Jerimaia 2 - Edo Bible (E Baibol Ẹdo) Version 1996

Osanobua Gbe Aro Ghe Izrẹl

¹ E Nọyaẹnmwa keghi tama mwẹ,

² ne I ya ta ẹmwẹ na ma emwa hia ni rre Jerusalẹm. “I yerre wẹ ọmwa ne ọ mudia ẹse ọ re u wa gha khin vbe ẹghẹ ne u na ye kherhe. Vbene u gha ho ẹmwẹ mwẹ hẹ vbe ẹghẹ ne a na da rhie ruẹ rre. U lele mwẹ la ato, la otọ ne a ma he mu ẹre ugbo ẹdẹ.

³ Izrẹl mẹ okpa ọ re ọ te yan ruẹn emwi nọhuanrẹn ọ re u te gha khin mwẹ re I si oya kevbe usẹ ye iran ni kuan ruẹn egbe. Mẹ ne Nọyaẹnmwa taa ẹe nẹ.”

Orukhọ Izrẹl

⁴ Wa danmwehọ uhunmwu ne Nọyaẹnmwa gie rre, wa ne ivbi uniẹn Jekọb wa ne ẹwae Izrẹl.

⁵ E Nọyaẹnmwa khare wẹẹ, “De ẹzọ ne avbe erha uwa odede miẹn gunmwẹ gui yi?” De emwi ne iran ghi rhunmwuda ẹre fi iyeke gbe mwẹ? Iran tobọ iran keghi khian ne ẹ i mwẹ esa ne ọ ye.

⁶ Iran ma zẹ yọmwẹ re. A gha rhe miẹn wẹ mẹ ọ re ọ fannọ iran ke Igipt ladian. I keghi su iran la otọ oha gberra otọe ne ato kevbe uye ekhae ye otọe ne ọ kae kevbe ne ọ vuọn ne ẹbe ehe ne ọmwa rhọkpa i ye ne a i vbe miẹn ọmwa ne ọ lae gberra ẹdẹ.

⁷ I keghi viọ iran gha die otọ ne ọ maa emwiokọ. Ne iran do gha ya emwiokọ ni rrọ ru, deba emwi ni maa ni rrọọ hia. Sokpan, ne iran gha na te ru vberriọ, iran keghi mu otọe mwẹ rhia. Iran keghi ru ẹvbo ne I mu ne iran awua.

⁸ Avbe ohẹn ma vbe nọ wẹẹ, “E Nọyaẹnmwa vboo?” Avbe ohẹn mwẹ ma rẹn mwẹ, avbe iran ni khaemwisẹ keghi sọtẹ mwẹ, avbe akhasẹ kegha ye eni e Baal guan yotọ iran kegha gho avbe amazẹ ni emwa maa.

Ẹzọ Ne Nọyaẹnmwa Gu Emwa Rẹn Gui

⁹ Rhunmwuda, mẹ ne Nọyaẹnmwa gha dọlegbe talọ ẹzọ ni gu emwa mwẹ gui, I gha ba ivbi uniẹn iran ifi ẹzọ.

¹⁰ Wa laghe odẹ orrie gha rrie Saiprọs ne uwa gie ọmwa gha rrie otọe Keda vbe odẹ ekẹn wa gha miẹn wẹ, emwi e ọ ye vbenian ma he ka sunu ẹdẹ yi.

¹¹ Ẹvbo ọvbehe ne ọ he fi ẹbọ ne iran gho werriẹ i rrọọ, egbe ne iran i rhe ya re ẹbọ ẹmwata, sokpan, emwa mwẹ ya mwẹ rọ nẹ. Mẹ ne Osanobua ne ọ rhie uyi gie iran, iran keghi zẹ avbe ẹbọ ne ẹ i sẹtin ru emwi rhọkpa ne iran.

¹² Ọ re I na wẹ ne iso mu rueghe ọghe ugborrirri ne ọ yan iran unuan, ne afianma fian iran,

¹³ rhunmwuda orukhọ eva ọ re emwa mwẹ ru: iran fi iyeke gbe mwẹ, mẹ ne uhunmwu ẹzẹ amẹ ne ọ furre, iran keghi ya gha fian ivbi uhae, uhae ni halọe, ne ẹ i vbe sẹtin rrọ amẹ hiehiere.

