Jerimaia 23 - Edo Bible (E Baibol Ẹdo) Version 1996

Idaehọ Ẹdẹnakhuẹ

¹ U umiẹn vbe ibuohiẹn e Nọyaẹnmwa gha wegbe mu iran hẹ ighe iran ni fuẹn emwa rẹn uan, ne iran na vbe zagha iran an!

² Vbenian, ọ re Nọyaẹnmwa ne Osanobua Izrẹl khare vbekpa ọkaolotu ne ọ te kei ne ọ gha gbearoghe emwa rẹn: “Wa ma gbearoghe emwa mwẹ, wa zagha iran an, wa keghi khulo iran kua. Banbanna nian, I ra do rri uwa oya ye emwi dan ne uwa ru.

³ I gha si avbe emwa mwẹ ni dekẹe koko ke ẹvbo ne I zagha iran kui gha dee, I ghi viọ iran werriegbe gha die otọ iran. Iran gha biẹlẹ emọ nibun, iran ghi bun yọ vbe inu.

⁴ I gha zẹ enikhaemwisẹ ne iran gha gbearoghe iran. Ohan i ghi ra ye gha mu emwa mwẹ ra ne afianma gha fian iran, mẹ i ghi dọlegbe rri iran oya. Mẹ ne Nọyaẹnmwa ta ẹe nẹ.”

⁵ E Nọyaẹnmwa khare wẹẹ, “Ẹghẹ dee ne I gha na zẹ ọba vbe ivbi e Devid ni mwẹ ekhọe esi vbọ. Ọba nii gha ya ẹwaẹn khaemwisẹ, ọ ghi ru emwi ne ọ here ke ne ọ hẹnhẹn vbe otọe nii hia.

⁶ Ẹghẹ ne ọ gha ya vbe ọba, ivbi e Juda gha rrọọ vbe a i mwẹ ẹbe, ivbi Izrẹl ghi vbe gha rrọọ vbe ọfumwegbe, a gha vbe gha tie ẹre, ‘E Nọyaẹnmwa ne Imiẹnfan Mwa.’

⁷ “Ẹghẹ dee,” erriọ Nọyaẹnmwa khare, “Ne emwa i ghi ra na gha ye eni mwẹ vẹn ihẹn zẹ vbe Osanobua ne ọ rrọọ ne ọ viọ ivbi Izrẹl ke Igipt ladian rre.

⁸ Sokpan iran ghi gha ye eni mwẹ vẹn ihẹn zẹ vbe Nọyaẹnmwa ne ọ viọ ivbi Izrẹl ke odẹ okuọ rre kevbe avbe otọe ọvbehe ne I te zagha iran kui gha dee. Ẹghẹ nii, iran ghi do gha rre otọe iran?”

Ẹmwẹ Ne Jerimaia Tae Vbekpa Avbe Akhasẹ

⁹ A guọghọ mwẹ udu, te I ghi guọ zighazigha. Rhunmwuda e Nọyaẹnmwa, rhunmwuda ẹmwẹ ọnrẹn nọhuanrẹn I ye vbe ọmwa ne ọ da ayọn gbe egbe. Ọmwa ne ọ da ayọn ne ọ bun gbe.

¹⁰ Otọe na vuọn ne emwa, emwa ne ẹ i mu ohan e Nọyaẹnmwa; uyinmwẹ dan ira yin iran ghi gha lo ẹtin iran la ihan. Rhunmwuda ne Nọyaẹnmwa na fi ẹre unu, te otọ ghi khiẹ, ehe ne aranmwẹ na rria hia kaka a.

¹¹ E Nọyaẹnmwa khare wẹẹ, “Ke akhasẹ kevbe avbe ohẹn, ne ọ rẹn Osanobua i rrọọ I mu iran nẹ vbe iran ru emwi dan, vbe uwu Ọgua Osa tobọ ẹre.

¹² Odẹ ne iran la khian gha miọnghọn, ọ ghi vbe so ebiebi I gha gie iran rrua owẹ ne iran dele. I ra gie ọkhọ do rruan iran ẹghẹ ne a gha na rri iran oya dee. Mẹ ne Nọyaẹnmwa tae nẹ.

