Jerimaia 36 - Edo Bible (E Baibol Ẹdo) Version 1996

E Barọk Tie Ebe Ohian Ni Vbe Ọgua Osa

¹ Vbe ukpo ne ogienẹ ne Jehoiakim ne ovbi e Josaia kegha re ọba e Juda e Nọyaẹnmwa keghi ta ma mwẹ wẹẹ,

² “Rhie ebe ohian, ne u gbẹnnẹ emwi hia ne I he tama ruẹn vbekpa e Juda, Izrẹl, kevbe avbe uhunmwu ẹvbo hia nekpa yọ. Wa gbẹnnẹ emwi hia ne I he tama ruẹn yọ, ke ẹghẹ ne I na ka wa gha guẹ guan, ẹghẹ ne Josaia na gha re ọba do sẹ ẹdẹ ne ẹre na.

³ Ọ gha kẹe, ivbi Izrẹl gha họn ọkhọ ne I khare ighe ọ dee ra do rruan iran, iran gha zobọ vbe emwi dan ne iran ru. Ẹghẹ nii, mẹ ghi ya uyinmwẹ dan kevbe ọkhọ ne iran ru bọ iran.”

⁴ Rhunmwuda ọnii, mẹ keghi tie Barọk ne ovbi e Neraia, I keghi talọ ẹmwẹ hia ne Nọyaẹnmwa tama mwẹ ma rẹn. E Barọk keghi gbẹnnẹ ehia ye ebe ohian.

⁵ Ẹre I na ghi tama e Barọk wẹẹ, “Iran i ghi gunmwẹ la uwu Ọgua Osa sokpan,

⁶ I gha ho ne uwẹ gha khian vbe ẹghẹ ne iran gha na dọlegbe gha rre aguẹ. U ghi tie ebe ohian na ladian, ne emwa họn avbe ẹmwẹ ne Nọyaẹnmwa tama mwẹ kevbe wẹ mẹ ọ re ọ talọe nuẹn gbẹnnẹ. U ghi ru emwi na vbe ehe ne emwa hia gha na sẹtin họẹn, ya sẹ egbe avbe ivbi e Juda ni ke ẹvbo iran ladian gha dee.

⁷ Ughaghe, iran gha na erhunmwu ghe Nọyaẹnmwa, ne iran vbe fiwerriẹ hin odẹ dan iran rre, rhunmwuda, e Nọyaẹnmwa niẹn obọ ye emwa rẹn aro nẹ vbe uwu ohu kevbe okuosu ẹre ne ọ mu ohan.”

⁸ Ẹre Barọk na gele ya tie ẹmwẹ e Nọyaẹnmwa nii vbe uwu Ọgua Osa, vbene I wa tama rẹn zẹẹ wẹ ne ọ ru.

⁹ Vbe uki ne ogihinrin, ọghe ukpo nogisẹn ne Jehoiakim na gha re ọba e Juda, avbe emwa nii keghi yo aguẹ ya gualọ aro ne ọ maa vbe obọ e Nọyaẹnmwa. Emwa hia ni rre Jerusalẹm deba avbe emwa ni kee avbe okpẹvbo ni rre e Juda rre ọ re ọ yo aguẹ na.

¹⁰ Ehe ne emwa hia na wa danmwehọ nii e Barọk keghi tie avbe ẹmwẹ hia ne I taa ye ebe ohian nii ladian. Ọgua Osa ọ re ọ na tie ẹre vbe ughugha e Gemaraia ne ovbi e Siafan, ne ọgbenbe ẹguae. Ọgua ne ọ ke ukhunmwu, ọ re ughugha ẹre ye vbe ọkpẹn Onurho Ọgbọn ọghe Ọgua Osa.

A Tie Ebe Ohian Nii Ma Avbe Ekhaẹmwẹ

¹¹ E Mikaia ne ovbi Gemaraia ne ọ vbe re eyẹ e Siafan keghi họọn vbe Barọk tie ẹmwẹ e Nọyaẹnmwa ne ọ rre ebe ohian nii.

¹² Rẹn keghi wa gha rrie ẹguae ọba, ọ na wa gha rrie ughugha ọgbenbe ẹguae, ehe ne avbe ekhaẹmwẹ hia na gha do iko, iran na kegha re Elisiama ne ọgbenbe ẹguae, e Delaia ne ovbi e Siemaia, Elnatan ne ovbi Akbọ, e Gemaraia ne ovbi Siafan, e Zedekaia ne ovbi Hananaia, avbe ekhaẹmwẹ nekpa hia kevbe gha rre evba.

¹³ E Mikaia keghi talọ emwi hia ne ọ họẹn vbe Barọk tie ebe ma avbe emwa nii, ma iran.

¹⁴ Ẹre avbe ekhaẹmwẹ nii na gie Jehudi (ne ovbi e Natanaia, eyẹ Sielemia kevbe ihiẹnhiẹn e Kusi) ne ọ ya tama e Barọk wẹ ne ọ mu nene ebe ohian ne ọ tie ma avbe emwa nii rre. E Barọk keghi mu nene ebe ohian gie iran.

¹⁵ Iran keghi tama rẹn wẹẹ, “Tota ne u tie nene ebe ohian ma ima.” Ẹre Barọk na ru vberriọ.

