Jerimaia 31 - Edo Bible (E Baibol Ẹdo) Version 1996

A Dọlegbe Rriowa Ọghe Izrẹl

¹ E Nọyaẹnmwa khare wẹẹ, “Ẹghẹ dee ne I gha na gha re Osanobua ẹwae ne ọ rre Izrẹl hia, iran ghi vbe gha re emwa mwẹ.

² I tohan iran ni miẹn uhunmwu vbe obọ uwu vbe ato. Ugbẹn vbe ivbi Izrẹl ghi wẹ iran gualọ ikẹtin.

³ I keghi rhie egbe ma iran vbe urria. Ivbi Izrẹl, ẹghẹ hia ọ re I ya gha ho ẹmwẹ uwa, rhunmwuda ọnii, I keghi ye gha mwẹ aho ne ẹ i beghe ghe uwa.

⁴ I gha ye dọlegbe mu uwa agbọn mudia uhukpa, wa gha ye viọ emwi iku uwa uhukpa, wa ghi vbe gha ku vbe oghọghọ.

⁵ Wa gha ye vbe kọ azara ye avbe uhunmwu oke Sameria, emwa ni kọe gha rri ọmọ azara nii.

⁶ Ẹn, ẹghẹ dee, ne iran ni hodẹ gha na go ke uhunmwu oke Ifreim rre wẹẹ, ‘Wa gie ima bu e Nọyaẹnmwa ne Osanobua mwa gha rrie Zaiọn.’ ”

⁷ E Nọyaẹnmwa khare wẹẹ, “Wa ya oghọghọ so ihuan ne Izrẹl ne ọ kpọlọ sẹẹ vbe uwu avbe ẹvbo hia, wa so ihuan Urhomwẹ ọwua, ‘E Nọyaẹnmwa miẹn emwa rẹn fan nẹ, ọ fannọ iran ni ghi dekẹe werriegbe.’

⁸ I gha viọ ke odẹ okuọ gha dee, I ghi vbe si iran koko ke ufomwẹ agbọn gha dee, avbe arhuaro kevbe avbe arọe gha lele iran rre, ikhuo ni hanmwa kevbe iran ni gha ra biẹ iran gha werriegbe rre, uhunmwu ẹvbo nọkhua.

⁹ Avbe emwa mwẹ gha werriegbe rre vbe ne iran na viẹ, iran ghi vbe gha na erhunmwu vbe ehe ne I na viọ iran werriegbe dee ni. I gha ma iran odẹ gha rrie ẹzẹ amẹ, vbe odẹ ne ọ rriẹe kpẹghẹ, ehe ne iran i ra na rrua owẹ. Te I ye vbe erha ne Izrẹl Ifreim ọrọre ovbi mwẹ nọdiọn.”

¹⁰ E Nọyaẹnmwa khare wẹẹ, “Wa ne uhunmwu ẹvbo, wa danmwehọ mwẹ, ne uwa ta uhunmwu ne I gie vbe eghute ne ọ rrei, I zagha avbe emwa mwẹ kua, sokpan, I gha vbe si iran koko. I ghi gha su iran vbene ọsuohuan su avbe ohuan rẹn.

¹¹ I fannọ emwa Izrẹl kua nẹ I keghi vbe miẹn iran fan vbe obọ uhunmwu ẹvbo ne ọ wa mwẹ ẹtin.

¹² Iran gha rre do so ihuan oghọghọ vbe uhunmwu Oke Zaiọn emwi ne I ya ne iran gha yẹ iran vbe ihaoko ọka, ayọn kevbe ofigbọn oliv, ihaoko ọghe ohuan kevbe ẹmila. Iran gha yevbe ogba ne a gbe amẹ khakha ẹsẹse emwi ne iran a rhirhi gha ho hia gha sẹ iran obọ.

¹³ Avbe ibiẹka ikhuo ni rrọ gha ku iran ghi vbe gha ghọghọ avbe ikpia, igbama kevbe avbe ọmaẹn gha ghọghọ. I gha fu iran ẹko rre, I ghi ye akhiẹ iran khian oghọghọ.

