ keghi wanniẹn wẹẹ, “Deghẹ I ta ẹmwata ma ruẹn, u gha gbe mwẹ uan, I gha bu ruẹ ude u i ra zẹ yọ mwẹ ẹre.”

¹⁶ E Zedekaia ne Ọba keghi rhunmwuda ọnii yaan ma mwẹ vbe ẹkhokho wẹẹ, “I ya Osanobua ne ọ rrọọ vẹn ihẹn, Osanobua ne ọ rhie arrọọ ne ima wẹ mẹ i ra gbe uẹ ua ra ne I siọ rhie fi iran obọ ighẹ iran ni ho ne iran gbe uẹ ua.”

¹⁷ Ẹre I na tama e Zedekaia wẹ e Nọyaẹnmwa ne Oghodua, ne Osanobua Izrẹl khare wẹẹ, “U gha tobọ rhie egbe ruẹ ne avbe ekhaẹmwẹ e Babilọn, ai ra gbe uẹ ua, ai ra vbe giẹn ẹvbo na sotọ. Ke uwa kevbe ẹgbẹe ruẹ, a i ra gbele uwa a.

¹⁸ Sokpan, a deghẹ u ma rhie egbe ruẹ ne iran, ẹghẹ nii, a gha mu ẹvbo na ne ivbi e Babilọn iran gha giẹn ọnrẹn sotọ, wẹ i ra vbe sẹtin lẹ iran fẹe.”

¹⁹ Sokpan, ọba keghi wanniẹn wẹẹ, “Ohan avbe ivbi ẹvbo ima ni he lẹ bu ivbi e Babilọn mu mwẹ, iran sẹtin rhie mwẹ ne iran, ne iran rriọmwẹ oya ẹkẹkhẹrhẹ.”

²⁰ Mẹ keghi kha wẹẹ, “A i ra rhie ruẹ ne iran. I rinmwian ne u danmwehọ uhunmwu ne Nọyaẹnmwa gie rre, emwi hia ghi wa gha ma ne uẹn, ai ra vbe gbe uẹ ua.

²¹ Sokpan, e Nọyaẹnmwa rhie ma mwẹ nẹ vbe umian emwi ne ọ gha sunu adeghẹ u ma rhie egbe uẹ ne iran.

²² “Vbe umian nii, I keghi bẹghe vbe a viọ avbe ikhuo ne a sẹrae vbe ẹguae Juda bu ekhaẹmwẹ e Babilọn khian. Danmwehọ emwi ne iran gha ta vbe iran khian: “ ‘Avbe ọse ọba ni sikẹ ọba sẹẹ ọ re ọ bibi ẹre odẹ, iran keghi khuan ẹre ẹmwẹ uan, eban na, owẹ ọre ghi ziẹn ye uwu ọrho nẹ, avbe ọse ọre lẹẹ sẹ ọe rae.’ ”

²³ Mẹ keghi rhie te ẹe wẹẹ, “A gha viọ avbe amwọ ọn kevbe ivbi uẹ gie ivbi e Babilọn, wẹ tobọruẹ i ra vbe lẹ iran fe. Ọba e Babilọn gha mu uwẹ oghunmwu gha rrie a gha vbe giẹn ẹvbo na muotọ.”

²⁴ E Zedekaia keghi wanniẹn wẹẹ, “Ghẹ gie ọmwaikọmwa họn vbekpa iyẹn ne ima gba ghae na, emwi rhọkpa i ra vbe ru uẹ.

²⁵ Avbe ekhaẹmwẹ gha họn ighẹ I guẹ gha iyẹn, iran gha do nọ ruẹn, ẹmwẹ ne ima tae. Iran gha yan wẹ, u gha talọ ẹmwẹ ne ima tae hia ma iran, iran I ra gbe uẹ ua.

²⁶ U ghi tama iran wẹ te u gha rinmwian mwẹ ne I ghẹ dọlegbe rhie ruẹ gha rrie ẹwẹdọ ne u ya wu ye evba.”

²⁷ Ẹre avbe ekhaẹmwẹ hia na rre do gha nọ mwẹ ọta I keghi tama iran vbene ọba wẹ ne I tama iran zẹẹ. Iran ma ghi miẹn emwi ru, rhunmwuda ọmwa rhọkpa ma họn iyẹn ne ima gba ghae.

²⁸ Iran keghi sẹ mwẹ rae ye uwu ẹguae ọ te do sẹ ikpẹdẹ ne iran khọn mu e Jerusalẹm.