Jerimaia 3 - Edo Bible (E Baibol Ẹdo) Version 1996

Izrẹl Ne Ọ Ma Mudia Ẹse

¹ E Nọyaẹnmwa khare wẹẹ, “Ọmwa gha khu amwẹ ọnrẹn nẹ, ọ na kpao sẹ ọe rae, ọ na ya rọnmwẹ okpia ọvbehe, okpia nii i ghi dọlegbe rhie ẹre ọvbehe. Emwi vberriọ gha si awua ye otọe sokpan, ẹ i re avbiẹ ọse wa he zẹlẹ, wa keghi vbe ho na ne uwa dọlegbe bu mwẹ gha dee.

² Wa tọn aro mu ya ghe avbe uhunmwu oke. Ihọkpa rrọọ ra ne uwa ma na he ka do ẹki ebabotu yi? Wa ghi gha mudia khẹ emwa ne uwa zẹ ọre ọse vbe ọkpẹn odẹ zẹ vbene Igabari diakhẹ emwa ni gha defi iran obọ vbe ato. Wa keghi ya ẹki ebabotu ne uwa do mu awua ye avbe otọe nii.

³ Ọnii ọ re ọ sii ẹe ne a na wẹ ne amẹ ghẹ rhọ, ne amẹ ahọ orhọ ma na ghi rhọ. Te uwe wa yevbe ebabotu, ekhue i vbe mu ẹẹn.

⁴ “Eban nian, wa do gha tama mwẹ wẹẹ, ‘Wẹ ọre erha mwẹ te uwa gha hoẹmwẹ mwẹ ke ẹghẹ ọvbokhan mwẹ gha dee.

⁵ Wẹ i ra wa gha mu ohu ghe mwẹ vbe ẹghẹ hia, u i ra mu ohu ne ẹ i mwẹ erọkhọ ghe mwẹ rhinrin ẹdẹ.’ Vberriọ ọ re u tae Izrẹl, vbene u ta ọ re ọnii khin, sokpan avbe emwi dan hia ne u gha sẹtin ru nii, u ru ẹe nẹ.”

Te Izrẹl Kevbe Juda Gha Fi Uyinmwẹ Werriẹ

⁶ Ẹghẹ ne Josaia na gha re ọba, e Nọyaẹnmwa keghi tama mwẹ wẹẹ, “Wẹ miẹn emwi ne Izrẹl ne okhuo ne ọ ma guobọ ọdọ ru nian. Ọ fi iyeke gbe mwẹ nẹ, ọ keghi ya gha do ẹki ebabotu vbe uhunmwu oke ni yo hia kevbe ototọ avbe erhan ni mwẹ ebe ni bii.

⁷ Mẹ te gha ro wẹ ọ gha do avbe ẹki na hia fo nẹ, ọ gha dọlegbe bu mwẹ rre sokpan, ọ ma dọlegbe rre, aro e Juda ne ọtiọnrẹn ne ọ ma guobọ ọdọ wa sẹ emwi na ehia.

⁸ Aro e Juda vbe sẹ ọe wẹ I khu Izrẹl ne, I na wẹ ne ọ gha rrie rhunmwuda ọ fi iyeke gbe mwẹ, ọ na ya gha gbe ebabotu, sokpan, e Juda ne okhuo ne ọ ma guobọ ọdọ ne ọtẹn Izrẹl, ohan ma vbe mu ẹẹn. Rẹn na wa vbe khian ebabotu,

⁹ ekhue ma vbe mu ẹẹn hiehiere. Ọ ru otọ awua, ọ keghi ghẹ vbekpa ne ọ na gha gho avbe okuta kevbe erhan.

¹⁰ Vbe iyeke ena hia, e Juda ne okhuo ne ọ ma guobọ ọdọ ne ọtẹn Izrẹl keghi ye ọvọvo bu mwẹ gha dee, ọ ma sẹ ọ re otọ ẹko hiehiere. Mẹ ne Nọyaẹnmwa ọ re ọ tae.”

¹¹ Ẹre Nọyaẹnmwa na tama mwẹ wẹ, a gha rhe miẹn ighe Izrẹl fi iyeke gbe irẹn, rẹn ye vbe rhie ma wẹ rẹn maa sẹẹ e Juda ne ọ ma guobọ ọdọ.

¹² Rẹn keghi tama mwẹ wẹ ne I ya tama Izrẹl wẹẹ, “Izrẹl ne ekhọe ẹre ma mudia ẹse, werriegbe bu mwẹ gha dee, mẹ mwẹ itohan, ohu i ra vbe mu mwẹ. I i ra muohu ruẹ rhinrin ẹdẹ.