Emwi Ne Ọ Ke Alama Izrẹl Ikianrhokpa

¹⁴ “Izrẹl i re ọviẹn, a ma te biẹ ọre ọviẹn vbọzẹ ne avbe eghian rẹn ghi na zọ owẹ ọre ya khu ẹe khian yi?

¹⁵ Iran vannọ mu ẹẹn zẹ vbe oduma, iran ya otọe ẹre khian ato, avbe okpẹvbo ni rrọ khian itowa ne emwa na lẹ kpao fẹẹrẹ.

¹⁶ Ẹn, ivbi e Mẹmfis kevbe Tapanhes guọghọ ẹre ugboloko uhunmwu.

¹⁷ Izrẹl, obọ ruẹ ọ re u ya sii ọna ye egbe ruẹ egbe! U fi iyeke gbe mwẹ mẹ ne Nọyaẹnmwa ne Osanobua ruẹ, vbe imẹ su uwẹ khian vbe odẹ.

¹⁸ De ere ne ọ rre uwa ẹre yi vbe uwa a dọlegbe gha rrie Igipt, ne uwa ya wọn amẹ Naẹl? De emwi ne uwa yayi ighe wa gha miẹn vbọ, vbe uwa a dọlegbe gha rrie Asiria, ne uwa ya wọn amẹ Yufretes?

¹⁹ Emwi dan uwa ọ re ọ ra rri uwa oya ne uwa na fi iyeke gbe mwẹ ọ re ọ ra bu abe uwa. Wa gha ruẹ vbene ọ rriara hẹ kevbe, vbene ọ ma gba hẹ ne uwa na hee mwẹ yotọ mẹ ne Nọyaẹnmwa ne Osanobua rua; vbene uwa i ghi na vbe ya ọghọ mẹ. Mẹ ne Nọyaẹnmwa ne Udazi, ne Oghodua taa ẹe nẹ.”

Izrẹl He Ne Iran Ga E Nọyaẹnmwa

²⁰ E Nọyaẹnmwa ne Udazi khare wẹẹ, “Izrẹl, ọ kpẹre ne uwa ghi he asẹ mwẹ yotọ wa he ne uwa họn ẹmwẹ mẹ ra ne uwa ga mwẹ wa keghi ya gha gho avbe ẹbọ emwiokọ, vbe uhunmwu oke kevbe ototọ erhan ni mwẹ ebe hia.

²¹ I kọ uwa zẹ vbe azara ne a ya họn ọghe ọmọ erhan ne ọ maa sẹẹ ehia. Sokpan, ghe emwi ne uwa ghi do khian te uwa ghi yevbe azara ne ọ kẹkẹe, ọ na vbe rhiara.

²² Ọ gha khọn uwa, wa ya ye evbakhuẹ ne ọ ghi huan emwi sẹ khue te I gha ye bẹghe ehe ne abakuru uwa ya iruẹn yi.

²³ Vbe uwa ghi ra tae hẹ yi ighe wa ma ru awua, wẹ, wa ma he gho e Baal ẹdẹ. Wa ghe vbene uwa ru orukhọ hẹ vbe uwu iya, wa ghe emwi ne uwa he ru, te uwa ye vbe ede amwẹ vbe ẹghẹ owowo, wa gha rhulẹ yo rhulẹ rre vbe ne a ma na gbe odẹ,

²⁴ wa khọn la uwu ato, ọ gha la ẹre uhunmwu, gha o gha sẹtin dae yi? Ọwẹe ne ọ ho ne ọ mu ẹẹn, wẹ ne ọ ghe zẹdẹ kpokpo egbe. Te ọ wa kpọ khan vbe ọ gha se ẹghẹ nẹ.

