Jerimaia 18 - Edo Bible (E Baibol Ẹdo) Version 1996

Jerimaia Vbe Owa Ọmakhe

¹ E Nọyaẹnmwa keghi tama mwẹ wẹẹ,

² “Gha rrie owa ọmakhe, evba ọ re I gha na gu uẹ guan.”

³ Ọ re I na gele gha khian, I na do vba vbe ọmakhe gha ma ẹẹn vbe ehe ne ọ na ma ẹẹn.

⁴ Ẹghẹ ikẹghẹ ne ọ ya miẹn ighe akhe ne irẹn maẹn ma defiọ fo, ọ ghi rhie obuẹ nii ya ma emwi ọvbehe.

⁵ Ẹre Nọyaẹnmwa na tama mwẹ wẹẹ,

⁶ “Mẹ i mwẹ asẹ ne I ya ru uwa ne ivbi Izrẹl zẹ vbene ọmakhe ru obuẹ ra? Te uwa ye vbene obuẹ ye vbe obọ ọmakhe vbe obọ mwẹ.

⁷ Adeghẹ mẹ khare wẹ, I gha si arriọba ra ẹvbo vbọ, ra ne I guọghọ ẹe rua, ra ne I fuẹn ọnrẹn ruan,

⁸ ẹre ẹvbo nii ghi na fi uyinmwẹ dan rẹn werriẹ, I i ghi ru ẹre emwi ne I te wẹ I gha ru ẹre re.

⁹ Erriọ vbe nọ, I gha kha wẹ I ra mu ẹvbo ra arriọba ọkpa mudia ra ne I dọlọ ẹe yi.

¹⁰ Sokpan, ẹvbo nii keghi gha yan mwẹ zẹ, ọ na ya gha ru emwi dan, I i ghi vbe ru emwi ne I te wẹ I ra ru.

¹¹ Banbanna nian, tama ivbi e Juda kevbe Jerusalẹm wẹ, I wa khuan khẹ iran, I wa mu egbe ne I ya rri iran oya. tama iran ne iran dobọ uyinmwẹ dan ne iran yin yi, ne iran fi ohọ werriẹ kẹe kevbe emwi ne iran ru.

¹² Iran gha wanniẹn wẹẹ, ‘Ẹn o, vbọzẹ? Ma gha wa ze vbe udu, a ghi vbe gha ru emwi dan khian zẹ vbene ima ho ne ima gha ru.’ ”

Iran He Nọyaẹnmwa

¹³ E Nọyaẹnmwa keghi kha wẹẹ, “Wa nọ dọmwadẹ uhunmwu ẹvbo ghe adeghẹ egbe emwi vberriọ he ka sunu ẹdẹ. Ivbi Izrẹl ru a ghẹ ru nẹ!

¹⁴ Wa he miẹn vbe isonorhọ kae vbe oke Lebanọn ẹdẹ ra? Ẹzẹ ne ọ furre, ne ọ lẹ ke uhunmwu ẹnrẹn rre, he vbe ka ẹdẹ ra?

¹⁵ Sevba, emwa mwẹ mianmian mwẹ, iran gha giẹn eturari ne avbe amazẹ. Iran rrua owẹ vbe odẹ ne ọ te kei ne iran la iran i ghi lele odẹ nẹdẹ, odẹ ne a ma gbẹn ọre iran ghi la.

¹⁶ Iran ye otọe nii khian ọghe ohan ne a ra gha zan ẹdẹdẹmwẹdẹ emwa ni lae gberra hia gha miẹn emwi ne ọ gha ye izegbe zẹ iran vbọ ọ gha yan iran unu uan, iran ghi gha fieghe uhunmwu.

¹⁷ I gha zagha emwa mwẹ vbe odaro avbe eghian iran, zẹ vbe ebubẹ ne ẹhoho hoho khian I ghi fi iyeke mwẹ gbe iran I i ra yi iran obọ, vbe ọfuan ni a rre.”

Iran Khuan Khẹ Jerimaia

¹⁸ Emwa nii keghi kha wẹẹ, “Wa gia gualọ vbene a gha ru ẹmwẹ e Jerimaia hẹ. A gha miẹn avbe ohẹn ne ọ gha ma ima emwi rhinrin, avbe umẹwaẹn ni gha bu ima ude, kevbe avbe akhasẹ ni gha ta ẹmwẹ Osanobua ma ima. Wa gie a mu ẹmwẹ kuan rẹn, ne a ghẹ ghi danmwehọ ẹmwẹ ne ọ ta.”

¹⁹ Ẹre imẹ ghi na na erhunmwu wẹẹ, “Nọyaẹnmwa, danmwehọ ẹmwẹ ne I ta, ne u vbe danmwehọ ẹmwẹ ne avbe eghian mwẹ ta vbe ekpa mwẹ.

²⁰ Ọkhọ ọ re a ya ha osa ọma ra? Sevba, iran tọn uvun ye otọ khẹ mwẹ ne I de yọ. Yerre vbene I bu ruẹ rre hẹ, I na do gha rinmwian ne iran wẹ ne u ghẹ ye ohu ru iran emwi.

²¹ Sokpan, banbanna nian Nọyaẹnmwa gie ohan gbele ivbi iran an, gie okuo gbele iran. Gie ọdọ wulo avbe ikhuo ni rrọọ, kevbe emọ. Gie emianmwẹ gbele avbe ikpia ni rrọọ, ne avbe igbama ni rrọọ wulo ye okuo.

²² Gie otu ọkhọ ya fu iran emwi viọ vbene iran ma na họn yotọ. Gie iran viẹ rhunmwuda ohan nọkhua. Iran tọn uvun yotọ khẹ mwẹ ne I de yọ, iran keghi vbe khuẹn ifi khẹ mwẹ wẹ ne ọ mu mwẹ.

²³ Sokpan, Nọyaẹnmwa, wẹ rẹn emwamwa iran wẹ ne iran ghe mwẹ uan. Ghẹ ye ọkhọ iran bọ iran, ra ne u ya orukhọ iran bọ iran. Mu iran gbotọ ne obọ ke ukhunmwu ne iran, ne u vbe ye obọ mu iran vbe ohu a gha mu uẹn.”