Jerimaia 17 - Edo Bible (E Baibol Ẹdo) Version 1996

Orukhọ Kevbe Irrioya E Juda

¹ E Nọyaẹnmwa keghi kha wẹẹ, “Ivbi e Juda, ukeke ematọn ọ re a ya gbẹnnẹ orukhọ uwa yotọ, emwi ne ọ mwẹ ukpe ọghe ẹdaimọn ọ re a ya gbẹnnẹ ọẹn ye uwa ẹkoko udu, a keghi kaa ẹre ye efẹn Ogiukpo uwa.

² Ehe ne avbe Ogiukpo ye ọ re avbe emwa na ga, kevbe ne a mu gbọ ne Asiẹrra ne ẹbọ ne okhuo, vbe ehe ne erhan ne ọ mwẹ ebe ye, kevbe uhunmwu oke negiẹrẹ.

³ Kevbe avbe oke nekhua vbe oha. I gha gie avbe eghian uwa viọ avbe ẹfe emwi ewe uwa gha rrie rhunmwuda avbe orukhọ hia ne uwa he ru lele otọe uwa hia.

⁴ Wa gha vbe zobọ vbe otọe ne I te mu ne uwa, I ghi vbe ru ẹe ne uwa ya ga avbe eghian vbe otọe ne uwa ma rẹn emwi rhọkpa vbe ekpa ẹre rhunmwuda te ohu mwẹ ye vbe erhẹn, ọ gha vbe gha yọn rhinrin ẹdẹdẹmwẹdẹ.”

Avbe Ẹmwẹ Ughughan

⁵ E Nọyaẹnmwa khare wẹẹ, “Mẹ gha bu abe gbe ọmwa ne ọ fi iyeke gbe mwẹ, ọ na ya mu ẹtin yan ọmwa, yan ẹtin ọmwa ne ọ vbe wu.

⁶ Te ọ yevbe irunmwu ne ọ zọ ye ato, ne ọ vbe wan vbe otọe ne ọ kakae ne ẹ i maa, otọe umwẹ ne emwi ọvbehe rhọkpa i na zọ. Emwi ne ọ maa okpa i vbe sẹ ọre egbe.

⁷ “Sokpan mẹ gha fiangbe ọmwa ne ọ mu ẹtin ẹnrẹn yan mwẹ.

⁸ Te irẹn yevbe erhan ne ọ zọọ vbe ọkpẹn ẹzẹ, ne ọ vbe zẹẹ inian ya fi uwu amẹ ohan i mu ẹẹn vbe uyunmwu a rre rhunmwuda, ebe ẹre ghi ye biua nunuunu ẹ i vbe hawa vbe amẹ ma rhọ ọ ghi ye gha mọ khian.

⁹ Gha ọ gha sẹtin rẹn otọ vbene ekhọe ọmwa nagbọn ye hẹ? Emwi ọvbehe ne ọ rẹrẹ ọmwa vbe ne irẹn ye i rrọ ọ khuọnmwi gberra ne ọ gie sinmwi nẹ.

¹⁰ Mẹ ne Nọyaẹnmwa ọ re ọ gualọ otọ ẹko ghe, I vbe gualọ otọ ekhọe ọmwa, vbe ne dọmwadẹ ọghọe ru emwi, ọ re I vbe ya ye ohọ mu ẹẹn. Zẹ vbene emwi ne ọ ru vbe ye.”

¹¹ Ọmwa ne ọ ye odẹ ero miẹn igho, ọ yevbe ahianmwẹ ne ọ gbe ekẹn ne ọ ma họ. Ọ gha he wa rre atẹ, ọ gha mu ẹfe ẹre fua, ọ gha ghi sẹ okiekie, rẹn ghi do gha re akpa.

¹² Te Ọgua Osa mwa yevbe ẹkete uyi, ne ọ mudia yan oke ne ọ yo ke omuhẹn gha dee.

¹³ E Nọyaẹnmwa, wẹ ọrọre idaehọ Izrẹl, ekhue gha mu iran hia ni he uwẹ yotọ a gha ho iran bẹkun zẹvbe eni ne a gbẹnnẹ ye ekhae rhunmwuda, iran hee uwẹ ne Nọyaẹnmwa yotọ nẹ, wẹ ne uhunmwu ẹzẹ amẹ ne ọ furre.

E Jerimaia Nọ Iyobọ Vbe Obọ E Nọyaẹnmwa

¹⁴ Nọyaẹnmwa, mu mwẹ egbe rran, egbe gha wa rran mwẹ giẹnrẹn; yuo mwẹ ladian, I gha vbe fe vbe obọ ẹbe fẹẹrẹ, wẹ ọrọre ọmwa ne imẹ rho vbe uyi!

