Jerimaia 27 - Edo Bible (E Baibol Ẹdo) Version 1996

E Jerimaia Mu Urọnghọn Ẹmila Ye Urhu

¹ E Zedekaia ne ovbi e Josaia ghi wa rriọba e Juda, e Nọyaẹnmwa keghi tama mwẹ

² ne I ye avbe ohian ne a biẹnnẹ kevbe erhan ne a viọgbe ru urọnghọn mu ye urhu.

³ E Nọyaẹnmwa keghi tama mwẹ ne I gie avbe ukọ avbe ọba Idọm, e Moab, Amọn, e Taia kevbe Saidọn ni do miẹn e Zedekaia vbe Jerusalẹm tama iran wẹ,

⁴ e Nọyaẹnmwa ne Oghodua, ne Osanobua Izrẹl tama mwẹ ne I gie iran ne iran tama avbe ọba iran wẹ, e Nọyaẹnmwa khare wẹẹ,

⁵ “Ẹtin kevbe iwegbe mwẹ nọkhua ọ re I ya yii agbọn na, emwa nagbọn kevbe avbe aranmwẹ oha ni rre agbọn, I keghi vbe mu ẹẹn ne ọmwaikọmwa ne ọ yẹ mwẹ.

⁶ Mẹ ọrọre ọmwa ne ọ viọ avbe uhunmwu ẹvbo na hia ye ototọ ẹtin ọguọmwadia mwẹ ighẹ Nebukiadneza ne ọba e Babilọn, uhin ya sẹ egbe aranmwẹ oha, te I wẹ ne iran gha gae.

⁷ Te uhunmwu ẹvbo hia ra gae, iran ghi ga ovbi ẹre, iran ghi vbe ga eyẹ ọre ọ te do sẹ ẹghẹ ne uhunmwu ẹvbo ọghọe gha ya de. Ẹghẹ nii, uhunmwu ẹvbo ọghọe ghi gha gae avbe uhunmwu ẹvbo ni mwẹ ẹtin kevbe avbe ọba nekhua.

⁸ “Sokpan, a deghẹ a miẹn ẹvbo ra arriọba ne ọ wẹ rẹn i ga gie ẹe, I gha ye okuo rri uhunmwu ẹvbo ni oya, kevbe ohanmwẹ kevbe emianmwẹ rhinrin a te do miẹn wẹ, I wa rhie ẹghẹ ne Nebukiadneza ya fuẹn ọnrẹn uan fẹẹrẹ.

⁹ Wa ghẹ zẹ ye avbe akhasẹ uwa ẹre, ra ọmwaikọmwa ne ọ wẹ rẹn sẹtin rẹn emwi ne ọ gha sunu akhuẹ yotọ vbekpa imina na nọ ra vbekpa ne iran tie orhiọn ọmwa ne ọ wu ke idin ladian ra vbekpa ẹbo awan. Ehia gha tama uwa wẹ ne uwa ghẹ zẹ ye ọba e Babilọn re.

¹⁰ Te iran rẹrẹ uwa, iran gha gie a munọ uwa gha rrie ehe ne ọ rrei ne otọe uwa ẹsẹse I gha khulo uwa ladian, a ghi fuẹn uwa a.

¹¹ Sokpan ẹvboikẹvbo ne ọ kue ne ọ gha ga gie ọba Babilọn, ọ na gele gha ga ẹe, I gha kue ne ọ gha rre otọ ẹre tobọ ẹre, ne ọ gha gbe ugbo vbe evba, ne ọ vbe gha rre evba. Mẹ ne Nọyaẹnmwa ọre ọ tae.”

¹² Ẹmwẹ vberriọ ọ re I vbe tama e Zedekaia ne ọba e Juda. “Gbe uhunmwu kotọ ne ọba e Babilọn. Ga irẹn kevbe emwa rẹn, u gha gha rre agbọn.

¹³ Vbọzẹ ne okuo ra ohanmwẹ ra emianmwẹ gha na gbele uwẹ vbe emwa ruẹn yi? Ọnii ọ re Nọyaẹnmwa wẹ ọ gha rruan emwaikemwa ni ma gbe uhunmwu kotọ ne ọba e Babilọn.

¹⁴ Ghe zẹ ye avbe akhasẹ ni tama ruẹn ne u ghẹ de igue ne ẹẹn re. Te iran rẹrọ ọ.

¹⁵ E Nọyaẹnmwa tobọ ẹre tae nẹ wẹ rẹn ma gie iran, ighẹ te iran ya eni irẹn ta ohoghe ma ruẹn. Rhunmwuda ọnii, ọ gha khu uẹ ladian, iran gha gbe uẹ ua, ke uwẹ kevbe avbe akhasẹ ni ta ohoghe na ma ruẹn.”

¹⁶ Ẹre imẹ na na ya tama avbe ohẹn kevbe avbe emwa nii wẹ e Nọyaẹnmwa khare wẹẹ, “Wa ghẹ zẹ ye iran ẹre ighẹ avbe akhasẹ ni kha wẹ a gha rherhe viọ emwi ewe Ọgua Osa werriegbe ke Babilọn gha dee. ohoghe ọ re iran ta ma uwa.

¹⁷ Wa ghẹ zẹ ye iran ẹre! Wa gbe uhunmwu kotọ ne ọba e Babilọn wa gha rre agbọn! Vbọzẹ ne ore nọkhua na gha na do khian itowa?

¹⁸ Adeghẹ akhasẹ ọ re iran gele khin, adeghẹ mẹ gie iran uhunmwu, wẹ ne iran do nọ imẹ ne Nọyaẹnmwa ne Oghodua, ne I ghẹ gie a viọ avbe emwiewe ne ọ ghi kẹe vbe Ọgua Osa kevbe ẹguae ọba gha rrie Babilọn.”

^19-20 (Ẹghẹ ne Nebukiadneza na viọ iran gha rrie Babilọn, ighe ọba e Juda, e Jehoiakin ne ovbi e Jehoiakim kevbe emwa ni hiunsi vbe Juda kevbe Jerusalẹm, ọ keghi sẹ avbe orre rae, ẹgbẹdin nọkhua ọghe oze, avbe ikẹkẹ okhuae deba eso vbe uwu emwiewe ni rre uwu Ọgua Osa rae.)

²¹ “Wa danmwehọ vbene imẹ ne Nọyaẹnmwa ne Oghodua, ne Osanobua Izrẹl khare vbekpa emwiewe ne ọ ghi kẹe vbe uwu Ọgua Osa ọba ne ọ rre Jerusalẹm.

²² A gha viọ iran gha rrie Babilọn, ehia ghi vbe gha rre evba vbe I te do vbe mu ẹmwẹ iran tuorre. Ẹghẹ nii, I gha viọ iran werriegbe rre I ghi werriegbe do viọ iran ye emwa. Mẹ ne Nọyaẹnmwa ọ re ọ tae.”