Jerimaia 21 - Edo Bible (E Baibol Ẹdo) Version 1996

A Tae Ighe Obọ Gha Ke Ukhunmwu Ne Jerusalẹm

¹ E Zedekaia ne ọba keghi gie ne a tama mwẹ, mẹ ne Pasiọ ne ovbi e Malkaia, kevbe Zẹfanaia ne ohẹn ne ovbi e Maaseia wẹẹ,

² “Lahọ, wa gu e Nọyaẹnmwa guan ne ima, rhunmwuda, e Nebukiadneza ne ọba e Babilọn kevbe ivbiyokuo ẹre ghae ga ẹvbo nẹ. U gha ghe, e Nọyaẹnmwa gha winna ọkpa vbe uwu avbe iwinna ọyunnuan rẹn ne ima, ọ ghi ru ẹe ne Nebukiadneza werriegbe.”

³ Ẹre Nọyaẹnmwa na gunmwẹ guan, I na vbe tama iran ne a gie bu mwẹ gha dee.

⁴ Ne iran tama e Zedekaia wẹ e Nọyaẹnmwa ne Osanobua Izrẹl wẹẹ, “E Zedekaia, te I ra khọn iran muotọ ighẹ ivbiyokuo ruẹ ni gue ọba e Babilọn kevbe ivbiyokuo ẹre khọn, I gha si emwi igbinna ọghe avbe iyokuo ruẹ gboo ye adesẹ ore ẹvbo.

⁵ I gha ye ye ẹtin mwẹ hia, ohu mwẹ hia, izohu mwẹ hia kevbe okuosu mwẹ hia gu uẹ gbinna.

⁶ I gha gbele emwa hia ni rre ẹvbo na, emwa nagbọn kevbe avbe aranmwẹ, emianmwẹ dan gha gbele iran hia.

⁷ Sokpan, wẹ kevbe avbe ekhaẹmwẹ ruẹn kevbe avbe emwa ni miẹn uhunmwu vbọ, I gha gie obọ ọba e Nebukiadneza vba uwa ya munọ, kevbe avbe eghian uwa ni ho ne iran gbele uwa a. Nebukiadneza gha gbele uwa a, ẹ i ra vbe sẹ ọkpa rae vbe uwa, ne ọ tohan uwa ra ne ọ lekhue uwa. Mẹ ne Nọyaẹnmwa ọ re ọ tae.”

⁸ Ẹre Nọyaẹnmwa na tama mwẹ wẹ ne I tama avbe emwa nii wẹẹ, “Wa danmwehọ! Mẹ ne Nọyaẹnmwa ọ re ọ tama uwa ne uwa zẹ vbe eveva, odẹ ne ọ rrie arrọọ ra odẹ ne ọ rrie uwu.

⁹ Ọmwa ikọmwa ne ọ rre ore ẹvbo, okuo gha gbe ẹe ra ohanmwẹ ra emianmwẹ. Sokpan, ọmwa ikọmwa ne ọ ladian, ọ na wa tobọ ẹre bu ivbi e Babilọn gha khian, iran ni wa khọn ẹvbo na khian na, a i ra gbe ẹe rua, ọ gha miẹn ikpakpuhunmu ẹnrẹn rhie ladian, ọ ghi baa, ọ ghi khọ.

¹⁰ I wa tae nẹ, wẹ I i ra sẹ ẹvbo na rae sokpan, I fuẹn ọnrẹn ruan. A gha mu ẹẹn ne ọba e Babilọn, ọ ghi vbe giẹn ọnrẹn muotọ. Mẹ ne Nọyaẹnmwa taa ẹe nẹ.”

A Buohiẹn Owa Ọba E Juda

^11-12 E Nọyaẹnmwa keghi tama mwẹ wẹ ne I gha rrie owa ọba e Juda ne ovbi uniẹn e Devid ne I ya tama iran wẹẹ, “Danmwehọ ẹmwẹ ne imẹ ne Nọyaẹnmwa tae. Gie a miẹn wẹ ohiẹn ẹmwata ọ re a bu ẹdẹgbegbe. Mudia ne ọmwa ne a mu ru vbe ehe ne ọmwa ne ọ mu ẹẹn ru ye. A deghẹ u ma ru vberriọ, emwi dan ne u ru gha ye ohu mwẹ giẹn zẹ vbe erhẹn ne a i sẹtin dọyọ.

¹³ E Jerusalẹm, wẹ tota ye ehe ne ọ yo sẹ avbe iya ẹsẹse, zẹ vbe okuta nọkhua, ne ọ yo sẹ otọe ne ọ rriẹe ẹsẹse. Sokpan, I gha guẹ gbinna. U khare wẹ ọmwa ne ọ gha sẹtin dekun ruẹn i rrọọ ra ọmwa ne ọ gha sẹtin ha emwi ne u ya gba ogba ga egbe i rrọọ.

¹⁴ Sokpan, I gha rrio oya ye emwi ne u ru. I gha mu erhẹn ye ẹguae ruẹ, erhẹn ni gha giẹn emwi ni lẹga ẹre hia sotọ. Mẹ ne Nọyaẹnmwa ọ re ọ tae.”