¹⁶ Ugbẹn vbe ọ ghi tie ẹre nẹ, afianma keghi fian dọmwadẹ ọghọe, iran na ya ghe egbe aro, iran keghi tama e Barọk wẹẹ, “Te ima gha ta ọna ma ọba.”

¹⁷ Iran keghi nọ rẹn wẹẹ, “Tama ima nian, vbe u a ya gbẹnnẹ ena hia hẹ yi. Te Jerimaia talọe ma ruẹn ne u gha gbẹn ọẹn ra?”

¹⁸ E Barọk keghi wanniẹn wẹẹ, “Te Jerimaia talọ ẹmwẹ ni rre evba hia mẹ ne I gbẹn, ọ re I na ye ẹmu gbẹnnẹ ehia ye ebe ohian.”

¹⁹ Iran keghi tama rẹn wẹẹ, “Wẹ vbe Jerimaia hẹko ya lẹre wa ghẹ gie ọmwarhọkpa rẹn ehe ne uwa ye.”

Ọba Giẹẹn Ebe Ohian Ni Uan

²⁰ Avbe ekhaẹmwẹ keghi mu ebe ohian nii ye ughugha Elisiama ne ọgbenbe ẹguae, iran na gha rrie ugha ọba, iran na ya talọ emwi hia ma ọba.

²¹ Ẹre ọba na wẹ ne Jehudi ya mu nene ebe ohian rre. Ọ keghi ya mu ẹẹn ke ughugha Elisiama rre, ọ na tie ẹre ma ọba kevbe avbe ekhaẹmwẹ hia ni mudia lẹga ẹre nii.

²² Ẹghẹ okhuakhua nọ, ọba keghi tota ye ọkpẹn erhẹn vbe ẹguae ẹghẹ okhuakhua ẹre.

²³ Ọwarọkpa vbe Jehudi ghi tie ọgbagba eha ra enẹ nẹ, ọba keghi ye ovbi abẹe ne ọ guee giagiae ọ na hẹ ku erhẹn erriọ ọ re ọ wa gha ru ẹe khian, a te do miẹn wẹ ebe nii hia giẹn uan.

²⁴ Sokpan ke ọba kevbe avbe ekhaẹmwẹ ọnrẹn ne ọ họn ẹmwẹ na hia, ọkpa ne ohan vbe mu, ra ne ọ vbe rhie ma wẹ ọ da iran ẹ i rrọọ.

²⁵ A gha rhe miẹn wẹ Elnatan, Delaia kevbe Gemaraia te rinmwian ọba wẹ ne ọ ghẹ giẹn ọnrẹn uan, ọ ma zẹye iran ẹre.

²⁶ Ẹre ọ na wẹ ne Okoro ighe Jeramil, kevbe Seraia ne ovbi Azriẹl kevbe Sielemia ne ovbi Abdil munọ imẹ kevbe ọgbenbe mwẹ ighe Barọk, sokpan, e Nọyaẹnmwa keghi viọ ima lẹre.

E Jerimaia Gbẹn Ebe Ohian Ọvbehe

²⁷ Ugbẹn vbe Jehoiakim ghi giẹẹn ebe ohian ni ne I ka talọ ma e Barọk nẹ ọ gbẹnnẹ nẹ, e Nọyaẹnmwa keghi tama mwẹ.

²⁸ Wẹ ne I rhie ebe ohian ọvbehe ne I gbẹnnẹ emwi hia ne ọ ka gha rre nọkpa yọ.

²⁹ E Nọyaẹnmwa keghi tama mwẹ ne I tama ọba wẹẹ, “U giẹẹn ebe ohian ni nẹ, u keghi vbe nọ e Jerimaia wẹ vbọzẹ ne ọ na gbẹn wẹ ọba e Babilọn gha rre do fuẹn ẹvbo ni uan, ọ ghi gbele emwa kevbe aranmwẹ ni rrọọ.

³⁰ Rhunmwuda ọnii nian, mẹ ne Nọyaẹnmwa tama ruẹn, wẹ ne Jehoiakim ne ọba wẹ, a i ra miẹn ovbuẹ ne ọ gha rriọba yan otọ arriọba e Devid. A gha mu ikun ruẹn fua fi ehe ne ovẹn gha na gha gbe ẹe vbe avan amẹ ghi gha guẹguẹ yan rẹn vbe asọn.

³¹ I gha rri uwẹ oya, ivbi uniẹn ruẹn kevbe avbe ekhaẹmwẹ ruẹn rhunmwuda orukhọ ne uwa hia ru. Ke uwẹ kevbe ivbi e Jerusalẹm kevbe ivbi e Juda ne ọ zẹyọ obọ ne i ya sekhae ne iran irrọ, rhunmwuda ọnii, ọkhọ ne I khare ighe ọ gha rruan uwa, te I ra mu ẹẹn sẹ.”

³² Ẹre I na dọlegbe rhie ebe ohian ọvbehe, I na rhie ẹre ne Barọk ne ọgbenbe mwẹ. Ọ keghi gbẹnnẹ emwi ne I talọ ma rẹn ne ọ gbẹnnẹ yotọ. Ọ keghi gbẹnnẹ emwi hia ne ọ gha rre ebe n okaro kevbe avbe uhunmwu ọvbehe ne I vbe talọ ma rẹn ne ọ gbẹnnẹ.