Jerimaia 25 - Edo Bible (E Baibol Ẹdo) Version 1996

Oghian Ne Ọ Ke Odẹ Okuọ Rre

¹ Ọ ghi rre ukpo enẹ ne Jehoiakim ne ovbi e Josaia la ẹkete Juda, e Nọyaẹnmwa keghi giee uhunmwu gunmwẹ vbekpa ivbi e Juda hia. (Ọna kegha re vbe ukpo nokaro ne Nebukiadneza gha re ọba e Babilọn.)

² I keghi tama ivbi e Juda kevbe ivbi e Jerusalẹm hia wẹẹ,

³ “Ukpo eha yan ugie ọ re ọ ghi ye na, a tie ẹre ukpo iwera ne Josaia ne ovbi Amọn kegha re ọba e Juda gha dee do sẹ ẹdẹnẹrẹ na, ẹre Nọyaẹnmwa ya gha gunmwẹ guan, a ma he vbe miẹn wẹ I ma ta ẹmwẹ ne ọ tae ma uwa. Sokpan wa ma zẹ yọ.

⁴ Wa ma danmwehọ a ma wẹ, wa ra zẹ yọ, a gha rhe miẹn wẹ te Nọyaẹnmwa gha giee avbe eguọmwadia ẹre ighẹ avbe akhasẹ gie uwa.

⁵ Iran tama uwa ne uwa fiwerriẹ hin uyinmwẹ dan ne uwa yin rre, kevbe avbe emwi dan ne uwa ru, ne uwa miẹn ehe na gha yin ẹnrẹn khian ighẹ otọe nii ne Nọyaẹnmwa mu ne uwa kevbe avbe erha uwa odede ne ogha re ọghe uwa ẹdẹdẹmwẹdẹ.

⁶ Iran tama uwa ne uwa ghẹ gho ra ne uwa ga avbe ẹbọ ọvbehe, kevbe ne uwa ghẹ ye ohu mu e Nọyaẹnmwa vbekpa ne uwa gha na gha gho avbe amazẹ ne uwa maẹn. Akpawẹ te uwa họn ẹmwẹ ne Nọyaẹnmwa, ẹ i ghẹ rri uwa oya.

⁷ Sokpan, e Nọyaẹnmwa tobọ ẹre khare wẹ wa he ne uwa danmwehọ irẹn, wa keghi ya ẹmwẹ amazẹ uwa ya ẹe mu ohu, wa keghi ya obọ uwa sii ẹe rrie egbe ighẹ oya ne ọ rrii uwa ẹre.

⁸ “Rhunmwuda ọnii nian, rhunmwuda ne uwa ma na zẹ ye ọre re, e Nọyaẹnmwa khare wẹẹ,

⁹ ‘I khian gie ya tie avbe emwa ni rre odẹ okuọ hia rre, kevbe ọguọmwadia mwẹ ighe e Nebukiadneza ne ọba e Babilọn, I gha viọ iran rre, ne iran do gu e Juda kevbe emwa ni rre uwu ẹre gbinna. Kevbe avbe ẹvbo ni sikẹ ọre hia. I khian fuẹn uhunmwu ẹvbo na kevbe avbe uhunmwu ẹvbo ni lẹga ẹre, I ghi ya ehia khian itowa ẹdẹdẹmwẹdẹ, emwi ne ọ mu ohan ne ọ ye egbe ku ọmwa ohiọnhiọn. Mẹ ne Nọyaẹnmwa ọ re ọ tae.

¹⁰ I gha dobọ uwemwẹ oghọghọ kevbe ọyẹnmwẹ iran yi, kevbe uwemwẹ oghọghọ ọghe evbare irhiọha, iran i ghi miẹn ofigbọn sa ye ukpa iran, ọka i ghi ra vbe gha rrọọ.

