Jerimaia 22 - Edo Bible (E Baibol Ẹdo) Version 1996

Uhunmwu Ne Jerimaia Gie Gha rrie Owa Ọba E Juda

^1-2 E Nọyaẹnmwa keghi tama mwẹ ne I gha rrie ẹguae ọba e Juda ne ovbi uniẹn e Devid, ne I ya tama ọba vbe evba, deba ekhaẹmwẹ ọnrẹn kevbe ivbi e Jerusalẹm ne iran danmwehọ vbene Nọyaẹnmwa kha hẹ wẹẹ,

³ “Mẹ ne Nọyaẹnmwa ọ re ọ tama uwa ne uwa gha ru vbene ọ kere kevbe vbene ọ hẹnhẹn. Degue ọmwa ne a mu ru hin obọ ọmwa ne ọ mu ẹẹn ru. Ghẹ ya obọ dan mu ọrriọvbe ra ne u gha wọ iran uhunmwu, kevbe avbe emọ ne ẹ i mwẹ erha kevbe ẹgbẹ, ghẹ vbe gbe emwa ni ma rukhọ ua vbe ehe nọhuanrẹn na.

⁴ Wa gha gele ru vbene I tama uwa, ẹghẹ nii ivbi uniẹn e Devid ọ re ọ ra gha rriọba. Debare, iran kevbe avbe ekhaẹmwẹ iran kevbe emwa iran gha vbe gha hin ikẹkẹ okuo kevbe ẹsin la onurho ẹguae na.

⁵ “Sokpan, a deghẹ wa ma ghi rhie ẹmwẹ ne I tae, I wa vẹn ihẹn ya tae ma uwa wẹ, ẹguae na gha khian itowa. Mẹ ne Nọyaẹnmwa ọ re ọ taa ẹe.

⁶ Te ẹguae ọba e Juda ye mose mose vbe aro mwẹ, zẹ vbene iran ye ighe otọe Giliad kevbe avbe Oke Lebanọn, sokpan, I gha ya ẹe khian otọe ne ọ dihoi rua, ehe ne ọmwarhọkpa i ye.

⁷ I gie emwa de do fuẹn ọnrẹn uan, iran hia gha viọ ughanmwa iran mwẹ obọ gha dee, iran ghi tọnnọ orre isida ẹre ne mose mose gbe otọ, iran ghi silo iran ku erhẹn.

⁸ “Vbe iyekọnii, avbe orhunmwuyẹn nibun gha la evba gberra, iran ghi gha nọ egbe iran emwi ne ọ sii ẹe ne imẹ ne Nọyaẹnmwa na ru ẹvbo nọkhua na emwi vberriọ.

⁹ Ẹghẹ nii, iran ghi wanniẹn wẹ, rhunmwuda ne uwa ma na mu ile ne uwa gunmwẹ ta sẹ nọ, mẹ ne Osanobua uwa, wa na ya gha gho avbe ẹbọ ọvbehe.”

Uhunmwu Ne Jerimaia Gie Vbekpa Joahaz

¹⁰ Ivbi e Juda, wa ghẹ viẹ Josaia ne Ọba, wa ghẹ khiẹ uwu ẹre. Sokpan wa viẹ eve orriara ne Joahaz ne ovbi ẹre; iran mu ẹẹn kpao, ẹ i ghi werriegbe dee, ẹ i dọlegbe ye aro kan otọe nii ehe ne a na biẹ ọe.

¹¹ E Nọyaẹnmwa keghi kha vbe ekpa ọghe ovbi e Josaia ighe Joahaz ne ọ rriọba e Juda lele erha ẹe wẹẹ, “Ọ kpao vbe emwa na rre nẹ, ẹ i ghi dọlegbe dee ọvbehe.

¹² Ẹvbo ne iran mu ẹẹn gha rrie ọ re ọ ra wu yi, ẹ i ghi dọlegbe ye aro kan otọe na ọvbehe.”

Ẹmwẹ Ne Jerimaia Tae Vbekpa Jehoiakim

¹³ Ọwiri ọ re ọghe ọmwa ne ọ ye a i ta ẹmwata bọ owa. Ọ na vbe ya ẹkẹ vbe iwẹnwẹn bọ ba ẹre; ọmwa ne ọ ye ẹvbo ẹre miẹn ẹsọn kua kẹkan vbene ẹ i na vbe ha iran osa.

¹⁴ Ọwiri nọ ne ọmwa ne ọ khare wẹẹ, “I gha bọ owa ẹrẹkhẹrẹ ne egbe mwẹ ne ughugha gbadagbada rre odukhunmwu vbọ.” Rhunmwuda ọnii, ọ gia ewindo ye owa ẹre ọ ya isida yi ẹkhu yọ, ọ keghi ya ẹmu ne ọ baa rra ẹre.

¹⁵ U gha bọlọ owa isida, ne ọ mose sẹ ọghe emwa ọvbehe. Onii gha ya uwẹ khian ọba ne ọ maa sayọ ra? Te erha a wa rrii orhiẹnrhiẹn agbọn rẹn sẹ omwa. Te irẹn wa gha taa ẹmwata, ọ vbe gha ru emwi vbene ọ kei yi, emwi ne ọ ru hia, te ehia wa dunna ne ẹẹn.

