Jerimaia 32 - Edo Bible (E Baibol Ẹdo) Version 1996

E Jerimaia Dẹ Ako Oha

¹ Ọ ghi rre ukpo igbe ne Zedekaia la ẹkete zẹ vbe ọba e Juda, ne ọ vbe re ukpo evairrọvbugie ne Nebukiadneza ke gha re ọba e Babilọn, e Nọyaẹnmwa keghi gunmwẹ guan.

² Vbe ẹghẹ ne a kha na, ivbiyokuo ọba e Babilọn keghi gha khọn okuo vbe Jerusalẹm, a keghi mu imẹ khui ye ihọkpa vbe ẹghodo ẹguae ọba.

³ E Zedekaia ne ọba ọ re ọ mu mwẹ khui ye evba, ọ keghi ba mwẹ ifi ẹzọ wẹ mẹ khare ighe e Nọyaẹnmwa wẹẹ, “I gha gie ọba e Babilọn khọn miẹn ẹvbo na otọ.

⁴ Kevbe we e Zedekaia i ra sẹtin lẹ fe vbo. A gha rhie ẹre ne ọba e Babilọn, ọ gha ye aro kan ẹre aro, ọ gha gu irẹn tobọ ẹre guan vbe ghe aro mwẹ ghe aro ruẹ.

⁵ A gha mu e Zedekaia gha rrie Babilọn. Ọ gha vbe gha rre odọ nii I te do ru ẹre emwi ne I gha ru ẹre re. Ọ gha khọn rẹn ne ọ gu ivbi e Babilọn gbinna, ẹ i dunna ne ẹẹn. Mẹ ne Nọyaẹnmwa taa ẹe nẹ.”

⁶ E Nọyaẹnmwa keghi tama mwẹ.

⁷ Wẹ e Hanamẹl, ne ovbi ọtẹn mwẹ nokpia ighe Sialọm gha rre do tama mwẹ ne I do dẹ ako oha ọghọe ne ọ rre Anatọt vbe otọe e Bẹnjamin rhunmwuda ighe mẹ ọrọre ọtẹn ne ọ ghi vbe sikẹ irẹn sẹ, I vbe mwẹ ase ne I ya dẹ ọre ọghe obọ mwẹ.

⁸ Zẹ vbene e Nọyaẹnmwa wa tae zẹẹ, e Hanamẹl keghi wa bu mwẹ gha die ẹghodo ẹguae, ọ na wẹ ne I do dẹ nene ako oha. Ẹre I na rẹn wẹ vbe ẹmwata, te Nọyaẹnmwa gele gunmwẹ guan.

⁹ I keghi gele dẹ nene ako oha vbe obọ e Hanamẹl, I na mwa igho ẹre mu ne ẹẹn, ive ẹre kegha re igho esiliva ehairrọvbugie.

¹⁰ Mẹ keghi rhie obọ ye nene ebe, a na ghi sikan ẹẹn gbua, emwa keghi sẹ osẹ yọ, I keghi ya omwa mwa nene igho.

¹¹ I keghi viọ ebe eveva ne a ya do ẹki na, ne a sikan gbua vbọ ne nene ebe ne a ya do ẹki ni ye, kevbe ne a ma sikan gbua ne ọ rrọọ.

¹² I keghi viọ eveva ne Barọk, ne ovbi e Neraia kevbe eyẹ e Maasai. I keghi sirra e Hanamẹl kevbe avbe osẹe nii viọ ne ẹẹn, iran ni rhie obọ ye ebe ne a ya do ẹki nii, kevbe avbe emwa ni tota vbe ẹghodo ẹguae.

¹³ I keghi sirra iran hia tama e Barọk wẹẹ.

¹⁴ “E Nọyaẹnmwa ne Oghodua, ne Osanobua Izrẹl tama ruẹn nian ne u viọ avbe ebe ne a ya do ẹki na, kevbe ne a sikan gbua, kevbe ne a ma sikan, ne u viọ iran ye uru obuẹ, ne a miẹn ehe na dọlọ iran yi khẹ ukpo nibun ni dee.

¹⁵ E Nọyaẹnmwa ne Oghodua, ne Osanobua Izrẹl tae ighe a gha bọlọ owa, a gha dọlegbe mu ugbo kevbe ogba azara vbe otọe na.”