¹¹ A gha ya otọe na hia khian itowa, ọ ghi vbe gha re ughe ne ọ ye egbe ku ọmwa ohiọnhiọn, avbe uhunmwu ẹvbo ni diake ẹe, gha ya ga ọba e Babilọn la ukpo ekigbe siyenẹ.

¹² “ ‘Vbe iyekọnii, I gha do rri e Babilọn kevbe ọba ẹre oya ye orukhọ iran. I gha fuẹn ẹvbo nii, I gha ya ẹe khian itowa ẹdẹdẹmwẹdẹ.

¹³ I gha gie ọkhọ rruan e Babilọn zẹ vbene I giee Jerimaia wẹ ọ gha sunu vbe egbe avbe uhunmwu ẹvbo, zẹ vbene a gbẹnnẹ ye ebe na.

¹⁴ I gha ha e Babilọn osa emwi ne iran ru, avbe uhunmwu ẹvbo kevbe avbe ọba nibun ghi ya iran gha ru eviẹn.’ ”

Vbene Osanobua Bu Ohiẹn Avbe Uhunmwu Ẹvbo Hẹ

¹⁵ E Nọyaẹnmwa ne Osanobua Izrẹl keghi tama mwẹ wẹẹ, “Ghe ukpu ayọn ne ọ vuọn ne ohu mwẹ vbe emwa na, mu ẹẹn bu avbe uhunmwu ẹvbo ne I giọ bu hia gha khian, ne u ya ne iran da vbọ.

¹⁶ Iran gha da vbọ, iran ghi gha dobidokpannọ khian, iran ghi vbe kiza rhunmwuda okuo ne I ra gie bu iran gha dee.”

¹⁷ Rhunmwuda ọnii, I keghi mu ukpu nii vbe obọ e Nọyaẹnmwa, I keghi mu ẹẹn ne avbe ẹvbo nii ne Nọyaẹnmwa he gie mwẹ, bu hia, I na ya ne iran da vbọ.

¹⁸ E Jerusalẹm kevbe avbe okpẹvbo e Juda hia, deba avbe ọba kevbe ọkaolotu iran, a ke ghi ya ne iran da vbọ, ne iran hia miẹn ehe na khian ato, ughe dan ne ọ ye egbe ku ọmwa ohiọnhiọn, ne eni iran khian na a ya tie ihẹn ne ọmwa zẹ vbene ọ ye ye do sẹ ẹdẹnẹrẹ na.

^19-26 Eni avbe emwa ọvbehe ni gha da vbe ukpu ni ọ re ena khin: ọba Igipt, avbe ekhaẹmwẹ kevbe avbe ọkaolotu ẹre, avbe ivbi Igipt hia kevbe avbe erhunmwuyẹn ni rre otọ Igipt hia, avbe ọba ni rre otọe Uz hia, avbe ọba ẹvbo e Filistin hia ighe avbe Askẹlọn, e Gaza, Ẹkrọn kevbe ne ọ ghi dekẹe vbe Asdọd, ivbi Idọm hia, e Moab kevbe Amọn, avbe ọha e Taia kevbe Saidọn, avbe ọba otọe e Meditẹrrenian hia, avbe ore nọkhua Dedan, e Tema kevbe Buz, avbe emwa ni gbe eto iran sikẹ otọ, avbe ọba Arebia hia, avbe ọba ẹwae ni rre ato hia, avbe ọba e Zimri, Ẹlam kevbe Midia, avbe ọba odẹ okuọ hia, ni sikẹ emwa, kevbe ni rrei vbe emwa, ọsegbe ọsegbe, te avbe uhunmwu ẹvbo ni rre otọ agbọn hia gha da vbọ, vbe okiekie ehia, ọba e Babilọn ghi do da vbọ.