¹⁶ Te ọ gha danmwehọ ẹzọ ovbiogue sẹ otọ emwi hia keghi maa ne ẹẹn. Ọnii ọ re a ya a rẹn e Nọyaẹnmwa kha.

¹⁷ Sokpan, emwi ne ọ re ọghe ne egbe uẹ okpa ọ re u bẹghe; u gbe ọmwa ne ọ ma rukhọ, u kegha ye ọkhọ wọ emwa ruẹn uhunmwu. E Nọyaẹnmwa guaan nẹ.

¹⁸ Rhunmwuda ọnii, e Nọyaẹnmwa khare vbekpa e Josaia, ovbi e Jehoiakim ne ọba Juda wẹẹ, “Ọmwarhọkpa i ra khiẹ uwu ẹre ra ne ọ kha wẹẹ, ‘Ẹta ọse mwẹ, ẹta ọse mwẹ o!’ A i miẹn ọmwa ne ọ gha viẹ ọe nẹ, ọ kha wẹẹ, ‘Enaẹmwẹ! Ọba mwẹ!’

¹⁹ Otiti ne ọ rre irorinmwi ekẹtẹkẹtẹ, ọ re a ra ya si ẹe ladian a ghi fi ẹe fua. Vbe a ladian onurho e Jerusalẹm rre nẹ.”

Emwi Ne Jerimaia Wẹ Ọ Gha Rruan E Jerusalẹm

²⁰ Ivbi e Jerusalẹm, wa gha rrie Lebanọn ya go, wa gha rrie Basian ya viẹ wa ke oke Moab da tie emwa rhunmwuda, obọ ke okhunmwu ne iran ni deba ruẹ hia nẹ.

²¹ Ẹghẹ ne agbọn na gha ma ruẹn, e Nọyaẹnmwa guẹ guaan, sokpan, u ma zẹ yọ ẹre re. Erriọ ọ re uwa ya ẹdẹ agbọn ruẹn hia gha ru ẹe. U ma he họn ẹmwẹ ne Nọyaẹnmwa ẹdẹ.

²² Ẹhoho gha hoho avbe ọkaolotu ruẹ gha rrie, a gha munọ iran ni deba ruẹ zẹvbe oghunmwu okuo. A gha fa ẹvbo ruẹ, ekhue gha mu ẹẹn rhunmwuda emwi dan hia ne u ru.

²³ Ẹkun te wa sẹ uẹ otọ vbe uwu ẹbu sida ne a viọ ke Lebanọn rre sokpan, nian, ọ so uẹ vbe obalọ a vba ruẹ, obalọ ne ọ yevbe ọghe okhuo ne emwi ubiẹmwẹ ru.

Osanobua Bu Ohiẹn e Jehoiakin

²⁴ E Nọyaẹnmwa keghi tama e Jehoiakin, ọha ne ovbi e Jehoiakim ne Ọba e Juda wẹẹ, “Omwa vbene a miẹn wẹ mẹ ọ re ọ gele re Osanobua ne ọ rrọọ, ọ gha khọnrẹn ne a miẹn wẹ wẹ ọrọre oroka asẹ ne ọ rrọ mwẹ obọ erha ọmwa, te I yuo ruẹ fua.

²⁵ I ghi rhie ẹre ne emwa ne ohan rẹn mu ẹẹn, emwa ni ho ne iran gbe uẹ ua. I gha rhie ruẹ ne Nebukiadneza ne Ọba e Babilọn kevbe avbe ivbiyokuo ẹre.

²⁶ I gha sua uwẹ vbe iye uẹ gha rrie iwe, Wa gha kpao gha rrie ẹvbo ne ẹ i re ne a na biẹlẹ uwa, evba wa eveva ra na wulo.

²⁷ Wa gha wa ho ne uwa te dọlegbe ye aro kan ẹvbo na, sokpan, wa i ghi dọlegbe dee.”

²⁸ Mẹ keghi kha wẹẹ, “E Jehoiakim ne ọba wa vbe yevbe uru ne ọ wu ne a mu fua, ne ọmwarhọkpa i gualọ nẹ ra? Ọnii ọ siẹe ne a na viọ irẹn vbe ivbi ẹre gha rrie iwe vbe otọ ne a ma rẹn emwi rhọkpa vbe ekpa ẹre?”

²⁹ Wẹ ne otọ, otọ, otọ! Danmwehọ vbene Nọyaẹnmwa kha hẹ.

³⁰ “A bu abe gbe ọmwa na nẹ ne ọ gha re ọmwa ne emọ gha wulo, ne ọ gha re ọmwa ne emwi i ra dunna na. Ẹ i ra gha mwẹ emọ ne ọ gha rriọba vbe Juda zẹ vbe iran ni mudia ye ihe Devid. Mẹ ne Nọyaẹnmwa ọ re ọ taa ẹe.”