Jerimaia 35 - Edo Bible (E Baibol Ẹdo) Version 1996

E Jerimaia Kevbe Ivbi E Rekab

¹ Ẹghẹ ne Jehoiakim ne ovbi e Josaia ne gha re ọba e Juda, e Nọyaẹnmwa keghi tama mwẹ wẹẹ, “Bu ivbi ẹwae.

² Rekab gha khian ne u ya gu iran guan, iyekọnii, u ghi viọ iran gha die ughugha okpa vbe Ọgua Osa, u ghi sa ayọn ne iran.”

³ Rhunmwuda ọnii, I keghi wa viọ ivbi ẹwae Rekab hia, avbe Jaazanaia (ovbi ọmwa ọvbehe okpa ne avbe tie ẹre Jerimaia ne ovbi e Hebazinaia) kevbe avbe etiọnrẹn nikpia kevbe avbe ivbi ẹre nikpia. I keghi viọ iran hia gha die Ọgua Osa.

⁴ I keghi viọ iran gha die ughugha erhuanegbe akhasẹ ne a tie ẹre Hanan, ovbi Igdalaia, ughugha na keghi rre odukhunmwu ughugha ọghe Maaseia ne ovbi e Sialọm, ọkhaẹmwẹ kpataki vbe Ọgua Osa, ọ keghi vbe sikẹ ughugha avbe ekhaẹmwẹ nekpa.

⁵ Ẹre I na viọ ukpu kevbe ọkpan ni vuọn ne ayọn yotọ ne ivbi e Rekab na, I na tama iran wẹẹ, “Wa da ayọn.”

⁶ Sokpan, iran keghi wanniẹn wẹẹ, “Ma i da ayọn. Erha ima odede ighe Jonadab ne ovbi e Rekab tama ima wẹ ke ima kevbe ivbi uniẹn ima, ne ọ gha da ayọn rhọkpa i rrọọ.

⁷ Ọ vbe tama ima wẹ ne ima ghẹ bọlọ owa ra ne a vbe mu ugbo ra ne a vbe mu ugbo azara, ra na a vbe dẹ. Ọ tama ima ne a gha di owa ukpọn ya ne ima miẹn ehe na gha rre ẹvbo ne ima ye na zẹ vbe erriọvbe.

⁸ Te ima wa ru zẹ vbene Jonadab tama ima. Ma tobọ ima i da ayọn, avbe amwẹ ima i vbe da kevbe ivbi ima nikpia kevbe nikhuo.

^9-10 Ma i bọlọ owa ne ima gha ye, owa ne a ya ukpọn bọ ọ re ima dia, ma i mwẹ ugbo azara ra ugbo ra ọka. Te ima wa ru emwi hia fẹẹrẹ ne Jonadab ne erha ima odede tama ima.

¹¹ Sokpan ugbẹn vbe Nebukiadneza ghi mu okuo la ẹvbo na, ọ re ima na wẹ ne a gha die Jerusalẹm ne a miẹn ehe na lẹfe vbe obọ ivbiyokuo e Babilọn kevbe Siria. Ọnii ọ sii ẹe ne ima na rre Jerusalẹm.”

^12-13 Ẹre Nọyaẹnmwa ne Oghodua, ne Osanobua Izrẹl na tama mwẹ wẹ ne I gha khian ya tama ivbi e Juda kevbe Jerusalẹm wẹẹ, “Mẹ ne Nọyaẹnmwa, nọ uwa emwi ne ọ zẹe ne uwa na wẹ wa i họn ẹmwẹ mẹ zẹ vbene I ma uwa ẹre.

¹⁴ Ivbi e Jonadab wa ru vbene ọ tama iran ne iran wẹ ghẹ da ayọn, ye do sẹ ẹdẹ nẹrẹ na, ne ọ da i rre uwu iran. Sokpan, vbe ne I yan gu uwa guaan sẹ, wa ma họn ẹmwẹ mẹ.

¹⁵ I gie avbe eguọmwadia mwẹ i ghe avbe akhasẹ gie uwa, iran vbe tama uwa ne uwa mu emwi dan ne uwa ru fua ne uwa gha ru emwi ne ọ gbae, iran tama uwa ne uwa ghẹghi ga avbe ẹbọ ọvbehe, ne uwa miẹn ehe na gha yin otọe nii ne I mu ne uwa kevbe avbe erha uwa odede. Sokpan, wa ma danmwehọ mwẹ a ma wẹ te uwa ghi ra zẹ yọ mwẹ re.

¹⁶ “Ivbi e Jonadab ru zẹ vbene erha iran odede tama iran, sokpan, wa na ma hẹnmwẹ mẹ.

¹⁷ Rhunmwuda ọnii nian. Mẹ ne Nọyaẹnmwa ne Osanobua Izrẹl, gha gie ẹe gele rruan uwa ne ivbi e Juda kevbe ivbi e Jerusalẹm avbe ọkhọ ne I khare ighẹ ọ gha rruan uwa. I gha ru ẹe vberriọ rhunmwuda wa ma danmwehọ mwẹ vbe I gu uwa guan, wa ma khuẹnniẹn mwẹ vbe I tie uwa.”

¹⁸ Ẹghẹ nii ọ re I na tama ivbi uniẹn e Rekab wẹ e Nọyaẹnmwa ne Oghodua ne Osanobua Izrẹl khare wẹẹ, “Wa gele ru vbene Jonadab ne erha uwa odede tama uwa, igiodẹ ne ọ ru ma uwa, ọ re uwa wa lele, wa keghi vbe ru avbe emwi hia ne ọ wẹ ne uwa ru.

¹⁹ Rhunmwuda ọnii mẹ ne Nọyaẹnmwa ne Oghodua ne Osanobua Izrẹl vbe yan nẹ wẹ a i ra miẹn ẹdẹ we ovbi e Rekab ne okpia ma gha rrọ ne ọ gha ga mwẹ.”