²⁵ Izrẹl, ghẹ wiẹn owẹ uwa a ra ne ẹho uwa vbe kaka ne uwa ya khọn lele ẹbọ ọvbehe khian. Sokpan, wa ghi kha wẹẹ, ‘Ẹn o, I i sẹtin werriegbe. Avbe ẹbọ ẹrrẹe la mwẹ aro nẹ, te I ra lele iran.’ ”

Ọ Khẹke Ne A Rri Izrẹl Oya

²⁶ E Nọyaẹnmwa khare wẹẹ, “Zẹ vbene a ya oya ne oyi vbe a gha mu ẹẹn, erriọ zẹẹ, ọ re a ra ya oya ne uwa ne ivbi Izrẹl hia avbe ọba uwa, kevbe avbe ekhaẹmwẹ kevbe avbe ohẹn kevbe avbe akhasẹ.

²⁷ Erriọ ọ re a ra ya oya ne uwa ni kha wẹ erhan ọrọre erha uwa, okuta ọrọre iye uwa. Erriọ ọre ọna ra sunu rhunmwuda, wa fi iyeke gbe mwẹ vbe ọ te kei ne uwa bu mwẹ gha dee. Sokpan, wa gha rre uwu ibaro, wa ghi wẹ ne I do miẹn uwa fan.

²⁸ “Avbe ẹbọ ne uwa mu gbọ ne egbe uwa ghi vbo yi? Wa gha rre uwu ibaro, wa we ne iran do miẹn uwa fan adeghẹ iran gha sẹtin. E Juda, vbene avbe okpẹvbo uwa bun sẹ, erriọ ọ re avbe ẹbọ uwa vbe sẹ.

²⁹ De ẹzọ ne uwa mobọ gui yi? Vbọzẹ ne uwa na sẹmwẹ mwẹ yi?

³⁰ I rrii uwa oya, sokpan, ọ ma gbe emwi rhọkpa, wa iho ne I gbe uwa hin ọkhọ rre. Wa gbele avbe akhasẹ uwa zẹ vbe oduma ne ọ tu.

³¹ Ivbi Izrẹl, wa danmwehọ ẹmwẹ ne I guan. Mẹ he ye vbe ato ne uwa ẹdẹ ra, zẹ vbe ẹvbo dan ne ọ su ebiebi. Vbe uwa ghi na kha hẹ wẹ emwi ne ọ khọn uwa ọ re uwa ra gha ru ighe wa i dọlegbe bu mwẹ dee.

³² Okhuo ọvbokhan vbe mianmian ikpẹrọnmwọ itegbe ẹre ra? Ra ne ovbiọha mianmian ẹwu irhiọha ẹre. Sokpan avbe emwa mwẹ mianmian mwẹ la inu ẹghẹ ne a ghi sẹtin ka nẹ.

³³ “Wa rẹn vbene a rhikhan lele ikhuo ne uwa zẹ ọre ọse hẹ. Okhuo ne ọ ghi rhia sẹẹ, te ọ gha miẹn emwi ruẹ vbe obọ uwa.

³⁴ Esagiẹn ivbiogue kevbe iran ni ma rukhọ wulo lele uwa ukpọn, ẹ i re esagiẹn avbe ikpata oyi. “Sokpan, vbene uwa ye ru ena hia sẹ.

³⁵ Te uwa ye kha wẹẹ, ‘I ma rẹn okpa I ma rẹn eva, e Nọyaẹnmwa i ghi mu ohu mwẹ ọvbehe.’ Sokpan, mẹ ne Nọyaẹnmwa gha rri uwa oya, rhunmwuda ne uwa na siẹn ne uwa na tae na ighe wa ma rukhọ.

³⁶ Wa ye egbe uwa khian ekẹkẹ ẹbo vbekpa ne uwa na gha rrie ọghe ẹbọ ẹrrẹe. Igipt gha hiẹ uwa zẹ vbene Asiria vbe hiẹẹ uwa.

³⁷ Wa gha kpa hin ehe ne Igipt ye rre, wa ghi ye ekhue mu uhunmwu yan izabọ. Mẹ ne Nọyaẹnmwa he iran ne uwa mu ẹtin yan nẹ. Wa i ra miẹn ọ maa okpa rhie vbe obọ iran.”