Jerimaia 19 - Edo Bible (E Baibol Ẹdo) Version 1996

Uru Ne Ọ Guọghọ

¹ E Nọyaẹnmwa keghi tama mwẹ wẹ ne I ya dẹ uru ne a ya obuẹ ma. Ọ na vbe tama mwẹ wẹ ne I viọ eso vbe uwu avbe ediọn ba egbe kevbe eso vbe uwu avbe ohẹn ni wan sẹẹ

² ne I la Onurho Ọmakhe gha rrie, Iya Hinọm. Evba nii ọ re ọ wẹ ne I na ta uhunmwu ne irẹn gha gie mwẹ re.

³ E Nọyaẹnmwa keghi tama mwẹ wẹ ne I kha wẹẹ, “Avbe ọba e Juda, kevbe ivbi e Jerusalẹm, wa danmwehọ ẹmwẹ ne Nọyaẹnmwa ne Oghodua ne Osanobua Izrẹl ra ta. I ra gie egbe ọkhọ okpa do sunu vbe emwa na, wẹ izegbe gha zẹ dọmwadẹ ọmwa ne ọ rhirhi a họn ẹẹn.

⁴ I ra ni ẹe vberriọ rhunmwuda, avbe emwa na hee mwẹ yotọ nẹ, iran kevbe mu awua la emwa na vbekpa ne iran na gha zọ ese ghe avbe ẹbọ ọvbehe vbe emwa na, avbe ẹbọ ne iran tobọ iran ra avbe erha iran odede ra avbe ọba e Juda ma rẹn emwikemwi vbe ekpa ẹre. Iran ye esagiẹn emwa ni ma rukhọ vuọn emwa na.

⁵ Iran bọlọ Ogiukpo ne Baal ne iran na gha giẹn ivbi ran an ya gha zọ ese. Mẹ ma tama iran ne iran ru emwi na, ọ ma vbe gha rrọ mwẹ ekhọe vbe ẹghẹ ikẹ ghẹ.

⁶ Rhunmwuda ọnii nian, ẹghẹ dee ne a i ghi ra na gha tie emwa na Tofẹt ra Iya e Hinọm. Sokpan a ghi gha tie ẹre Iya Ugbelemwẹ.

⁷ Emwa na I ra na duẹ uma ivbi e Juda kevbe Jerusalẹm hia a, I gha gie obọ avbe eghian iran ke okhunmwu ne iran, iran ghi gbele iran vbe okuo. I ghi viọ ikun iran ne avbe ahianmwẹ kevbe avbe aranmwẹ oha gha re.

⁸ I gha gie egbe ọkhọ vberriọ sunu vbe egbe ẹvbo na wẹ ọmwaikọmwa ne ọ rhirhi la ẹe gberra, orrirri ghi gbe ku ọre, ọ ghi yan ẹre unu uan.

⁹ Avbe eghian gha lẹga ẹvbo nii, iran ghi gha ho ne iran gbele emwa ni rrọọ. Okuo ne ọ gha ga ẹre gha mu ohan sẹrriọ wẹ emwa ni rre uwu ẹre ghi gha gbele egbe iran re, uhin ighe iran gha vbe gha gbele ivbi iran re.”

¹⁰ Ẹre Nọyaẹnmwa na tama mwẹ wẹ ne I gbe uru ni uan sirra emwa ni lele mwẹ gha khian.

¹¹ Ne I vbe tama iran wẹ e Nọyaẹnmwa ne Oghodua khare wẹẹ; “I gha guọghọ emwa na kevbe ẹvbo na an, ọ ghi ye vbe uru obuẹ ne a guọghọ ua nẹ ẹ i ghi gie a dọlegbe mama kugbe. Emwa gha ya gha re orinmwi iran ye Tofẹt, rhunmwuda ehe ọvbehe i ghi ra gha rrọ ne a gha re iran yi.

¹² I yaan nẹ ighe I gha ye ẹvbo na kevbe emwa ni rrọọ khian vbene Tofẹt ye.

¹³ Avbe owa ni rre Jerusalẹm, avbe owa avbe ọba ni rre Juda, vbe ẹmwata avbe owa hia ne a ghi na gien eturari vbe ẹrhunrhun owa ẹre ne avbe orhọnmwẹ, kevbe avbe owa ne a ghi na sa ayọn kua zẹ vbe emwi izọ ese ghe avbe ẹbọ ọvbehe, ehia ọ re ọ gha khian ne awua ye zẹ vbe Tofẹt.”

¹⁴ Ẹre I na kpao vbe Tofẹt rre, ehe ne Nọyaẹnmwa gie mwẹ gha rrie ne I na ya ta uhunmwu ne irẹn gie. I kegha rre ọgua nọkhua ọghe Ọgua Osa, I ke ya tama avbe emwa nii hia.

¹⁵ Wẹ e Nọyaẹnmwa ne Oghodua, ne ọ re Osanobua Izrẹl khare wẹẹ, “Oya hia ne I khare ighe I gha rri iran re, I ra mu ẹẹn sẹ vbe egbe ẹvbo na kevbe avbe ẹvbo ni sikẹ ọre, rhunmwuda, wa zevbudu gbe, wa i vbe danmwehọ ẹmwẹ ne I ta.”