Jerimaia 29 - Edo Bible (E Baibol Ẹdo) Version 1996

Ebe Ne Jerimaia Gbẹn Gie Avbe Ju Ni Rre Babilọn

¹ I keghi gbẹn ebe gie avbe ohẹn avbe akhasẹ avbe ọkaolotu emwa nii, kevbe avbe emwa ọvbehe hia ne Nebukiadneza viọ ẹre oghunmwu ke Jerusalẹm kpao gha rrie Babilọn.

² A mu Jehoiakim, iye ẹe, avbe ekhaẹmwẹ ẹguae, avbe ọkaolotu e Juda kevbe Jerusalẹm, avbe owinna kevbe emwa ni guẹ iwinna, kpao gha rrie iwe nẹ, I ke gbẹn nene ebe.

³ I keghi rhie nene ebe ne Elasa ne ovbi e Siafan kevbe Gemaraia ne ovbi e Hilkaia, ne Zedekaia ọba e Juda gie yo ọghe Nebukiadneza ọghe Babilọn. Ebe nii khare wẹẹ:

⁴ “E Nọyaẹnmwa ne Oghodua, ne ọ re Osanobua ọghe Izrẹl tama avbe emwa nii ne irẹn gie Nebukiadneza viọ ẹre oghunmwu ke Jerusalẹm kpao gha rrie Babilọn wẹẹ:

⁵ ‘Wa bọlọ owa, ne uwa gbe ẹkun sotọ. Wa mu ugbo ne uwa vbe gha rri emwi ne uwa kọ yọ.

⁶ Wa viọ ikhuo ne uwa biẹlẹ. Wa vbe gie avbe ivbi uwa viọ ikhuo, ne iran vbe miẹn ehe na biẹlẹ emọ. Te ọ kere ne uwa gha bun yọ ne uwa ghẹ yẹkẹ.

⁷ Wa gha ru emwi ne ọ maa ye dọmwadẹ ẹvbo ne I kue ne a viọ uwa oghunmwu gha rrie. Wa gha na erhunmwu ghe mwẹ ne iran rhunmwuda, agbọn gha maa iran, ọ gha vbe maa uwa.

⁸ Mẹ ne Nọyaẹnmwa ne Osanobua Izrẹl tama uwa nian, ne uwa ghẹ gie iran rẹrẹ uwa ighẹ avbe akhasẹ ni rre ehe ne uwa ye, fa avbe iran ni kha ighẹ iran gha sẹtin ta emwi ne ọ gha sunu akhuẹ ma ọmwa. Wa ghẹ vbe zẹdẹ danmwehọ imina ne iran wẹ iran mina.

⁹ Te iran ya eni mwẹ ta ohoghe ma uwa. I ma gie iran. Mẹ ne Nọyaẹnmwa tae nẹ.’

¹⁰ “E Nọyaẹnmwa khare wẹẹ, ‘Ukpo ekigbesiyenẹ ọghe Babilọn ghẹ ghi gba nẹ, I gha do zẹ ye ẹmwẹ uwa, I gha mu eyan mwẹ sẹ wẹ I gha viọ uwa dọlegbe gha die owa.

¹¹ Mẹ okpa kẹkan ọ re ọ rẹn emwamwa ne I mwamwa ẹn vbekpa uwa, emwamwa ọghe wẹ ne agbọn ma uwa ighe ẹ i re wẹ ne ọkhọ rruan uwa, emwamwa ọghe wẹ ne ọ sẹ uwa obọ ighe agbọn ne ọ maa ne uwa rhie aro yi ẹdẹ nakhuẹ.

¹² Ẹghẹ nii, wa gha tie mwẹ. Wa gha do na erhunmwu gha mwẹ, mẹ ghi vbe họn erhunmwu uwa.

¹³ Wa gha gualọ mwẹ, wa ghi vbe miẹn mwẹ. Wa gha miẹn mwẹ rhunmwuda, wa gha ye ekhọe hia gualọ mwẹ.

¹⁴ Ẹn, erriọ I tae wẹ wa gha gualọ mwẹ miẹn. Mẹ ghi viọ uwa ya ye ihe vbe otọe uwa. I gha si uwa koko ke dọmwadẹ ẹvbo, kevbe dọmwadẹ ehe ne I zagha uwa gha rrie, I ghi viọ uwa gha die otọe nii ne I ke viọ uwa kpao gha rrie iwe. Mẹ ne Nọyaẹnmwa tae nẹ.’

¹⁵ “Wa khare wẹ, e Nọyaẹnmwa viọ avbe akhasẹ ne uwa vbe Babilọn.

¹⁶ Wa danmwehọ ẹmwẹ ne Nọyaẹnmwa tae vbekpa avbe ọba ni khaemwisẹ yan avbe otọe arriọba ne Devid ka vbe khaemwisẹ yan, kevbe avbe emwa ni rre avbe ẹvbo na, ọnii nọ wẹ avbe etẹn uwa ne a ma viọ ba uwa gha rrie zẹ vbe oghunmwu.

¹⁷ E Nọyaẹnmwa ne Oghodua khare wẹẹ, ‘I mu okuo, ohanmwẹ kevbe emianmwẹ bu iran dee I gha ru iran zẹ vbe ọmọ ohọ ni kẹkẹ gbe ne ẹ ighi gia re.

