Jerimaia 33 - Edo Bible (E Baibol Ẹdo) Version 1996

Eyan Idaehọ Ọvbehe

¹ Ehe ne I na rre eghan vbe ẹghodo ẹguae nii, e Nọyaẹnmwa keghi dọlegbe gie uhunmwu gunmwẹ.

² E Nọyaẹnmwa ne ọ yi agbọn, ne ọ ma ẹẹn ọ na mu ẹẹn gbọ ye ehe ne ọ ye, ọ gunmwẹ guan. Ọmwa ne eni ẹnrẹn re Nọyaẹnmwa; ọ na kha wẹẹ,

³ “Kpe tie mwẹ, I gha khuẹnniẹn. uẹn I gha ta ẹmwẹ ọyunnuan ni mu ohan ne u ma he rẹn emwirhọkpa vbe ekpa ẹre ma ruẹn.

⁴ Mẹ ne Nọyaẹnmwa ne Osanobua Izrẹl tae wẹ avbe owa e Jerusalẹm kevbe ẹguae ọba e Juda, gha khian ne a siẹẹn sotọ rhunmwuda okuo ne ọ ghae ga ẹre kevbe igbinna na.

⁵ Eso gha gu ivbi e Babilọn gbinna, emwa ni gha ya ẹe vuọn avbe owa ni hia ighẹ ikun emwa ne I gha gbe ku otọ vbe uwu ohu kevbe okuosu mwẹ. I fi iyeke gbe hin ẹvbo na egbe rre nẹ rhunmwuda avbe emwi dan ne emwa ni rrọọ ru.

⁶ Sokpan, I gha mu ẹvbo na egbe rran, kevbe emwa ni rrọọ, I ghi gie egbe rran iran. I gha rhie ọfumwegbe nọkhua kevbe ẹkun ne ọ sotọ ẹsẹse ne iran.

⁷ I gha ya Juda kevbe Izrẹl khian ne agbọn marẹn ẹsẹse, I ghi dọlọ iran bọ ne iran do gha ye vbene iran ka gha ye ẹghẹ ne ọ gberra.

⁸ I gha khue iran huan hin orukhọ ne iran ru ghe mwẹ, I ghi vbe ya orukhọ kevbe isọtẹ iran bọ iran.

⁹ E Jerusalẹm ghi do gha re ne ọ ya ọyẹnmwẹ sẹ mwẹ, ne ọ mwẹ uyi, kevbe ne ọ ghan, ohan gha mu avbe uhunmwu ẹvbo hia ni rre agbọn na iran ghi vbe gha guọ vbe iran a họn emwi ni maa ne I ru ne Jerusalẹm, kevbe ọmaa ne agbọn ne I viọ la ẹvbo nii.”

¹⁰ E Nọyaẹnmwa keghi kha wẹẹ, “Emwa ta ẹe khian wẹ, te emwana ye vbe ato, kevbe wẹ emwa nagbọn ra aranmwẹ oha i rrọọ. Ẹmwata ọre iran tae, avbe okpẹvbo ni rre Juda, kevbe idunmwu ni rre Jerusalẹm, ehia divbiẹ, emwa nagbọn i rre evba, aranmwẹ i rrọọ sokpan, wa gha dọlegbe họn.

¹¹ Urhu ne ọ la ọghe oghọghọ kevbe ọyẹnmwẹ, kevbe uwemwẹ ẹko rhiẹhrhiẹn mwẹ ọghe evbare irhiọha. Wa gha họn vbe emwa na a gha sihuan viọ imuohan ekpọnmwẹ die Ọgua Osa mwẹ, iran ghi kha wẹẹ, “ ‘Wa rhie ekpọnmwẹ ne Nọyaẹnmwa ne Oghodua, rhunmwuda, rẹn maa, itẹbitẹ ọ re ahoẹmwọmwa rẹn khin.’ I gha ya otọ nii khian ne agbọn maa rẹn zẹ vbe ne ọ ka ye dee ẹdẹ. Mẹ ne Nọyaẹnmwa ọ re ọ taa ẹe.”

