Jerimaia 24 - Edo Bible (E Baibol Ẹdo) Version 1996

Okhuae Ohọ Eva

¹ E Nọyaẹnmwa keghi viọ okhuae ohọ eva ma mwẹ, a keghi viọ iran ye Ọgua Osa (Ọna kegha re iyeke vbe Nebukiadneza ọghe Babilọn mu ovbi e Jehoiakim ighẹ Jehoiakin ne ọba e Juda) kpao vbe Jerusalẹm gha rrie Babilọn zẹ vbe oghunmwu, kẹe kevbe avbe ọkaolotu e Juda avbe emwa iwinna kevbe iran ni guẹ ona.

² Avbe ohọ ne ọ maa kegha rre okhuae ne okaro, ni wa rherhe vbo vbọ, nọkpa kegha re ne ẹ i maa ye, ne ẹ i gie a re.

³ Ẹre Nọyaẹnmwa na nọ mwẹ mwẹ, “Jerimaia, vbe ua bẹghe yi?” Mẹ keghi wanniẹn wẹẹ, “Ohọ, ni maa ni rrọọ wa maa ẹsẹse, ni i maa ni rrọọ i zẹdẹ ma, ẹ i gia re.”

⁴ Ẹre Nọyaẹnmwa na khama mwẹ wẹẹ,

⁵ “Mẹ ne Nọyaẹnmwa ne Osanobua Izrẹl rorẹe wẹ avbe emwa ne a viọ gha rrie Babilọn te iran yevbe ohọ esiesi na. I gha ya obọ itohan mu iran.

⁶ I gha gbearoghe iran, I ghi vbe viọ iran werriegbe gha die otọe na. I gha mu iran kpaegbe, I i ra vbe siẹn iran kua. I gha gbọ iran, I i ra vbe silo iran vbọlọ.

⁷ I gha rhie ye iran ekhọe aho ne iran rẹn wẹ mẹ ọrọre Nọyaẹnmwa. Ẹghẹ nii iran ghi gha re emwa mwẹ, mẹ ghi vbe gha re Osanobua iran, rhunmwuda, iran gha werriegbe bu mwẹ rre, ekhọekekhọe iran hia.

⁸ “Zẹ vbe ọghe Zedekaia ọghe Juda, iran ni gbinna igbinna ẹvbo ni lẹga ẹre, kevbe emwa nekpa ni rre Jerusalẹm, ni rre otọe na ra ni kpao gha rrie Igipt, Mẹ ne Nọyaẹnmwa gha ru iran zẹ vbe avbe ohọ nii ni i maa, ne ẹ i gia re.

⁹ I gha gie ẹe sẹ vberriọ wẹ ẹvbo uhunmwu otọ agbọn hia gha runran. Emwa gha ya iran gbogiẹ, ya iran gbe ọdẹn a ghi vbe gha ya eni iran tie ihẹn vbe eheikehe ne I zagha iran gha rrie.

¹⁰ I gha ya okuo ohanmwẹ kevbe emianmwẹ gu iran khọn a te miẹn wẹ okpa ma ghi kẹe vbe uwu iran vbe otọ nii ne I mu ne iran kevbe avbe erhan iran odede.”