Jerimaia 14 - Edo Bible (E Baibol Ẹdo) Version 1996

Uyunmwu Ne Ọ Mu Ohan

¹ E Nọyaẹnmwa keghi tama mwẹ vbekpa nene uyunmwu wẹẹ,

² “Juda rre akhiẹ avbe okpẹvbo ẹre hia wulo khian, emwa rẹn lovbiẹ lele otọ iran gha khiẹ, e Jerusalẹm gha go gualọ iyobọ.

³ Avbe iran ni fe gha gie eguọmwadia iran ne iran ya sa amẹ rre, iran yo uhae nibun sokpan amẹ i rrọọ, iran keghi viọ uru ohogha gha die owa, egbe wọ iran, iro han iran, iran keghi viọ aro lẹre rhunmwuda ekhue.

⁴ Rhunmwuda ne amẹ ma na rhọ, te otọ hia ghi kaka, udu gha kpe avbe ọgbugbo.

⁵ Ẹrhuẹ sẹ ọmọ ne ọ biẹ rae vbe oha, rhunmwuda irunmwu i rrọọ.

⁶ Avbe ede ya mudia ye uhunmwu oke, iran gha hẹwẹ ukuke, vbe ekuaghagha, aro ma ghi gie iran ya bẹghe rhunmwuda, iran i mwẹ evbare.

⁷ Avbe emwa mwẹ viẹ bu mwẹ gha dee wẹẹ, ‘A gha rhe miẹn ighẹ orukhọ mwa gu ima gui, yi ima obọ vbene u yanrẹn Nọyaẹnmwa. Ẹghẹ nibun ọ re ima ya fi yeke gbe uwẹ, ma ru orukhọ ghe uẹ.

⁸ Wẹ ọrọre idaehọ okpa kẹkan ne Izrẹl mwẹ wẹ okpa kẹkan ọ re ọ miẹn ima fan vbe obọ ọfuan. Vbọzẹ ne u na ye vbe ọrriọvbe vbe otọe mwa? Zẹ vbe ọmwa ne ọ rre okhian, ne ọ gbe asọn okpa kẹkan?

⁹ Vbọzẹ ne u na ye vbe ọmwa ne emwi yan ẹre unu uan, zẹ vbe ovbiyokuo ne ẹ i mwẹ ẹtin ne ọ gha ya ru iyobọ? Vbe ẹmwata, wẹ rrọọ yaba mwa, Nọyaẹnmwa emwa ruẹn ma khin, ghẹ he mwa yotọ.

¹⁰ E Nọyaẹnmwa keghi kha vbekpa avbe emwa na wẹẹ, iran ho ne iran gha lẹ mẹ, iran i sẹtin mu egbe iran yọghọ rhunmwuda ọnii, ẹko iran i rhiẹnrhiẹn mwẹ. I gha ye avbe amaruẹse iran rre, I gha rri iran oya ye orukhọ iran.’ ”

¹¹ E Nọyaẹnmwa keghi tama mwẹ wẹẹ, “Ghẹ tama mwẹ ne I ye emwa na obọ.

¹² Ọ gha khọn iran wẹ ne iran yo aguẹ, I i zẹ ye eve ne iran ya nọ iyobọ, ọ gha khọn iran, iran zọ ese na giẹn uan mẹ, ra imuohan ọghe ọka, ẹko mwẹ i ra rhiẹnrhiẹn ghe iran sokpan, I gha ye okuo gbele iran an, kevbe ohanmwẹ, deba emianmwẹ.”

¹³ Ẹre imẹ na kha wẹẹ, “E Nọyaẹnmwa ne Udazi, u rẹnrẹn wẹ avbe akhasẹ tama avbe emwa na wẹ okuo i ra gha rrọọ, ra ohanmwẹ, rhunmwuda u tae nẹ, zẹ vbene iran khare, wẹ ọfumwegbe okpa ọ re ọ ra gha rre otọe nii.”

