Jerimaia 28 - Edo Bible (E Baibol Ẹdo) Version 1996

E Jerimaia Kevbe Hananaia Ne Akhasẹ

¹ Vbe uki ne ogisẹn ọghe ukpo ni ne ọ gbae vbe ukpo enẹ ne Hẹzekaia he ya vbe ọba, e Hananaia ne ovbi Azọọ, ne ọ vbe re akhasẹ vbe Gibiọn kevbe gunmwẹ guan vbe uwu Ọgua Osa. Vbe sirra avbe ohẹn kevbe emwa nii, ọ keghi tama mwẹ wẹ,

² E Nọyaẹnmwa ne Oghodua, ne Osanobua Izrẹl khare wẹẹ, “I bun ẹtin ọba e Babilọn nẹ.

³ Vbe ọ te gba vbe ukpo eva, I gha viọ avbe emwi ewe Ọgua Osa ne Nebukiadneza ne ọba hẹ gha rrie Babilọn rre.

⁴ I gha vbe rhie ọba e Juda dọlegbe rre, ighe Jehoiakin ne ovbi e Jehoiakim, deba emwa e Juda hia fẹẹrẹ ni gha rrie iwe vbe Babilọn. Ẹn, te I ra bun ẹtin ọba e Babilọn, Mẹ ne Nọyaẹnmwa ọ re ọ tae.”

⁵ Vbe sirra avbe ohẹn, kevbe avbe emwa ni mudia vbe ọgua Osa, I keghi tama Hananaia wẹẹ,

⁶ “Ogiemwi! I yayi ighe e Nọyaẹnmwa gha gele ru vberriọ! Iyayi ighe ọ gha gele gie ẹmwẹ ruẹn sẹ ne ọ viọ avbe emwiewe Ọgua Osa hia werriegbe ke Babilọn rre deba avbe emwa hia ne iran viọ ẹre oghunmwu kpao.

⁷ Sokpan, danmwehọ ẹmwẹ ne I tama uwẹ kevbe emwa nii.

⁸ Avbe akhasẹ ni guanrẹn vbe ẹghẹ ne ọ kpẹre ne ọ gberra vbe ọ ma he sẹ ẹghẹ imẹ vbe ruẹ tae wẹ, okuo, ukhunmwu kevbe emianmwẹ gha sẹ egbe uhunmwu ẹvbo ni bun kevbe avbe arriọba ni mwẹ ẹtin.

⁹ Sokpan, akhasẹ ne ọ guan ẹmwẹ ọfumwegbe yotọ, ẹmwẹ ne ọ tae nii ghẹ ghi sẹẹ nẹ okpa ọ re a gha na ka ẹe ye akhasẹ ne Nọyaẹnmwa gele giee.”

¹⁰ Ẹre Hananaia na mu urọnghọn nii hinmwẹ urhu rre, ọ na bunnọ ẹre ukhiọnmwẹ ukhiọnmwẹ.

¹¹ Ọ na sirra emwa nii hia kha wẹẹ, “E Nọyaẹnmwa khare ighe erriọ rẹn ra bunnọ urọnghọn ne Ọba Nebukiadneza munọ ye avbe uhunmwu ẹvbo hia urhu, kevbe wẹ rẹn gha ru emwi na ọ te sẹ ukpo eva.” Ẹre imẹ ghi na kpao.

¹² Ọ ghi kpee fua kherhe vbe iyeke ọnọna, e Nọyaẹnmwa keghi,

¹³ Tama mwẹ ne I ya tama e Hananaia wẹẹ, “E Nọyaẹnmwa khare wẹ, u gha sẹtin bunnọ urọnghọn erhan, sokpan rẹn gha rhie urọnghọn ematọn ye ihe ẹre.

¹⁴ E Nọyaẹnmwa ne Oghodua, ne Osanobua Izrẹl khare ighe rẹn gha mu urọnghọn ematọn ye urhu avbe uhunmwu ẹvbo na hia, iran ghi vbe ga e Nebukiadneza ne ọba e Babilọn. E Nọyaẹnmwa tae ne wẹ uhin ighe te irẹn ra wẹ ne avbe aranmwẹ oha gha ga e Nebukiadneza.”

¹⁵ Mẹ keghi talọ avbe ẹmwẹ na ma e Hananaia, I keghi vbe rhie te ẹe wẹẹ, “Danmwehọ e Hananaia! E Nọyaẹnmwa ma zẹdẹ gie uẹ, te u ru ẹe ne iran na gha ya ohoghe yi.

¹⁶ Rhunmwuda ọnii, e Nọyaẹnmwa tobọ ẹre khare we rẹn ra mu ẹẹn fua vbe ukpo na te fo, u gha wu rhunmwuda, we tama avbe emwa na wẹ ne iran sọtẹ ghe Nọyaẹnmwa.”

¹⁷ E Hananaia keghi wu vbe uki ne ogihinrọn ọghe ukpo nii.