Jerimaia 34 - Edo Bible (E Baibol Ẹdo) Version 1996

Uhunmwu Ne A Giee Gie Zedekaia

¹ Ẹghẹ ne Nebukiadneza ne ọba e Babilọn ke ẹe ke ivbiyokuo ẹre, na gha khọn e Jerusalẹm kevbe avbe ẹvbo ni dekẹe, vbe avbe agbọn ẹvbo hia ni ga gie ẹe na vbe viọ obọ ye ọre iyeke, e Nọyaẹnmwa keghi gun mwẹ guaan.

² E Nọyaẹnmwa ne Osanobua Izrẹl keghi tama mwẹ wẹ ne I gha khian ya tama e Zedekaia ne ọba e Juda wẹẹ, “Mẹ ne Nọyaẹnmwa gha mu ẹvbo ne ọba e Babilọn, ọ gha giẹn ọnrẹn uan sotọ.

³ Wẹ i ra lẹ fe a gha khu uẹ mu, a ghi mu ẹẹn ne ẹẹn. U gha ye aro kan ẹre aro, u ghi vbe gu irẹn tobọ ẹre guan, iyekọni, u ghi gha rrie Babilọn.

⁴ E Zedekaia, danmwehọ ẹmwẹ ne I ta vbe ekpa ruẹ na. A i ra gbua vbe okuo.

⁵ Ẹghẹ ọfumwegbe ọ re u ra na wu zẹ vbene emwa giẹẹn eturari, ẹghẹ ne iran na ree avbe erha odede, iran ni rriọba ke aro ne uẹn, erriọ ọ re iran ra vbe giẹn eturari ne uẹn. Iran gha khiẹ ruẹ iran ghi kha wẹẹ, ‘Owẹn ọba mwẹ de okun!’ Mẹ ne Nọyaẹnmwa ọ re ọ taa ẹe.”

⁶ Ẹre I na ya taa uhunmwu na ma Ọba Zedekaia vbe Jerusalẹm.

⁷ Vbe avbe ivbiyokuo ọba e Babilọn wa gu ẹvbo ni khọn. Ivbiyokuo keghi wa vbe gha khọn vbe Lakis kevbe Azẹka, ni re ẹvbo eva ni ghi kẹe vbe avbe ẹvbo ne a gbe odin gaa vbe Juda.

Avbe Eviẹn Ne A Kpeyakuẹ

⁸ E Zedekaia ne ọba kevbe avbe emwa ni rre Jerusalẹm keghi taa ẹe wẹ iran ra fannọ avbe eviẹn kua ke

⁹ ikpia kevbe ikhuo ni re ivbi e Hibru vbene a gha na miẹn wẹ a ma ghi miẹn ovbi Izrẹl ne ọ mwẹ ọviẹn ne ọ vbe re ovbi Izrẹl ne ihua ẹre.

¹⁰ Avbe emwa nii hia kevbe avbe ọkaolotu iran keghi ye obọ yọ wẹ iran gha fannọ avbe eviẹn iran kua.

¹¹ Sokpan, iyekọni, iran keghi vbe fi ekhọe werriẹ, iran tie werriegbe, iran keghi ya obọ yẹn iran ẹho ne iran dọlegbe gha re eviẹn.

¹² Ẹre Nọyaẹnmwa,

¹³ ne Osanobua Izrẹl na tama mwẹ, wẹ ne I ya khama avbe emwa nii wẹẹ, “Ẹghẹ ne I na viọ avbe erha uwa odede ke Igipt ladian, I gu iran taa ile, I keghi fannọ iran ke ọviẹn ladian. I keghi tama iran wẹ,

¹⁴ ukpo ihinrọn hia, ọ re iran gha ya gha fannọ avbe eviẹn iran ni re ivbi e Hibru kua vbe iran a ghi ga iran la ukpo ehan nẹ. Sokpan, avbe erha uwa odede ma zẹyọ mwẹ re, ama ghi wẹ te iran ra danmwehọ ẹmwẹ ne I tae.

¹⁵ Vbe nẹdẹ eso na, wa keghi fi ekhọe werriẹ, wa na ru vbene ogha yẹ mwẹ. Wa hia keghi ya obọ yọ, wa na wẹ wa ra fannọ avbe eviẹn uwa ni re ivbi Izrẹl kua, wa hia na sirra mwẹ taa ile vbe Ọgua Osa vbe ehe ne a na ga mwẹ.

¹⁶ “Sokpan, wa na vbe dọlegbe fi ekhọe werriẹ, wa na yagha mwẹ. Wa hia kevbe viọ iran ne uwa te ka fannọ kua vbene ọ yẹ iran, wa keghi dọlegbe ye obọ yẹn iran ẹho khian eviẹn.

¹⁷ Rhunmwuda ọnii nian, mẹ ne Nọyaẹnmwa khare wẹ wa yaan mwẹ zẹ, wa ma fannọ ivbi Izrẹl ne ihua uwa kua. Vbene ọ ghi na ye rrio nian khekherriọ, mẹ gha gie uwa zẹ ne ọ yẹ uwa, ne uwa zẹ wẹ okuo ọ ra gbẹ uwa, ke ohanmwẹ kevbe emianmwẹ. I gha gie avbe uhunmwu ẹvbo otọ agbọn hia runran ye emwi ne I ra ru uwa ẹre.

^18-19 Avbe ekhaẹmwẹ e Juda kevbe Jerusalẹm deba avbe ekhaẹmwẹ ẹguae, avbe ohẹn kevbe avbe ọkaolotu hia gun mwẹ taa ile, vbekpa ne iran na khian la adesẹneva ekhuia ẹmila ne iran gbe fian ye iheva gberra. Sokpan, iran rraa nene ile, iran ma vbe mu ẹmwẹ ne ọ rrọ sẹ. Rhunmwuda ọnii, vbene iran ru ẹkhuia ẹmila nii ọ re I ra ru iran.

²⁰ I gha viọ iran ne avbe eghian iran ni ho ne iran gbele iran an, ahianmwẹ kevbe aranmwẹ oha ọ re ọ ra rri ikun iran.

²¹ “I gha vbe si e Zedekaia ọba e Juda kevbe avbe ekhaẹmwẹ ọnrẹn yan iran ni ho ne iran gbele iran an obọ. I gha viọ iran yan ivbiyokuo e Babilọn obọ, iran ni te dobọ igbinna ne iran gu uwa gbinna yi nẹ.

²² I gha tae, iran ghi werriegbe gha di ẹvbo na. Iran ghi dekun ẹnrẹn, iran ghi khọn mu ẹẹn, iran ghi giẹn ọnrẹn sotọ. I gha ye avbe ore nọkhua ni rre Juda khian emwi ne ọ ye vbe ato, ehe ne ọmwarhọkpa i ye. Mẹ ne Nọyaẹnmwa taa ẹe nẹ.”