¹⁴ I gha ye evbare ne ọ ghi maa sẹẹ koko avbe ohẹn ne ẹko vuọn iran I ghi vbe gie iho avbe emwa mwẹ sẹ iran ọkẹn. Mẹ ne Nọyaẹnmwa tae nẹ.”

Itohan E Nọyaẹnmwa Ghe Izrẹl

¹⁵ E Nọyaẹnmwa khare wẹẹ, “A họọn urhu okpa vbe Rama, urhu eve orriara. E Rekiẹl gha viẹ avbe ivbi ẹre i iran rrie, ọ ma ghi kue ne a bọ irẹn.

¹⁶ Dobọ eve ruẹ yi, ne u khiẹn ameve hin aro rre. Emwi ne u he ru ne avbe ivbuẹ hia, ẹ i mwẹ a ma san ruẹn ẹse ẹre, iran gha werriegbe ke otọ avbe eghian rre.

¹⁷ Idaehọ rrọ nuẹn vbe odaro ivbuẹ gha werriegbe rriowa. Mẹ ne Nọyaẹnmwa tae ne.

¹⁸ “I họn vbe ivbi Izrẹl ye akhiẹ tae wẹẹ, ‘E Nọyaẹnmwa, te ima te yevbe aranmwẹ ne a ma rri sokpan, wẹ keghi ma iran re ne a gha họn ẹmwẹ. Viọ ima werriegbe rre, ma mu egbe ne a ya bu ruẹ gha dee, e Nọyaẹnmwa ne Osanobua mwa.

¹⁹ Ma fi iyeke gbe uwẹ sokpan, vbe ọ ma ghi kpẹe, ma keghi gha ho ne a werriegbe rre, ugbẹn vbe uwẹ ghi rri ima oya nẹ, ma keghi gha khua uhunmwu akhiẹ khian. Ekhue mu mwa, a fa ima an, rhunmwuda, ma rukhọ vbe ima ye giẹrẹ.’

²⁰ “Izrẹl, ovbi mwẹ ne ọ ghan sẹẹ ọ re u khin, ọmọ ne I ho ẹmwẹ ọnrẹn sẹẹ. Ẹghẹ ne I rhirhi a ya so eni ruẹn I ghi gha ye aho ẹmwẹ ọmwa mu ẹmwẹ ruẹn ro. Orhiọn mwẹ ghi tin bu ruẹ gha dee, I gha mwẹ itohan.

²¹ Viọ ama lelẹe ne u vinnọ uviẹn lele odẹ, dọlegbe gualọ odẹ ne u la kpao. Ivbi Izrẹl wa werriegbe rre, wa dọlegbe gha die ẹvbo ne uwa na kpao.

²² Inu ẹghẹ wa gha biro eveva la, wa ne emwa ne ẹ i mwẹ iyayi? I yii emwi ọgbọn kevbe ne ọ lughaẹn nẹ ọ wa lughaẹn sẹẹ okhuo ne ọ degue okpia.”

Agbọn Ne Ọ Gha Ma Emwa Osanobua Vbe Odaro

²³ E Nọyaẹnmwa ne Oghodua, ne Osanobua Izrẹl khare wẹẹ, “I gha dọlegbe viọ avbe emwa nii gha die otọ iran, iran gha ye do tae vbe otọ nii wẹẹ, “ ‘Te Nọyaẹnmwa gha fiangbe oke nọhuanrẹn ọghe Jerusalẹm ehe nọhuanrẹn ne irẹn dia.’

²⁴ Emwa gha rre Juda kevbe avbe okpẹvbo ni rrọọ hia, avbe ọwẹe, ọsuohuan kevbe avbe ohuan iran.

²⁵ I gha rhie ẹtin ye ne ẹtin fo iwu, kevbe iran ne ohanmwẹ wọ ẹre egbe yotọ, I gha ye evbare koko iran ne ẹko vuọn.

²⁶ Ẹghẹ nii, emwa ghi gha kha wẹẹ, ‘I ya lovbiẹ, I keghi rhiọrre vbe egbe rọkhọmwẹ.’

²⁷ “Nọyaẹnmwa ọ re ọ tae wẹ ẹdẹ dee ne I gha ye emwa nagbọn kevbe aranmwẹ vuọn otọ Izrẹl kevbe Juda.