¹³ I miẹn orukhọ ne avbe akhasẹ e Sameria ru nẹ eni e Baal ọ re iran ya guan yotọ, iran keghi bibi avbe emwa mwẹ odẹ.

¹⁴ Sokpan, I vbe miẹn wẹ avbe akhasẹ ni rre Jerusalẹm wa vbe rhia sẹẹ iran rhie amwẹ ẹrrẹe, iran vbe ta ohoghe, iran kpe ọbọbọ ne emwa ya gha ziba. Sẹrriọ wẹ a i ghi miẹn ne ọ dobọ emwi dan ne a ru yi. Zẹ vbe ne I miẹn iran, iran hia wa vbe rhia vbe ivbi e Sọdom kevbe Gomorra.

¹⁵ Rhunmwuda ọnii nian, emwi ne I mẹ ne Nọyaẹnmwa ne Oghodua tae vbekpa avbe akhasẹ ni rre Jerusalẹm ọ re ọna khin. I gha rhie ukpakọn ne ọ rriara ne iran kpe I gha mu eruan ne iran wọn rhunmwuda iran ya a i ka Osanobua yọ gba otọe ni hia.”

¹⁶ E Nọyaẹnmwa ne Oghodua tama ivbi e Jerusalẹm, “Wa ghẹ danmwehọ ẹmwẹ ne avbe akhasẹ ta, idaehọ ohoghe ọre iran ya koko uwa. Emwi ne ọrre iran ekhọe ọre iran tama uwa, ẹ i re ẹmwẹ ne imẹ tae.

¹⁷ Iran ghi gha tama emwa ni ma zẹye ẹmwẹ ne I tama iran wẹ, agbọn gha wa ma iran. Iran ghi vbe gha tama ọmwa ne ọ zevbudu wẹ ọkhọ okpa i ra ya obọ kan rẹn.”

¹⁸ I khare wẹẹ, “Ọkpa vbe uwu avbe akhasẹ na ne ọ he rẹn iro ẹkhokho ekhọe Nọyaẹnmwa i rrọọ, ọkpa ne ọ he họn uhunmwu ne ọ gie ra emwi ne ọ yae kha i rrọọ, ne ọ vbe danmwehọ ra ne ọ zẹye ẹmwẹ ne ọ he ta i rrọọ.

¹⁹ Okpẹhoho ọ re ohu ẹre khin, ẹhoho ne ọ wegbe ne ọ gha khọn la uhunmwu avbe emwa dan.

²⁰ Ẹ i ra vbe dobọyi vbe ọ te do ru emwi ne ọ wẹ rẹn ra ru hia fo. Ọ gha sẹ ẹdẹ ne ọ dee, emwa rẹn gha wa rẹn emwi ne a ya ọna kha ẹsẹse.”

²¹ E Nọyaẹnmwa khare wẹẹ, “I ma gie avbe akhasẹ na, sevba, iran keghi ye gha khian, I ma zẹdẹ gie iran uhunmwu sokpan, iran ke ya gha ya eni mwẹ guan.

²² Akpawẹ te iran rẹn iro ẹkhokho ekhọe mwẹ, iran gha ta uhunmwu ne I gie ma emwa mwẹ, iran gha te ru ẹe ne iran sẹ uyinmwẹ dan ne iran yin kevbe emwi dan ne iran ru rae.

²³ “Osanobua ne ọ rre ehe hia ọ re imẹ khin i ghẹ i re ihọkpa kẹkan.

²⁴ Orhiọnkpa ne ọ gha sẹtin lẹre ye ehe ne imẹ i ra na bẹghe ẹre i rrọọ. Wẹ ma rẹn ighe ehe hia ọ re imẹ ye vbe ẹrinmwi kevbe agbọn?

²⁵ I rẹn vbene iran kha hẹ ighe avbe akhasẹ nii, iran ni ya eni mwẹ ta ohoghe iran ghi do kha wẹ mẹ ọ re ọ gie iran uhunmwu vbe imina.

²⁶ Inu ẹghẹ ọ re avbe akhasẹ nii gha ghi ya ohoghe ne iran zẹ ta bibi emwa mwẹ odẹ kpee sẹ?

