Jerimaia 37 - Edo Bible (E Baibol Ẹdo) Version 1996

Emwi Ne Zedekaia Nọ Vbe Obọ E Jerimaia

¹ E Nebukiadneza ne ọba e Babilọn keghi ya Zedekaia ne ovbi e Josaia rriọba e Juda ye ihe Jehoiakin ne ovbe Jehoiakim.

² E Zedekaia kevbe ekhaẹmwẹ ọnrẹn kevbe avbe emwa nii, ne ọ zẹye uhunmwu ne Nọyaẹnmwa gie mwẹ re i rrọọ.

³ E Zedekaia keghi giee Jehukal ne ovbi e Sielemia kevbe Zẹfanaia ne ovbi Maaseia wẹ ne ọ do tama mwẹ ne I na erhunmwu ghe Nọyaẹnmwa Osanobua ne ẹvbo mwa.

⁴ A ma he mu mwẹ ye eghan ẹghẹ nii, I he ye sẹtin gha khian la ehe ne ekhọe mwẹ ho vbe ehe ne emwa nii ye.

⁵ Ivbiyokuo keghi wa ghae ga e Jerusalẹm vbe ẹghẹ na gha gu ẹe khọn, sokpan, iran ghi họn ighe ivbiyokuo Igipt gberra uwu Igipt nẹ, iran keghi werriegbe.

⁶ Ẹre Nọyaẹnmwa ne Osanobua Izrẹl na tama mwẹ.

⁷ Ne I ya tama e Zedekaia wẹẹ, “Ivbiyokuo Igipt wa dee nian ne iran do yuọ obọ, sokpan, iran gha werriegbe.

⁸ Iyekọni, ivbi e Babilọn gha werriegbe rre, iran gha dekun ẹvbo na, iran ghi khọn mu ẹẹn, iran ghi giẹn ọnrẹn sotọ.

⁹ Mẹ ne Nọyaẹnmwa ọ re ọ tama uwa nian ne uwa ghẹ ya gha rẹrẹ egbe uwa, ne uwa gha ro ighe avbe ivbi e Babilọn i ghi dọlegbe dee rhunmwuda, iran gha rre.

¹⁰ Gia kha i ghẹ te uwa gele sẹtin khọn ne obọ uwa ke ukhunmwu ne ivbiyokuo e Babilọn sẹrriọ wẹ iran ne a kuanrẹn okpa ọ re ọ ghi kẹe ye uwu owa ukpọn iran ne iran lovbiẹ yi, te iran na ye kpaegbe, iran ghi giẹn ẹvbo na muotọ.”

A Mu E Jerimaia Khui

¹¹ Ivbiyokuo e Babilọn keghi kpao hin e Jerusalẹm rre rhunmwuda ighe ivbiyokuo Igipt dee.

¹² Ẹre mẹ na kpao vbe Jerusalẹm ne I gha rrie otọ e Bẹnjamin ne I ya viọ emwi ewe ne ọ sẹ mwẹ obọ vbe ọghe ẹgbẹe.

¹³ Sokpan, I ghi sẹ Onurho e Bẹnjamin arowa ne ọ gbearoghe avbe ivbiyokuo ni winna vbe evba, ọmwa ne a tie eni ẹnrẹn Irigia ne ovbi Sielemia kevbe eyẹ, Hananaia, keghi mu mwẹ mudia ọ wẹẹ, “Te u lẹ bu ivbi e Babilọn khian.”

¹⁴ Mẹ keghi wanniẹn, “Ohoghe nọ! Ẹ i zẹdẹ re te I lẹ khian.” Sokpan Irigia ma zẹ yẹ mwẹ re. sokpan, ọ keghi mu mwẹ gie avbe ekhaẹmwẹ.

¹⁵ Ohu mwẹ keghi wa mu iran hia ẹsẹse, iran na giee ne a gbe mwẹ, iran na ya mu mwẹ khui ye owa e Jonatan ne ọgbenbe ẹguae, ne a ghi ya owa ẹre ru ẹwẹdọ.

¹⁶ Iran keghi mu mwẹ ye ugha oleghan ne ọ rre uwu otọ, a keghi gun mwẹ kpee vba ẹsẹse.

¹⁷ Ọ ghi kpee kherhe, e Zedekaia ne Ọba keghi gie ne a tie mwẹ, ọ keghi hẹko nọ mwẹ vbe uwu ẹguae wẹẹ, “E Nọyaẹnmwa giee uhunmwu rre ra.” I keghi wanniẹn, I tama rẹn wẹẹ, “Ọ giee rre, ọ wẹ a gha mu ẹẹn rhie ye ọba e Babilọn obọ.”

¹⁸ Ẹre I na ghi nọ ẹnrẹn wẹẹ, “De aighẹru ne I mobọ ru uwẹ re, ra ekhaẹmwẹ ruẹn, ra avbe emwa na ne u mu mwẹ ye eghan ba?

¹⁹ Iran ghi vbo yi ighe avbe akhasẹ ni tama ruẹn ighe ọba e Babilọn i ra guẹ khọn, ra ne ọ khọn ẹvbo na?

²⁰ Banbanna nian, lahọ danmwehọ mwẹ Umogun, ne u vbe ru vbene I ra tama ruẹn. Lahọ ghẹ ghi rhie mwẹ werriegbe gha rrie eghan ne ọ rre owa e Jonatan. U gha rhie mwẹ gha khian, I gha wu ye evba.”

²¹ Rhunmwudọnii, e Zedekaia ne ọba na ghi wẹ ne a khui mwẹ ye ẹwẹdọ ne ọ rre ọre ẹguae. Evba ọ re I ghi gha ye, iran keghi gha mu ududu ẹbrẹd ọkpọkpa ke ehẹn ne a na le gunmwẹ ẹdẹgbegbe, a te miẹn wẹ ebrẹd fo vbe ore ẹvbo na hia fẹẹrẹ.