²⁸ Zẹ vbene I wa mu aro yọ ne I vbọlọ kua, ne I siẹn gbotọ, ne I sua guọghua, ne I fuẹn ọnrẹn uan kevbe ne I rẹnkhẹn iran, erriọ ọ re I gha wa vbe mu aro yọ ne I kọ iran kevbe ne I bọlọ iran.

²⁹ Ọnii gha ghi sunu nẹ, emwa i ghi ra dọlegbe gha tae wẹẹ, “ ‘Evbibiemọ rri alimo ne ọ kaẹn sokpan, akọn keghi do khẹkhẹ ivbi iran.’

³⁰ Sokpan, enian ghi nọ wẹ ọmwa ikọmwa ne ọ rri alimo ne ọ kaẹn. Ọ re akọn gha khẹkhẹ, enọru orukhọ, ọ re ọ ghi gha wu ye orukhọ ẹre.”

³¹ E Nọyaẹnmwa khare wẹẹ, “Ẹghẹ dee ne I gha na gu ivbi Izrẹl kevbe ivbi e Juda ta ile ọgbọn.

³² Ẹ i ra gha ye vbe ile nẹdẹ ne I gu avbe erha iran odede ta, ẹghẹ ne I na rhie iran obọ, I na viọ iran ke otọ Igipt ladian. A gha rhe miẹn wẹ te I yevbe ọdọ ne iran, iran ma ru vbene ile ni khare.

³³ Ile ọgbọn ne I ghi ra gu ivbi Izrẹl ta, enian ọ khian gha ye, I gha rhie uhi mwẹ ye uwu iran, I ghi vbe gbẹnnẹ ọẹn ye iran ekhọe. Mẹ ghi gha re Osanobua iran, iran ghi gha re emwa mwẹ.

³⁴ Ọkpa ne ọ ghe ghi gha ma ovbi ẹvbo ẹre emwi wẹ ne ọ rẹn e Nọyaẹnmwa i ghi rrọọ, rhunmwuda iran hia gha rẹn mwẹ kevbe egbe ne ọ kpọlọ sẹẹ ya sẹ egbe ne ọ kanmwa sẹẹ. I gha ya orukhọ iran bọ iran, a i ghi vbe ye abakuru iran rre ọvbehe. Mẹ ne Nọyaẹnmwa taa ẹe nẹ.”

³⁵ E Nọyaẹnmwa keghi yi owẹn ne ọ gha rhie uwanmwẹ rre vbe avan, uki kevbe orhọnmwẹ, ne iran gha baa vbe asọn ọ tughu okun, ọ keghi gie ẹe da van, e Nọyaẹnmwa ne Oghodua ọ re a tie ẹre.

³⁶ Ọ yan rẹn wẹ vbe ne emwi gha ye zẹe ẹghẹ vbe ne a na yii ẹe, ẹre Izrẹl gha vbe gha re uhunmwu ẹvbo.

³⁷ Ẹdẹ ne a gha miẹn wẹ a sẹtin mwa iso a na vbe gualotọ ẹyotọ agbọn miẹn, ẹghẹ nii ọkpa ọ re irẹn gha na he Izrẹl ne emwa irẹn. Rhunmwuda emwi ne iran ru hia. E Nọyaẹnmwa guaan nẹ.

³⁸ E Nọyaẹnmwa khare wẹẹ, “Ẹghẹ dee ne a gha na dọlọ e Jerusalẹm hia bọ zẹ vbe ẹvbo mwẹ, kevbe Owa ọkhẹ e Hananẹl vbe odẹ orrie kpao ya sẹ Onurho Igọgọ.

³⁹ Ebẹn uwu ghi ke evba nii vbe orrie kpao ya sẹ oke ọghe Garẹb kevbe ya sẹ e Goa.

⁴⁰ “Iya nii hia fẹẹrẹ, ehe ne a mu orinmwi yi, kevbe ne a mu iku yi kevbe avbe oha hia ni rre vbe a gberra ẹzẹ Kidrọn rhinrin ya sẹ Onurho Ẹsin vbe odẹ ahọ, ehia ghi gha re ne ọ huanrẹn mẹ. A i ghi dọlegbe siẹn ẹvbo nii sotọ ra ne a guọghọe rua ọvbehe.”