²⁷ “Iran ro wẹ imina ne iran ta gha ya mwẹ mianmian zẹ vbene avbe erha iran mianmian mwẹ, iran na lele Baal.

²⁸ Akhasẹ ne ọ minaẹn, giee kha ighe imina kẹkan nọ, sokpan akhasẹ ne ọ họn urhu mwẹ, we ne ọ ya ta uhunmwu ne I gie kpẹghẹ. De emwi ne a ye ihunhun ru vbe ehe ne ọka ye yi?

²⁹ Te ẹmwẹ mwẹ ye vbe erhẹn kevbe umọmọ ne ọ guọghọ okuta nekhua rẹnkhẹnrẹnkhẹn.

³⁰ Ohu iran mu mwẹ ighe avbe akhasẹ nii, ni rhie ẹmwẹ ogieva iran ta, iran ghi kha wẹ mẹ ọre ọ gie vberriọ.

³¹ Erriọ ọre ohu iran vbe mu mwẹ ighe avbe akhasẹ ni ta ẹmwẹ obọ iran, iran ghi kha wẹ ehe ne I ye ọ re ọ ke rre.

³² Danmwehọ ẹmwẹ ne imẹ ne Nọyaẹnmwa tae! Ohu avbe akhasẹ ni ta imina iran ne ọ vuọn ne ohoghe mu mwẹ. Iran ghi gha ta avbe imina na, iran ghi gha bibi emwa mwẹ odẹ vbekpa ohoghe kevbe orhuọ ọghe iran. I ma gie iran, I ma wẹ ne iran gha khian, iran i zẹdẹ mwẹ asa ne iran ye ne emwa nii hiehiere. Mẹ ne Nọyaẹnmwa ọ re ọ tae.”

Ihẹ E Nọyaẹnmwa

³³ E Nọyaẹnmwa keghi tama mwẹ wẹẹ, “E Jerimaia, a deghẹ ọkpa vbe uwu avbe emwa ra akhasẹ, ra ohẹn nọ ruẹn wẹẹ, ‘Vbe Nọyaẹnmwa kha hẹ?’ U ghi tama rẹn wẹẹ, ‘Ihẹ ọ re uwa khin ne Nọyaẹnmwa, ọ gha mu uwa fua wan.’

³⁴ Adeghẹ ọkpa vbe uwu avbe emwa mwẹ, ra akhasẹ ra ohẹn vbe lo ẹmwẹ ni wẹẹ, ‘Ihẹ e Nọyaẹnmwa,’ I gha rri irẹn vbe ẹgbẹe ọre oya.

³⁵ Sokpan, wẹ ne dọmwadẹ ọghọe ya gha nọ esiọre kevbe emwa rẹn wẹẹ, ‘De ewanniẹn ne Nọyaẹnmwa rhie rre? Vbe Nọyaẹnmwa kha hẹ?’

³⁶ Rhunmwuda ọnii, ọ ma kei ne iran ye gha lo ẹmwẹ na wẹẹ, ‘ihẹ e Nọyaẹnmwa,’ rhunmwuda, ọmwaikọmwa ne ọ ye danmwẹ ọẹn, I gha gele gie ẹmwẹ mwẹ khian ẹre ihẹ. Avbe emwa na fi ẹmwẹ Osanobua iran werriẹ, Osanobua ne ọ rrọọ, e Nọyaẹnmwa ne Oghodua.

³⁷ E Jerimaia, ya nọ avbe akhasẹ wẹẹ, ‘De ewanniẹn ne Nọyaẹnmwa rhie ne uwa? Vbe Nọyaẹnmwa kha hẹ?’

³⁸ Adeghẹ iran ma ru vbene I khare, iran na ye lo ẹmwẹ na wẹẹ, ‘Ihẹ e Nọyaẹnmwa,’ ẹghẹ nii, u ghi tama iran wẹ.

³⁹ I gha gua iran rhie, I ghi filo iran ku ehe ne ọ rrei mẹ ẹsẹse ke iran kevbe ẹvbo nii ne I mu ne avbe erha iran odede.

⁴⁰ I gha rhie ekhue kevbe efa ne amotiẹn ne iran, egbe ne a i ra vbe mianmian ẹdẹdẹmwẹdẹ.”