¹⁴ Sokpan, e Nọyaẹnmwa ke wanniẹn wẹẹ, “Te avbe akhasẹ nii ta ohoghe vbe eni mwẹ, I ma gie iran, ama ghi wẹ ne I tama iran wẹ ne iran ta ẹmwẹ okpa ma iran. Umian ne iran kha nii ẹ i re ehe ne I ye ọ re iran ke rre, emwi ne ọ mwa ma ne iran zẹ iro ẹre vbe ekhọe iran, ọ re ẹmwẹ ne iran ta yotọ khin.

¹⁵ Mẹ ne Nọyaẹnmwa tama ruẹn emwi ne I ra ru iran re ighẹ avbe akhasẹ ne I ma gie ẹre uhunmwu, sokpan, iran ke ya gha ya eni mwẹ guan wẹ okuo kevbe ohanmwẹ i ra gbe otọe na. I gha gbele iran vbe okuo kevbe ohanmwẹ.

¹⁶ Erriọ ọ re a ra vbe gbele iran ne iran talọ avbe ẹmwẹ na ma. A gha filo ikun iran ku adesẹ ore Jerusalẹm, a i vbe miẹn ọmwa ne ọ gha re iran. Emwi ne ọ ra rruan iran hia ọ re ọna khin, ya sẹ egbe avbe amwẹ iran, ivbi iran nikpia kevbe ivbi iran nikhuo. I gha ru ẹe ne iran ha osa ekhọe dan iran.”

¹⁷ E Nọyaẹnmwa keghi yan tama mwẹ wẹ ne I ta ẹmwẹ akhiẹ mwẹ ma emwa nii, ne I tama iran wẹẹ: “Te ameve gha lẹ vbe aro mwẹ ke avan kevbe asọn I i gha dobọ eve ne I viẹ iran re yi rhunmwuda ẹwẹn ne ọ da ọ re a fian avbe emwa mwẹ re, obọ wa vbe daa iran.

¹⁸ I gha la uwu oha, I ghi gha miẹn ikun emwa ne a gbele vbe okuo, I gha la adesẹ ore, I ghi gha miẹn emwa ne ohanmwẹ ghi ra ghe ua. Avbe akhasẹ kevbe avbe ohẹn wa winna iwinna iran khian, sokpan, iran ma rẹn emwi ne iran ru.”

Emwa Nii Rinmwian E Nọyaẹnmwa

¹⁹ E Nọyaẹnmwa, te uwẹ wa he Juda fo fẹẹrẹ ra? Te uwẹ mu ohu emwa ni rre Zaiọn ra? Vbọzẹ ne u na mu ohu ima sẹ vberriọ yi ne a na miẹn wẹ, a i ghi sẹtin mu ima egbe rran? Ma rhie aro ye ọfumwegbe sokpan, emwi ọma rhọkpa ma sunu, ma rhie aro ye amu ọmwa egbe rran, sokpan, emwi ugborrirri ọ re ọ rre.

²⁰ Ma ru orukhọ ghe ruẹ nẹ, Nọyaẹnmwa ma miẹn orukhọ mwa kue, kevbe orukhọ avbe erha mwa odede.

²¹ Ye eyan ruẹn rre, ne u ghẹ zan mwa, ghẹ gie efa rruan e Jerusalẹm, ehe ne ẹkete ruẹ ne ọ mwẹ uyi ye. Ghẹ mu ile ne u gu ima ta fua.

²² Ọkpa ne ọ sẹtin si amẹ i rre avbe amazẹ avbe uhunmwu ẹvbo, iso i sẹtin ye ẹtin obọ ẹre wẹ ne amẹ rhọ. Wẹ ọre ima mu ẹtin idaehọ mwa yan, e Nọyaẹnmwa Osanobua mwa rhunmwuda, wẹ ọrọre ọmwa ne ọ ru avbe emwi na hia.