¹³ Sokpan, u ghi miẹnkue wẹ, wa rriabe kevbe wẹ wa sẹmwẹ e Nọyaẹnmwa ne Osanobua uwa. Miẹnkue wẹ u rhie aho ruẹ ne avbe ẹbọ ẹrrẹe vbe ototọ erhan ni mwẹ ebe ni bii hia kevbe wẹ u ma ya ẹmwẹ mwẹ ru emwi. Mẹ ne Nọyaẹnmwa ọ re ọ tae.

¹⁴ “Wa ne emwa ne ai gha ekhọe ẹre, wa werriegbe rre, ọghomwẹ ọ re uwa khin, I gha rhie ọkpọkpa vbe uwu uwa ke dọmwadẹ okpẹvbo ladian, kevbe eveva ke dọmwadẹ ẹwae rre, I ghi viọ uwa werriegbe gha die Oke Zaiọn.

¹⁵ I gha viọ enikhaemwisẹ ni họn ẹmwẹ mwẹ ne uwa, iran gha ya ẹwaẹn kevbe irẹnmwi khaemwisẹ yan uwa.

¹⁶ Ẹghẹ nii, wa ghẹ ghi do gha bun nẹ vbe otọe nii, ẹghẹ nii, emwa i ghi ra, ye gha guan kan ẹmwẹ Ẹkpẹti Ile mwẹ. Iran i ghi ra ye gha mu ẹmwẹ ọnrẹn ro ra ne a ye ye ẹre rre. Iran i ghi ra vbe gha mwẹ emwi ne iran yae ru, ama ghi wẹ ne iran ye vbe kan ọvbehe.

¹⁷ Ọ gha sẹ ẹghẹ nii, a ghi do gha tie Jerusalẹm ‘Ẹkete Nọyaẹnmwa;’ uhunmwu ẹvbo hia gha vbe sikoko ye evba ne iran do ga mwẹ. Ẹ i re emwi ne ekhọe iran ne ọ wo nii kevbe ọghe dan nii tama iran ọ re iran ghẹ ghi gha ru.

¹⁸ Izrẹl gha deba e Juda, iran ghi gba ke iwe gha dee, ke ẹvbo ne ọ rre odẹ okuọ nii gha dee, iran ghi gha die ẹvbo ne I mu ne avbe erha uwa odede ne ọ gha re ọghe iran ẹdẹdẹmwẹdẹ.”

Vbene Emwa Osanobua Gha Ghoo Ẹbọ Hẹ

¹⁹ E Nọyaẹnmwa khare wẹẹ, “Izrẹl, te I te wẹ ne I rhan obọ miẹn ruẹn ya ye ọmọ, ne I mu otọ ne ọ mose ne uẹn, otọe ne ọ mose sẹẹ vbe otọ agbọn hia. Te I te ho ne u tie mwẹ erha, ne u ghẹghi dọlegbe fi iyeke gbe mwẹ ẹdẹdẹmwẹdẹ.

²⁰ Sokpan, zẹ vbe okhuo ne ọ fi owẹ ye oha, u ma guobọ mwẹ ọvbehe. Mẹ ne Nọyaẹnmwa ọ re ọ taa ẹe.”

²¹ A họn owogho eso vbe uhunmwu oke: Ivbi Izrẹl ọ re ọ tulo, ne ọ vbe rinmwian rhunmwuda iran ru orukhọ, iran keghi vbe mianmian e Nọyaẹnmwa ne Osanobua iran.

²² Wa werriegbe rre, wa hia ni fi iyeke gbe Nọyaẹnmwa ọ gha mu uwa egbe rran, ọ ghi ru ee ne uwa do gha re ne ọ mudia ẹse.

²³ Avbe ẹbọ emwa ni ma yayi ne ima gha ghoo, vbe avbe uhunmwu oke, ma zẹdẹ yima obọ hiehiere. Ọ ghe Nọyaẹnmwa ne Osanobua mwa okpa ọ re iyobọ ke sẹ Izrẹl obọ.

²⁴ Sokpan, e Baal ne ẹbọ emwiekhue ne ima gha gho, wa miẹn ima emwi hin obọ rre, avbe oghẹn ohuan, ẹmila emọ ikpia, emọ ikhuo, avbe emwi hia ne avbe erha ima odede wa miẹn ẹsọn yi ke ẹkpo nẹdẹ gha dee.

²⁵ “Te ọ kere ne ima lovbiẹ ye otọ ne emwiekhue, ne efaa gue mwa. Ẹghẹikẹghẹ ọ re ima vbe avbe erha mwa odede wa ya gha rukhọ ghe Nọyaẹnmwa Osanobua mwa. Ma ma he vbe họn ẹmwẹ ne ẹẹn ẹdẹ.”