²⁷ Ẹre Nọyaẹnmwa na tama mwẹ wẹẹ, “Tama avbe emwa nii wẹ mẹ ne Nọyaẹnmwa ne Oghodua ne Osanobua Izrẹl, mẹ ọ re ọ tama iran wẹ ne iran da rhinrin ọ te do gha gbe iran ne iran gha bi, iran te do dele gbotọ vbe ne iran i ghi na sẹtin kpaegbe ọvbehe, rhunmwuda okuo ne I gie bu iran dee.

²⁸ A deghẹ iran he ne iran miẹn ruẹn ukpu nii vbe obọ ne iran da vbọ, u ghi tama iran wẹ, e Nọyaẹnmwa ne Oghodua khare wẹ te iran gha da vbọ.

²⁹ Ẹvbo mwẹ ọ re I ra na suẹn iwinna ọ dunmwu an nii. Te iran ro wẹ iran gha lẹ ọre fe vbe ne a i na rri iran oya ra? Hiehiere, te a ra rri iran oya rhunmwuda, te I ra gie okuo gie emwa hia ni rre agbọn. Mẹ ne Nọyaẹnmwa ne Oghodua tae nẹ.

³⁰ “Wẹ ne Jerimaia, ghẹ mwẹ u ma ta uhunmwu ne I gie hia. U ghi tama avbe emwa na wẹẹ, “ ‘E Nọyaẹnmwa gha davan ke ẹrinmwi rre ọ ghi vbe van avan ke ehe ne ọ yo vbe odukhunmwu ẹrinmwi rre, ọ gha van mu emwa rẹn, ọ gha da van vbe okpia ne okpia ne ọ minọ ọmọ erhan ne a ya ru ayọn. Emwa hia ni rre agbọn gha họn urhu ẹre.

³¹ Ulamwẹ ọnrẹn ghi mi igboo ya sẹ ehe ne agbọn sẹe. E Nọyaẹnmwa mwẹ ẹzọ ne ọ gu avbe uhunmwu ẹvbo gui ọ gha viọ emwa hia la erhan ẹzọ, ọ ghi gbele avbe emwa dan an. E Nọyaẹnmwa tae nẹ.’ ”

³² E Nọyaẹnmwa ne Oghodua khare wẹẹ, “Ọkhọ dee ra do rruan avbe uhunmwu ẹvbo ọsegbe ọsegbe, okpẹhoho okpa wa si koko vbe odẹ ehe ne agbọn sẹe.

³³ Ọ gha sẹ ẹdẹ nẹdẹrriọ ikun avbe emwa ne Nọyaẹnmwa gbele ghi ye bẹẹrẹ lele otọe ke obọkpa vbe ehe ne agbọn sẹe ya sẹ obọ nọkpa. A i miẹn ne ọ gha khiẹ iran, a i ra vbe viọ iran kpao ne a ya re iran. Ehia gha rre otọ bẹẹrẹ vbe ẹtẹbọ ekẹn nekhui ne a ya ye otọe maa emwiokọ.

³⁴ “Wa gha viẹe, wa ne avbe ọkaolotu, wa ne ọsuohuan avbe ohuan mwẹ. Wa gha khiẹ, ne uwa vbe gha werriẹ vbe uwu ebubẹ. Ẹghẹ sẹ nẹ nian ne a gha ya lọkọ uwa a, a gha gbele uwa vbene a gbele ogho.

³⁵ Odẹ ọkpa ne uwa gha la miẹn uhunmwu vbọ i rrọọ.

^36-37 wa gha khiẹkhẹ egbe, wa gha go vbe uwu akhiẹ, rhunmwuda, e Nọyaẹnmwa dunmwu ẹvbo uwa a vbe ohu ẹre, ọ kevbe ya ẹvbo uwa ne rọkhọọ khian itowa.

³⁸ E Nọyaẹnmwa hee emwa rẹn yotọ nẹ zẹ vbe oduma ne ọ kpao vbe uvun okuta ẹre rre. Orrirri okuo kevbe ohu ọbanabe ọghe Nọyaẹnmwa ya ẹvbo nii, khian ato.”