¹² E Nọyaẹnmwa ne Oghodua khare wẹẹ, “Vbe otọe na ne ọ yevbe ato, ehe ne emwa nagbọn ra aranmwẹ i ye na, a gha dọlegbe miẹn ehe ne avbe aranmwẹ na rria vbọ, ehe ne avbe ọsuohuan gha sẹtin viọ ohuan iran gha yo.

¹³ Vbe adesẹ ore ẹvbo avbe uhunmwu oke, kevbe avbe ototọ oke, kevbe ahọ ọghe Juda, vbe agbọn ẹvbo e Bẹnjamin, igue hia ni lẹga Jerusalẹm, kevbe avbe okpẹvbo ni rre e Juda, ẹre avbe ọsuohuan gha na vbe dọlegbe gha ka ohuan iran, mẹ ne Nọyaẹnmwa, taa ẹe nẹ.”

¹⁴ E Nọyaẹnmwa keghi kha wẹẹ, “Ẹghẹ dee ne I gha na mu eyan ne I yaan ne ivbi Izrẹl kevbe Juda sẹ.

¹⁵ Ẹghẹ nii, I ghi zẹ ovbi uniẹn e Devid ne ọ maa, zẹ vbe ọba. Ọba nii gha ru emwi ne ọ ghae kevbe ne ọ hẹnhẹn vbe otọe nii hia.

¹⁶ A gha fan ivbi e Juda kevbe Jerusalẹm vbe irri, iran ghi gha rrọọ vbe a i mwẹ ẹbe. A gha gha tie ẹvbo ni ‘E Nọyaẹnmwa ne Ọmiọnmwafan mwa.’

¹⁷ Mẹ ne Nọyaẹnmwa yanrẹn wẹ te a gha miẹn ivbi uniẹn Devid ne ọ gha rriọba rhinrin vbe Izrẹl.

¹⁸ Kevbe wẹ te a gha vbe gha miẹn ohẹn rhinrin vbe ẹwae Livai, ne ọ gha ga mwẹ ne ọ gha vbe gha yo imuohan ọka gunmwẹ, ne ọ vbe gha zọ ese.”

¹⁹ E Nọyaẹnmwa keghi tama mwẹ wẹẹ.

²⁰ “Mẹ gu avan kevbe asọn taa ile nẹ, vbene a gha na miẹn wẹ iran rre ye ẹghẹ iran zẹẹ, ile nii, a i sẹtin rra ẹre.

²¹ Erriọ vbe nọ, I gu e Devid ne ọguọmwadia mwẹ taa ile nẹ wẹ, ẹ i mwẹ a ma miẹn ovbi uniẹn ọnrẹn ne ọ gha rriọba. Erriọ I vbe gu avbe ohẹn ta ile, iran ni re ivbi uniẹn e Livai wẹ iran ọ ra gha ga mwẹ, avbe ile na, a i sẹtin rra ẹre.

²² I gha muan ivbi uniẹn e Devid ne ọguọmwadia mwẹ, kevbe avbe ohẹn ne ivbi uniẹn e Livai sẹrriọ wẹ a i ra sẹtin ka iran zẹ vbene a i sẹtin ka avbe orhọnmwẹ ni rre aro iso ra ikpẹkhae ni rre ọkpẹn okun.”

²³ E Nọyaẹnmwa keghi tama mwẹ wẹẹ,

²⁴ “U ma miẹn vbene emwa tae khian hẹ wẹ mẹ he Izrẹl kevbe Juda yotọ nẹ, ẹgbẹe eva ne imẹ hannọ zẹ. Iran keghi rhunmwuda ọnii, gha ye aro gbe emwa mwẹ re, iran i ghi vbe ka iran ye uhunmwu ẹvbo.

²⁵ Sokpan, mẹ ne Nọyaẹnmwa gu avan vbe asọn ta ile nẹ, mẹ ọ re ọ yii uhi ne ọ khaemwisẹ yan otọ vbe ukhunmwu.

²⁶ Zẹ vbene I wa vbe ru ena gbangbaangban, erriọ I ra ye obọ mu ile ne I gu ivbi uniẹn e Devid taa. I gha zẹ ovbi uniẹn e Devid ọkpa, ne ọ gha khaemwisẹ yan ivbi uniẹn Ebraham, Aizik kevbe Jekọb. I gha tohan emwa mwẹ, I ghi vbe ru ẹe ne agbọn dọlegbe maa iran.”