¹⁸ I gha ya okuo ohanmwẹ kevbe emianmwẹ khulo iran, agbọn ẹvbo ni rre agbọn gha runran ye emwi ne iran miẹn. Ehe hia ne I zagha iran gha rrie, emwi ne ọ sunu vbe egbe iran na gha yan emwa hia ni rhirhi miẹn iran unu an. Emwa gha ya iran gha gbogiẹ, a ghi vbe gha ya eni iran tie ihen.

¹⁹ Ena gha sunu vbe egbe iran rhunmwuda, iran ma ya ẹmwẹ iran ru emwi ighe avbe eguọmwadia mwẹ ne akhasẹ ne I wa gha gie gie iran. Iran keghi wa he ne iran danmwehọ.

²⁰ Wa hia fẹẹrẹ ne I gie ẹre iwe vbe Babilọn, wa ghi danmwehọ vbene I khare.’

²¹ “E Nọyaẹnmwa ne Oghodua, Osanobua Izrẹl guaan nẹ, vbekpa Ehab ne ovbi Kolaia kevbe Zedekaia ne ovbi e Manasẹ emwa ni ya eni ẹnrẹn ta ohoghe ma uwa. Ọ khare wẹ rẹn gha viọ iran ye obọ ẹtin e Nebukiadneza ọba ọghe Babilọn, ọmwa ne ọ gha sirra uwa gbele iran an.

²² Emwa ne a viọ ẹre oghunmwu kpao vbe Jerusalẹm gha rrie Babilọn gha ra tie ihẹn ne ọmwa, iran ghi kha wẹẹ, ‘Te Nọyaẹnmwa gha ru uẹ vbene ọ ru e Zedekaia kevbe Ehab, ne ọba e Babilọn tọẹn vbe erhẹn ke iran kevbe ẹmwẹ ne unu!

²³ Emwi ne ọ ra rruan iran ọ re ọnii khin rhunmwuda, iran ru orukhọ ne ọ mu ọmwa ohan, iran rhie amwẹ ẹrrẹe, iran kevbe ye eni e Nọyaẹnmwa ta ohoghe. Emwi ne Nọyaẹnmwa i zẹdẹ ho ọ re ọna khin, ọ rẹn emwi ne iran ru, rẹn ọ re ọ vbe re ne ọ ra sẹ osẹe gbe iran. E Nọyaẹnmwa tae nẹ.’ ”

Ebe Ne Siemaia Gbẹn

^24-25 E Nọyaẹnmwa ne Oghodua, Osanobua Izrẹl keghi giee mwẹ uhunmwu gie Siemaia ne Nehelam ọmwa ne ọ ya eni egbe ẹre gbẹn ebe gie emwa ni rre Jerusalẹm hia kevbe Zẹfanaia ne ovbi e Maaseia kevbe gie avbe ohẹn nekpa hia. E Siemaia keghi gbẹn ebe nii gie Zẹfanaia wẹẹ:

²⁶ “E Nọyaẹnmwa ọ re ọ ya a rri ohẹn ye ihe Jehoiada, Banbanna nian, wẹ ọ re ọ ghi re enọwanrẹn avbe ohẹn vbe Ọgua Osa. Iwinna ruẹn nọ ne u miẹn ọmwẹmwẹikeọmwẹmwẹ ne ọ ba ru vbe akhasẹ, ne a ya ọgiọrọ rrọ ẹre, a ghi vbe mu odigba ematọn yọ ọre urhu.

²⁷ Vbọzẹ ne u ma na he ru e Jerimaia ne Anatọt vberriọ yi, ọmwa ne ọ ba gu avbe emwa nii guan zẹ vbe akhasẹ?

²⁸ Ọ kere ne a kie ẹre ukpe ọ re rhunmwuda, ọ tama emwa ni rre Babilọn wẹ iran gha wa kpẹẹ vbe imu vbe evba, rhunmwuda ọnii ne iran bọlọ owa ne iran vbe gbe ẹkun sotọ, ne iran mu ugbo, ne iran vbe gha rhọ emwiokọ ni rrọ re.”

²⁹ E Zẹfanaia keghi tie ebe nii ma mwẹ.

³⁰ Ẹre Nọyaẹnmwa na tama mwẹ wẹ.

^31-32 Ne I gie ne a tama avbe oghunmwu vbe Babilọn vbekpa Siemaia wẹẹ: “Mẹ ne Nọyaẹnmwa gha rri e Siemaia oya kevbe ivbi uniẹn ọnrẹn hia. I ma gie ẹe sokpan, ọ kegha gu uwa guan vbene a miẹn wẹ akhasẹ nọ, ọ na gie uwa gha ya ohoghe yi. Rẹn i khian gha mwẹ ivbi uniẹn ọnrẹn vbe ehe ne uwa ye. Ẹ i ra tọ ne aro ẹre sẹ emwi esi ne I ra ru ne emwa mwẹ, rhunmwuda, ọ tama iran ne iran sọtẹ mwẹ. Mẹ ne Nọyaẹnmwa taa ẹe nẹ.”