Erhunmwu E Jerimaia

¹⁶ I ghi rhie ebe ne a ya do ẹki nii ne Barọk nẹ, I keghi na erhunmwu wẹẹ,

¹⁷ “E Nọyaẹnmwa ne Udazi, wẹ ọ re ọ yii otọ kevbe iso vbekpa ẹtin kevbe iwegbe ruẹ nọkhua, emwiọkpa ne ọ wegbe gbe ne uwẹ, ẹ i rrọọ.

¹⁸ U rhie aho ẹmwẹ ọmwa ne ẹ i beghe ma arriaisẹn, erriọ vbe nọ, u vbe rri emwa eso oya ye orukhọ ne evbibiẹ iran ru. Osanobua nọkpọlọ kevbe ne ọ mwẹ ẹtin ọ re uwẹ khin. Wẹ ọrọre Nọyaẹnmwa ne Oghodua.

¹⁹ Wẹ ru emwamwa ẹwaẹn, u keghi vbe winna iwinna ẹtin, u bẹghe emwi ne emwa hia ru, u keghi vbe hae ne iran zẹ vbene uyinmwẹ iran khare.

²⁰ Vbe ẹghẹ ne ọ kpee fua, u keghi winna iwinnaan ama kevbe ọyunnuan vbe Igipt, do sẹ ẹdẹ ne ẹre na, te u ye winna ẹn vbe ehe ne avbe ivbi Izrẹl, kevbe avbe ẹvbo ọvbehe hia ye, sẹrriọ wẹ te a ghi rẹn ruẹn nian vbe ehe hia.

²¹ “U ye iwinna ama kevbe ọyunnuan runran avbe eghian mwa, u keghi ya ẹtin kevbe iwegbe ruẹ viọ emwa ruẹn ighe ivbi izrẹl ladian vbe Igipt.

²² U mu otọ esiesi ne ọ maa emwiokọ na ne iran zẹ vbene u ve avbe erha iran odede re.

²³ Sokpan, ugbẹn vbe iran ghi sẹ otọe na, vbe iran ghi yan ẹnrẹn nẹ, iran ma ya uhi ruẹ ru emwi ra ne iran gha yin zẹ vbene u ma iran ẹre. Iran ma ru avbe emwi ne u wẹ ne iran ru rhọkpa. Ọre u na gie ọkhọ na hia rruan iran.

²⁴ “Avbe ivbi e Babilọn tọn uvun igbinna lẹga ore ẹvbo nii nẹ, ne iran khọn mu ẹẹn, iran suẹn igbinna nẹ. Okuo, ohanmwẹ kevbe emianmwẹ, gha gie ẹvbo ni de yi iran obọ, u gha miẹn wẹ emwi ne u tae hia sunu nẹ.

²⁵ Sevba, e Nọyaẹnmwa ne Udazi, wẹ ọ re ọ we mwẹ dẹ ako oha nii vbe sirra avbe osẹe, a gha rhe miẹn wẹ te iran ghi ra khọn mu ẹvbo ni ighe ivbi e Babilọn.”

²⁶ Ẹre Nọyaẹnmwa na tama mwẹ wẹẹ,

²⁷ “Mẹ ọrọre Nọyaẹnmwa, ne ọ re Osanobua emwa nagbọn hia. Emwi okpa i rrọọ ne ọ wegbe gbe ne imẹ.

²⁸ I ra mu ẹvbo na ne Nebukiadneza ne ọba e Babilọn kevbe ivbiyokuo ẹre. iran gha khọnrẹn muotọ.

²⁹ Iran ghi vbe mu erhẹn yọ. Iran gha giẹn ọnrẹn sotọ, deba avbe owa nii ne emwa na ya gha ye ohu mu mwẹ vbekpa ne iran na gha giẹn eturari ne Baal vbe okpo, kevbe ne iran na gha sa ayọn imuohan kua ne avbe ẹbọ.

³⁰ Wa ke omuhẹn okha ẹdagbọn iran kpao, ọ re ivbi Izrẹl kegha ho mwẹ ẹmwẹ, iran na gha ye ohu mu mwẹ vbekpa emwi ne iran ru.

