Jerimaia 20 - Edo Bible (E Baibol Ẹdo) Version 1996

Imuaẹmwẹ Ne Ọ Gha Rrọọ Ne Jerimaia Kevbe Pasiọ Ne Ohẹn

¹ Ugbẹn vbe Pasiọ ne ohẹn ne ovbi Ima, ne ọ gha re ọkaolotu iran ne ọgbalegbe Ọgua Osa ghi họn vbe I ta avbe ẹmwẹ na,

² Ọ na wẹ ne iran gbe mwẹ, ne a ye ọgiọrọ rrọ mwẹ vbe ọkpẹn Onurho e Bẹnjamin ne ọ ke Ọdọ vbe Ọgua Osa.

³ Ẹdẹ ghi gbe vbe Pasiọ ghi kuọ ọgiọrọ hinmwẹ egbe rre nẹ. I keghi tama rẹn wẹẹ, “Ẹ i re Pasiọ ọ re Nọyaẹnmwa he uwẹ re sokpan Ohan Vbe Ehehia.”

⁴ E Nọyaẹnmwa tobọ ẹre khare wẹẹ, “Rẹn ra ya uwẹ khian ohan ne egbe ruẹ kevbe avbe ọse ruẹ hia, wẹ gha vbe miẹn iran vbe a ya umozo avbe eghian gbele iran hia. I ra do viọ ivbi e Juda hia yan ẹtin ọba e Babilọn obọ. Ọ gha viọ eso vbọ oghunmwu gha rrie ẹvbo irẹn, ọ ghi gbele ni dekẹe ua.

⁵ I gha vbe gie avbe eghian iran fu iran ẹfe ni rre ẹvbo na viọ gha rrie, iran ghi vbe ya ẹtin viọ ẹfe ni rrọọ kevbe emwi ne iran mwẹ hia, ya sẹ egbe emwi ewe ọghe avbe ọba e Juda, iran ghi viọ emwi hia gha rrie Babilọn.

⁶ Zẹ vbene ọ kan uwẹ vbọ e Pasiọ, obọ gha vba uwẹ kevbe ẹgbẹe ruẹ hia, iran ghi viọ iran gha rrie Babilọn. Evba ọre u ra na wu, a ghi vbe re ruẹ ba avbe ọse ruẹ nibun, ne u gha ta ohoghe ni bun sẹrriọ ma.”

E Jerimaia Gui Ma E Nọyaẹnmwa

⁷ E Nọyaẹnmwa, u mu mwẹ rẹrẹ nẹ, mẹ keghi khian ne a mu rẹrẹ. U wegbe sẹ mwẹ, obọ ruẹ keghi ke ukhunmwu mẹ. Te emwa hia ghi ya mwẹ gbe ogie te iran ghi gie mwẹ ne ebi ro.

⁸ Ẹghẹikẹghẹ ne I rhirhi a ya guan I ghi gha tie, “Ọkhọ kevbe Ọfuan.” Nọyaẹnmwa, I khian ne a ghi ya gbe ogie kevbe ne a zan vbe ẹghẹ hia, rhunmwuda ighẹ I ta uhunmwu ne u gie.

⁹ Sokpan, I gha kha wẹẹ, “I gha mianmian e Nọyaẹnmwa, I i ghi vbe dọlegbe guan vbe eni ẹnrẹn.” Ẹghẹ nii, uhunmwu ne u gie ghi yevbe erhẹn ne ọ giẹn vbe uwu imẹ I ghi gha hia ne I yẹn ọnrẹn muotọ, sokpan I i ghi sẹtin rhie ẹre lẹre.

¹⁰ I ghi họn vbe agbọn hia tae wẹẹ, “Ohan gba ehe hia, wa gia ya gu ẹe gui ma iran ni khaemwisẹ.” Uhin ghe te avbe ọse mwẹ ni sikẹ mwẹ sẹẹ, khẹ ẹghẹ ne I gha ya de, iran wẹẹ, “Wẹ wẹ ẹ ghi gia rẹrẹ, ẹghẹ nii, obọ ima ghi vba ẹre ne a rria ẹre ikhi.”

¹¹ Sokpan, Nọyaẹnmwa ne ọ wegbe kevbe ne ọ mwẹ ẹtin mẹ ọ re uwẹ deba ẹ i ra dunna ne iran ni zẹ mwẹ kpokpo. A gha fa iran an ẹdẹdẹmwẹdẹ, rhunmwuda, ẹ i ra mwẹ uhunmwu ne iran. Ai ra mianmian efa ne ọ rruan iran ẹdẹdẹmwẹdẹ.

¹² Sokpan, e Nọyaẹnmwa ne Oghodua wẹ danmwẹ emwa ghe vbene ọ kei yi; wẹ rẹn emwi ni rre ekhọe kevbe ẹko iran. Rhunmwuda ọnii, gun mwẹ miẹn vbe u rria avbe eghian mwẹ ikhi, rhunmwuda, wẹ ọ re I rhie ẹdagbọn mwẹ ye ọre obọ.

¹³ Wa so ihuan ghe Nọyaẹnmwa, wa rho e Nọyaẹnmwa, ọ miẹn iran ne a wọ ẹre uhunmwu fan vbe obọ avbe emwa dan.

¹⁴ Wa fi ẹdẹ ne a biẹ mwẹ unu, wa mianmian ẹdẹ ne iye mwẹ biẹ mwẹ.

¹⁵ Wa fi ọmwa ne ọ ye ẹko erha mwẹ gha rhiẹnrhiẹn, unu, ne ọ do na iyẹn ni ma rẹn wẹẹ, “Ọmọ okpia nọ, u biẹ ọmọ okpia.”

¹⁶ Te ọ gha họn utumwẹ obalọ vbe owiẹ kevbe okokoko ọghe okuo vbe ogiavan.

¹⁷ Rhunmwuda, ọ ma gbe mwẹ uan a te biẹ mwẹ ẹghẹ nii ẹko iye mwẹ ọ re ọ ghẹ gha re idin mwẹ.

¹⁸ Vbọzẹ ne a na biẹ mwẹ yi? Ne a ye efa rhie ufomwẹ ye ẹdẹ agbọn mwẹ?