¹⁵ Avbe emwa ni tama mwẹ wẹẹ, “Eyan ne Nọyaẹnmwa gha yan gie ima nii hia vboo yi, wẹ ne ọ mu ẹẹn sẹ nian!”

¹⁶ Sokpan, mẹ ma kha wẹ ne u gie ọkhọ rruan iran Nọyaẹnmwa. Mẹ ma vbe kha wẹ ne iran miẹn ibaro. E Nọyaẹnmwa, wẹ rẹn ọnọna, wẹ rẹn ẹmwẹ ne I tae.

¹⁷ Ghẹ khian ne afianma rẹn ghi fian mwẹ, wẹ ọrọre ehe ne I lẹ lao hin ẹbe rre, vbe ukpokpo a rre.

¹⁸ Fa iran ni kpokpo mwẹ uan, sokpan gie ẹe la mwẹ ban Nọyaẹnmwa. Ye ohan vuọn iran, sokpan, ghẹ runran mwẹ. Gie ọkhọ rruan iran, ne u dunmwu iran rẹnkhẹnrẹnkhẹn.

Vbekpa Ulomwẹ Ẹdẹ Ikẹtin

¹⁹ E Nọyaẹnmwa keghi tama mwẹ wẹẹ, “E Jerimaia, ya ta uhunmwu ne I gie uẹ ẹre na vbe Onurho Emwa, ehe ne ọba e Juda la ladian kevbe ne ọ vbe la la ore ẹvbo, iyekọnii, u ghi vbe gha rrie avbe onurho nekpa ọghe Jerusalẹm.

²⁰ U ghi tama avbe ọba kevbe emwa ni rre Juda hia kevbe avbe emwa ni rre Jerusalẹm, ni ghi la onurho na nẹ, ne iran danmwehọ ẹmwẹ ne I guan.

²¹ Tama iran wẹ deghẹ ohan egbe iran to iran, ne iran ghẹ mu ihẹ vbe Ẹdẹ Ikẹtin, iran ghẹ vbe mu emwikemwi la onurho e Jerusalẹm la owa.

²² Ra ne iran vbe mu emwikemwi ladian vbe owa iran vbe Ẹdẹ Ikẹtin, iran ghẹ winna vbe Ẹdẹ Ikẹtin. Iran ghi ya ẹe ru ẹdẹ nọhuanrẹn, zẹ vbe ne I tama avbe erha iran odede.

²³ Avbe erha iran odede ma họn ẹmwẹ mẹ ra ne iran zẹ yọ mwẹ re. Sokpan iran keghi ze vbe udu, iran ma họn ẹmwẹ mẹ amawẹ ne iran ruẹ emwi vbe ehe ne I ye.

²⁴ “Tama avbe emwa na ne iran gha ye uhi mwẹ hia ru emwi. Iran ghẹ mu ihẹikeihẹ la onurho ẹvbo nii la owa vbe Ẹdẹ Ikẹtin. Iran ghi gha ru Ẹdẹ Ikẹtin ẹdẹ nọhuanrẹn, iran ghẹ vbe winna iwinna rhọkpa hiehiere.

²⁵ Ẹghẹ nii avbe ọba iran kevbe avbe ivbiọba iran gha la uwu onurho e Jerusalẹm, iran ghi vbe gha mwẹ egbe ẹtin ọha ne Devid gha mwẹ. Ke iran kevbe ivbi e Jerusalẹm kevbe Juda, iran gha hin ikẹkẹ okuo kevbe ẹsin, ore Jerusalẹm ghi gha vuọn ne ẹvbo vbe ẹghẹ hia.

²⁶ Emwa gha ke avbe okpe vbo e Juda, kevbe avbe igue ni lẹga Jerusalẹm rre, iran gha ke otọe Bẹnjamin rre, kevbe avbe ototọ oke kevbe uhunmwu oke rre, kevbe ke odẹ ekẹn Juda rre. Iran gha viọ ese ne a giẹn uan rrie Ọgua Osa mwẹ deba ese ne a zọọ, imuohan ọghe ọka kevbe eturari, kevbe imuohan ekpọnmwẹ.

²⁷ “Sokpan, te ọ kere ne iran gha họn ẹmwẹ mẹ, ne iran gha ru Ẹdẹ Ikẹtin zẹ vbe ẹdẹ nọhuanrẹn. Iran ghẹ mu ihẹikeikẹ la onurho e Jerusalẹm gberra vbe ẹdẹ vberriọ, iran gha danmwẹ ọẹn, I gha mu erhẹn ye onurho e Jerusalẹm. Erhẹn gha giẹn ẹguae ne ọ rre Jerusalẹm, ai ra vbe miẹn ọmwa ne ọ gha sẹtin dọ ẹre yọ.”