³¹ Emwa ni rre ẹvbo na, ya ohu mu mwẹ nẹ, ohu ọba nabe vbe ikpẹdẹ ne a wa mu ẹẹn gbọọ. I tae wẹ te I ra fuẹn ọnrẹn uan.

³² Rhunmwuda emwi dan ne ivbi e Juda kevbe ivbi e Jerusalẹm he ru, iran kevbe avbe ọba kevbe avbe olotu iran, avbe ohẹn kevbe avbe akhasẹ iran.

³³ Iran fi iyeke iran gbe mwẹ. a gha rhe miẹn wẹ te I gha ma iran emwi khian, iran ma danmwehọ ne iran vbe ruẹ emwi rhọkpa.

³⁴ Uhin ighẹ te iran ya mu amazẹ ẹwia iran ye uwu Ọgua Osa, ehe ne a bọe ne a na gha ga mwẹ, iran mu awua yọ nẹ.

³⁵ Iran bọọ Ogiukpo ne Baal vbe Iya Hinọm, ne iran ya gha ya ivbi iran nikpia kevbe nikhuo zọ ese vbe evba ne ẹbọ ne a tie ẹre Molẹk. Mẹ ma tama iran ne iran ru emwi na, ọ ma vbe gha zẹdẹ rrọ mwẹ ekhọe wẹ ne iran ru emwi vberriọ, ne iran ya si emwa e Juda obọ fi orukhọ.”

Eyan Idaehọ

³⁶ E Nọyaẹnmwa ne Osanobua Izrẹl keghi tama mwẹ wẹẹ, “E Jerimaia avbe emwa nii gha ta ẹe khian wẹ okuo, ohanmwẹ, kevbe emianmwẹ gha gie obọ ọba e Babilọn vba ẹvbo na. Banbanna nian, danmwehọ emwi ọvbehe ne I ghẹ ghi ta ba ọnii.

³⁷ I ra ya si avbe emwa nii hia koko ke ehe ne I te zagha iran kui vbe ohu mu mwẹ, werriegbe gha die emwa na, I gha gie iran gha rrọ vbe a i mwẹ ẹbe.

³⁸ Ẹghẹ nii, iran ghi gha re emwa mwẹ, mẹ ghi vbe gha re Osanobua iran.

³⁹ I gha rhie emwi okpa kẹkan ne iran hia gha rhie aro yi vbe agbọn iran; ne iran gha ya ọghọ mẹ vbe ẹghẹ hia vbene agbọn gha na maa iran kevbe ivbi uniẹn iran.

⁴⁰ I gha gu iran ta ile etẹbitẹ. Mẹ i ra dobọ emwi esi ne a ru ne iran yi ẹdẹdẹmwẹdẹ, I gha vbe ru ẹe ne iran ya ekhọe iran hia gha mu ohan mwẹ, ne iran ghẹ ghi fi iyeke gbe mwẹ ẹdẹ.

⁴¹ I gha wa ye ọyẹnmwẹ gha ru emwi esi ne iran. I ghi vbe gbe iran ẹkun sotọ ẹdẹdẹmwẹdẹ vbe otọe na.

⁴² “Zẹ vbene I vbe gie ọkhọ rruan iran na, erriọ I gha vbe viọ emwi esi hia ne I ve iran re ne iran.

⁴³ Emwa nii wa ta ẹe khian wẹ te otọe na ra gha yevbe ato ne emwa nagbọn ra aranmwẹ oha i sẹtin dia, kevbe wẹ a gha mu ẹẹn ne ivbi e Babilọn sokpan, a gha ye gha dẹlẹ ako oha vbe otọe na.

⁴⁴ Emwa gha dẹlẹ ọe, a ghi vbe gbẹnnẹ ebe, a ghi gha rhie obọ yọ, a ghi vbe gha ru osẹe yọ. Ena hia gha sunu vbe otọe e Bẹnjamin, vbe avbe igue ni lẹga e Jerusalẹm, avbe okpẹvbo e Juda, avbe okpẹvbo ni rre avbe ẹvbo uhunmwu oke, ni rre odẹ ototọ oke, kevbe odẹ ekẹn e Juda. I gha dọlegbe viọ avbe emwa na gha rrie ẹvbo iran. Mẹ ne Nọyaẹnmwa tae nẹ.”